Vybuchoŭka dla padryvu Krymskaha mosta. Fota: SBU

Vybuchoŭka dla padryvu Krymskaha mosta. Fota: SBU

Pieršy ŭdar pa Krymskim moście adbyŭsia ranicaj 8 kastryčnika 2022 hoda, na nastupny dzień paśla 70‑hodździa Uładzimir Pucina. Dla jaho vykarystoŭvali hruzavik z vybuchoŭkaj, zahornutaj u plonku. Druhi ŭdar pa moście Ukraina naniesła ŭ noč na 17 lipienia 2023 hoda marskimi nadvodnymi dronami. Hetu apieracyju nazvali, jak i drony, «Marski mały».

Vydańnie NV rekanstrujavała hetyja dźvie padziei, pahavaryŭšy z kiraŭnikom Słužby biaśpieki Ukrainy Vasilom Malukom, jaki niadaŭna kamientavaŭ druhi ŭdar pa moście CNN.

Kiraŭnik SBU padkreśliŭ: hetyja apieracyi rychtavalisia vyklučna siłami Ukrainy, i nijakija zamiežnyja śpiecsłužby da ich nie datyčnyja.

«Raspracoŭkaj i realizacyjaj śpiecapieracyi z mostam zajmalisia ja asabista i dvoje maich davieranych supracoŭnikaŭ», — raspavioŭ Vasil Maluk, kažučy pra pieršy ŭdar.

Pavodle jaho słoŭ, SBU vynošvała ideju padryvu Krymskaha mosta jašče ź viasny 2022 hoda. Razhladali roznyja varyjanty: pierapravić vybuchoŭku ŭ tavarnych vahonach (ale rasijanie prapuskajuć pa čyhuncy tolki vajskovyja hruzy), adpravić furu z bočkami alivy, u jakich možna było b schavać vybuchoŭku (ale heta nie harantavała nieprykmietnaści).

Urešcie kiraŭnik SBU prydumaŭ varyjant z vybuchoŭkaj, aściarožna abmatanaj cełafanavaj plonkaj. Taki hruz — vialikija rułony — pavinien byŭ vyhladać pa-cyvilnamu i nie vyklikać padazreńniaŭ.

SBU raźličyła taŭščyniu płasta plonki, dastatkovuju, kab schavać ad mytnych skanieraŭ napoŭnienyja sumieśsiu hieksahienu mietaličnyja cylindry-stryžni.

«Rułonami» zabili ceły kantejnier — ich sumarnaja vaha ŭ traciłavym ekvivalencie adpaviadała 21 tonie, abo 42 rasijskim hipierhukavym rakietam «Kinžał».

Prachodžańnie hruzu z Ukrainy da miesca vybuchu na moście było vielmi niaprostym. Detali hetaha ryzykoŭnaha maršrutu Vasil Maluk nie vydaje, ale zapeŭnivaje, što zamiežnych partnioraŭ Ukraina nie pryciahvała: vykarystoŭvalisia vyklučna mahčymaści SBU.

SBU pryjšłosia ŭličyć jašče adzin važny momant: u pačatku Krymskaha mosta stajać śpiecyjalnyja kompleksy REB, zadača jakich — źbivać GPS-kaardynaty na vybuchovych pryładach, nastrojenych na peŭny punkt. Kamanda, sabranaja Malukom, stvaryła technična składanuju sistemu, dziakujučy jakoj ranicaj 8 kastryčnika 2022-ha hruz «plonki» ŭsio ž taki ŭźlacieŭ u pavietra prykładna na siaredzinie mosta.

Maluk naziraŭ za tym vybucham u svaim kabiniecie ŭ režymie realnaha času dziakujučy kamiery, ale nie raskryvaje, dzie jana znachodziłasia.

«My siem kołaŭ piekła prajšli, vykarystoŭvali ŭ ciomnuju stolki ludziej! Rasijanie «zakryli» 22 čałavieki — źmiaścili ŭ turmu. Inkryminujuć im usim saŭdzieł u terarystyčnym akcie. Choć nasamreč jany zajmalisia zvykłaj dla siabie štodzionnaj spravaj. Heta byli zvyčajnyja rasijskija kantrabandysty».

Paśla pieršaj «proby piara» ŭ SBU adrazu ŭzialisia za raspracoŭku novaha ŭdaru pa moście. Vialikuju rolu ŭ realizacyi hetaj idei adyhraŭ kiraŭnik adnaho z upraŭleńniaŭ vajskovaj kontrraźviedki — aficer ź psieŭdanimam Chanter, jaki prykłaŭ ruku da stvareńnia marskich dronaŭ.

Ukrainskija śpiecsłužbisty stvaryli načynienyja vybuchoŭkaj dystancyjna kiravanyja płaŭsrodki-kamikadze, zroblenyja z unikalnaha materyjału, nieprykmietnaha dla varožych RŁS, kanstrukcyja jakich praduhledžvała try vidy kiravańnia i samaźniščeńnie ŭ vypadku nieabchodnaści.

Upieršyniu ŭ abstavinach realnaha boju płyvučyja bieśpiłotniki inžyniery i śpiecyjalisty SBU vyprabavali na karablach rasijskaha Čarnamorskaha fłotu, kali vosieńniu minułaha hoda atakavali ŭ Sievastopalskaj buchcie rakietnyja frehaty «Admirał Makaraŭ» i «Admirał Esen». Apošni paśla hetaj śpiecapieracyi doŭhi čas stajaŭ u doku na ramoncie.

Zrazumieŭšy, što drony nie zdolnyja patapić vialikija sudny, kolkaść vybuchoŭki na ich daviali da 850 kh hieksahienu. Taksama madernizavali sistemu kiravańnia bieśpiłotnikami, atrymaŭšy jakasna novy ŭzor nadvodnaha «mściŭca».

Maluk pryciahnuŭ da supracoŭnictva kamandujučaha VMS Alaksieja Nieižpapu. Abjadnanaja kamanda fłotu i śpiecsłužby pačała rychtavać marskuju apieracyju, kab padarvać Krymski most.

Drony praciahvali ŭdaskanalvać, navat ustalavali na korpusie dva reaktyŭnyja ahniamioty pavyšanaj dalokaści «Čmiel-M». Byli i inšyja nou-chau, detali jakich u SBU pakul nie raskryvajuć.

U siaredzinie lipienia SBU i VMS narešcie vypuścili drony ŭ adkrytaje mora, nakiravaŭšy ich na cel. Bieśpiłotniki ŭdaryli pa apory mosta, skinuŭšy ź jaho ceły pralot aŭtamabilnaj častki, pra što śviedčać apublikavanyja paźniej fota.

«Dźvie nočy my nie spali — litaralna štochviliny sačyli za dronami. My znachodzilisia na takim drajvie, što davodziłasia trochi supakojvać chłopcaŭ, kab jany nie hnali bieśpiłotniki.

Kali adbyŭsia vybuch, my vielmi mocna kryčali, bo napružańnie ŭnutry było vielizarnym. Skažu ščyra: ja maliŭsia, kab usio atrymałasia. I kali dron vybuchnuŭ, ad radaści «vybuchnuli» i my».

Čytajcie taksama:

Słužba biaśpieki Ukrainy pakazała ekśpierymientalny nadvodny bieśpiłotnik. Jaho zrabili na padziemnym zavodzie

CNN apublikavała ekskluziŭnyja kadry ataki SBU na Krymski most u lipieni

Ukraina ŭziała adkaznaść za ŭčorašni ŭdar pa Krymskim moście

Krymski most byŭ u dymie. Pierad hetym tam byli čuvać huki vybuchaŭ

Клас
32
Панылы сорам
1
Ха-ха
0
Ого
2
Сумна
0
Абуральна
4