Meł Hibsan u sieryjale «Kantyniental». Krynica: kadr z aficyjnaha trejlera

Meł Hibsan u sieryjale «Kantyniental». Krynica: kadr z aficyjnaha trejlera

«Darahoje dzicia» (Liebes Kind), Netflix

Zusim chutka, 7 vieraśnia, na stryminhu vychodzić niamieckaja šmatsieryjka pa knizie-biestseleru Romi Chaŭsman. Historyja nie z aptymistyčnych: heta chutčej apovied pra hvałt, rasśledavańnie i strach achviary raskazać pra toje, što ź joj zdaryłasia. Kadry trejlera ŭražvajuć — budzie sapraŭdy vielmi zmročna.

Lena žyvie ŭ poŭnaj izalacyi ŭ padvale doma nieznajomaha mužčyny razam z dvuma dziećmi Chanaj i Džonatanam. Jany robiać usio, što skaža ich «haspadar»: jaduć, naviedvajuć tualet i kładucca spać u stroha vyznačany čas, a kali jon zachodzić u pakoj, vystrojvajucca, kab pakazać svaje ruki.

Adnojčy Lena i Chana źbiahajuć z pałonu, ale traplajuć u avaryju. Lena lažyć u balnicy ŭ nieprytomnaści, i tolki Chana moža adkryć praŭdu pra toje, što ź imi zdaryłasia, ale jana baicca heta zrabić navat na voli.

«Padmieniec» (The Changeling), Apple TV+

Pamiatajecie modu na čyrvonyja nitki, što jašče niekalki hadoŭ tamu dziela zababonaŭ paviazvali na zapiaści? 8 vieraśnia možna budzie pabačyć fantaziju pra toje, kudy hetaja prykmieta (i nie tolki) moža zavieści.

Apoła Kahva žyvie ŭ chałodnym tahaśvietnym Ńju-Jorku i sprabuje zvyknucca z novaj rollu baćki. Jahonaja žonka Ema pačynaje vieści siabie ekscentryčna i ŭ rešcie rešt źnikaje razam z maleńkim synam. Z usioj hetaj historyjaj niejak źviazanaja babka-šaptucha z Brazilii i čyrvonaja nitka na zapiaści Emy, jakuju parvaŭ jaje muž. A ŭ pracesie pošukaŭ jon vyśvietlić, što jahonaja siamja — zusim nie takija, jakimi jon ich sabie ŭjaŭlaŭ.

«Pusteča» (The Wilderness), Amazon Prime Video

15 vieraśnia trymajcie historyju pra padarožža — adno z tych, jakija mohuć šmat źmianić. 

Zdajecca, u brytanskaj pary Liŭ (cudoŭnaja aktrysa Džena Koŭłman z «Doktara Chto») i Uiła ŭsio dobra: ich šlub stabilny, jany žyvuć hłamurnym žyćciom u Ńju-Jorku i ŭsio jašče dastatkova maładyja, kab adčuvać, što napieradzie ich čakaje šmat cikavaha. Idealnaja karcinka razburajecca, kali dziaŭčyna daviedvajecca — Uił joj zdradziŭ. 

U raźbitym sercy zaradžajecca hnieŭ. Uił prapanuje žoncy pajezdku pa cudoŭnych nacyjanalnych parkach Amieryki, kab pasprabavać pačać usio nanova, adnak Liŭ dumaje tolki pra pomstu. 

«Kantyniental» (The Continental), Peacock

22 vieraśnia možna budzie pabačyć sieryjał-prykvieł znakamitaha «Džona Uika» (taho samaha, dzie hieroj Kijanu Ryŭza — «dzicia Biełarusi»). U hety raz film abydziecca biez Kijanu, zatoje da akciorskaj kamandy dałučyŭsia Meł Hibsan.

«Kantyniental» — heta sietka hatelaŭ, raskidanych pa ŭsim śviecie, što słužać niejtralnaj terytoryjaj dla pradstaŭnikoŭ kryminalnaha śvietu. Siarod ich častych naviednikaŭ — najomnyja zabojcy.

U sieryjale budzie ŭsiaho try častki. Hledziačy pa trejlery, nas čakaje bahata trukaŭ, raskošy i pafasu — i, vierahodna, šmat ekšnu.

«C*A*U*G*H*T», Stan

Hety sieryjał, što vychodzić 28 vieraśnia, trapiŭ u našu padborku za śmiełuju satyru i časam niekarektny humar. 

Historyja maksimalna prostaja. Čatyry aŭstralijskija sałdaty jeduć na misiju ŭ spustošanuju vajnoj krainu, dzie traplajuć u pałon da zmaharoŭ za svabodu. Paśla biespaśpiachovaj sproby rastłumačyć, što jany nie amierykancy, vajaki musiać źniacca ŭ videa pra svoj pałon — i jano robicca virusnym.

Hetaje vidovišča stvaraje zorny akciorski skład na čale z Šonam Penam i Sjuzan Sarandan. Nie ździvimsia, kali heta budzie najlepšaje kino pra zakładnikaŭ, što vy pabačycie ŭ žyćci.

«Uroki chimii» (Lessons of Chemistry), Apple TV+

Kali vam spadabaŭsia toj samy film «Barbi», 13 kastryčnika nie prachodźcie mima «Urokaŭ chimii». Jak i hałoŭny błakbastar hetaha hoda, sieryjał ad amierykanskaj kampanii — humarystyčnaje vykazvańnie na temy žanočych prablem i fieminizmu.

Na dvary pačatak 60-ch, i talenavitaja dziaŭčyna Elizabiet Cot buduje karjeru chimika ŭ łabaratoryi. Jana zmahajecca sa stereatypami pra toje, što miesca žančyny na kuchni, ale ŭ vyniku tudy i traplaje — bo z łabaratoryi jaje zvalniajuć, jana zaciažarvaje i akazvajecca biez mužčynskaj padtrymki. Cot pačynaje vieści kulinarnaje telešou i biare na siabie zadaču navučyć žančyn našmat bolšamu, čym prosta hatoŭcy.

«Usio niabačnaje nam śviatło» (All the Light We Cannot See), Netflix

2 listapada Netflix vypuskaje historyju dla fanataŭ ramantyki i filmaŭ u stylistycy «Dziońnika pamiaci». U dadatak da hetaha, nas čakaje jašče i sproba adnavić vajennyja realii.

Pačatak 1940-ch, akupavanaja nacystami Francyja. Vajna pieraplataje historyi ślapoj dziaŭčynki-padletka, jakaja ŭ sprobie ŭratavacca razam z baćkam jedzie da mora, i niamieckaha chłopčyka-siraty. Atrymlivajecca historyja i pra adnosiny i pra toje, jak ludzi navat u składaniejšyja časy sprabujuć być dobrymi adno da adnaho.

U roli junaj francužanki vystupaje nasamreč ślapaja aktrysa-debiutantka, siarod zorak druhoha płanu čakajcie hienijalnaha brytanca Chju Łory. Budzie pa-svojmu maštabna.

«Piratki» (The Buccaneers), Apple TV+

Krynica: apple.com

Krynica: apple.com

8 listapada hety sieryjał adpravić nas u 1870-ja, dzie niekalki maładych i zamožnych amierykanak sprabujuć znajści ŭ Łondanie niabiednaha mužčynu. Dla ich šlub — tolki pačatak čaroŭnych pryhodaŭ, što dazvolać im skaryć ceły śviet.

Kali vy bačyli znakamitych «Brydžertanaŭ», adzin ź sieryjalnych chitoŭ apošnich hadoŭ, to «Piratki» padaducca vam niečym padobnym. Heta taksama historyja pra adnosiny i intryhi siarod bałaŭ, karsietaŭ i vyšejšaha śvietu 19-ha stahodździa. Kali ŭ «Brydžertanaŭ» atrymałasia, čakajem i ad «Piratak» fajnaha vyniku.

«Zabojstva na krai śvietu» (A Murder at the End of the World), FX / Hulu

Amataram detektyvaŭ hetaj vosieńniu budzie na što pahladzieć. 14 listapada čakajem premjeru, źniatuju ŭ vydatnych łakacyjach — niezdarma ž heta pra złačynstva na krai śvietu.

Darbi Chart — dziaŭčyna, jakaja vielmi lubić rasśledvać złačynstvy. Miljarder-pustelnik zaprašaje jaje razam z 11 inšymi haściami na adpačynak u addalenym i vielmi pryhožym miescy. Kali adnaho z haściej znachodziać miortvym, Darbi musić razabracca ŭ historyi i dakazać, što hetaje zabojstva źviazanaje z kankurencyjaj intaresaŭ. Na konie — inšyja žyćci, jakija moža zabrać złačynca.

Darečy, u roli miljardera — zorny brytaniec Kłajv Oŭen, jakoha vy mahli bačyć u «Horadzie hrachoŭ», «Ružovaj pantery» i «Dziciaci čałaviečym».

«Recha» (Echo), Disney+ / Marvel

Krynica: Disney+

Krynica: Disney+

29 listapada nas čakaje kałabaracyja ad Disney+ i Marvel. Heta praciah mini-sieryjała 2021 hoda «Sakalinaje voka», dzie pačałasia historyja hałoŭnaj hieraini «Recha» Mai Łopiez.

U hety raz Maja musić sutyknucca sa svaim minułym, uźjadnacca sa spadčynaj ułasnych prodkaŭ — karennych amierykancaŭ i ŭśviadomić dla siabie značeńnie siamji i supolnaści, bo biez usiaho hetaha jana nie zdoleje iści napierad. Na žal, ničoha bolš dakładnaha pra siužet my nie viedajem.

Siarod akcioraŭ filma, akramia vykanaŭcy hałoŭnaj roli Ałakvy Koks, jość i inšyja naščadki karennych amierykancaŭ. Sama Ałakva — pieršaja aktrysa ź invalidnaściu, jakaja hraje hałoŭnuju rolu ŭ filmie Marvel: jana nie čuje i žyvie z pratezam nahi.

Čytajcie taksama:

Vychodzić film «Misija nievykanalnaja — 7». Krytyki ŭžo nazyvajuć jaho adnym z najlepšych bajevikoŭ usich časoŭ

Na jutub vykłali biełaruski sieryjał-sitkam «Apošniaja nadzieja»

Novy natchnialny trend — u tyktoku šyrycca moda na nadzieju

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?