Fota: Fervo Energy

Fota: Fervo Energy

Amierykanskaja kampanija Fervo Energy zajaŭlaje, što dasiahnuła praryvu ŭ hieatermalnych technałohijach. Jana praviała 30-dzionnyja vyprabavańni śvidraviny na svajoj placoŭcy ŭ paŭnočnaj Nievadzie i kaža, što ŭ vyniku vyprabavańniaŭ byli atrymanyja rekordy chutkaści vypracoŭki elektraenierhii i mahutnaści «ŭdaskanalenaj hieatermalnaj sistemy» (EGS).

Čakajecca, što Fervo padklučyć svoj abjekt da sietki sioleta. Siarod inšaha jon budzie vykarystoŭvacca dla siłkavańnia data-centraŭ Google. Heta pieršy vypadak, kali enierhietyčnaja kampanija pakazała, što EGS moža pracavać u kamiercyjnych maštabach. Šlach da hetaha byŭ doŭhi: navukoŭcy sprabavali zrabić EGS jašče z 1970-ch hadoŭ.

Udaskanalenaja hieatermalnaja sistema (EGS): 1) vadaschovišča, 2) pompavaja stancyja, 3) ciepłaabmieńnik, 4) turbinnaja zała, 5) zdabyŭnaja śvidravina, 6) nahniatalnaja śvidravina, 7) haračaja vada dla ciepłacentrali, 8) porystyja adkłady, 9) naziralnaja śvidravina, 10) kryštaličnaja parodaVyjava: Wikimedia Commons / Siemens Pressebild

Udaskanalenaja hieatermalnaja sistema (EGS):
1) vadaschovišča, 2) pompavaja stancyja, 3) ciepłaabmieńnik,
4) turbinnaja zała, 5) zdabyŭnaja śvidravina, 6) nahniatalnaja śvidravina, 7) haračaja vada dla ciepłacentrali, 8) porystyja adkłady, 9) naziralnaja śvidravina, 10) kryštaličnaja paroda
Vyjava: Wikimedia Commons / Siemens Pressebild

Kab naturalnaja hieatermalnaja sistema vyrablała elektraenierhiju, joj nieabchodna spałučeńnie ciapła, vadkaści i pranikalnaści parody. U mnohich rajonach hornaja paroda maje nieabchodny ŭzrovień ciapła, ale niedastatkovuju pranikalnaść, kab praź jaje ciakła vadkaść, tłumačyć vydańnie Engaget.

Što robić EGS? Stvaraje takuju pranikalnaść štučna šlacham bureńnia hłybokaj śvidraviny i zapampoŭki vadkaści dla stvareńnia raskolin u parodzie. Taki padychod moža značna pavialičyć kolkaść patencyjnych placovak dla hieatermalnych elektrastancyj.

Fervo kaža, što źjaŭlajecca pieršaj kampanijaj, jakaja paśpiachova praburyła paru haryzantalnych śvidravin dla kamiercyjnaj hieatermalnaj zdabyčy, dasiahnuŭšy tempieratury 191°C.

Adnoj z hałoŭnych pieravah hieatermalnych elektrastancyj źjaŭlajecca toje, što jany ŭvohule nie vykidvajuć vuhlakisłaha hazu. Mienavita takuju metu pieraśleduje Google: da 2030 hoda pieravieści ŭsie ofisy i centry apracoŭki danych na biezvuhlarodnuju enierhiju. Pry hetym hieatermalnyja ŭstanoŭki mohuć pracavać kruhłyja sutki (u adroźnieńnie ad soniečnaj i vietranoj enierhii). Pa słovach hienieralnaha dyrektara Fervo, hałoŭnyja pieraškody dla šyrejšaha raspaŭsiudžvańnia EGS siońnia — źnižeńnie vydatkaŭ i ciahanina z narmatyvami.

Kampanija spadziavajecca paŭtaryć svoj pośpiech na inšym abjekcie ŭ štacie Juta. Kali Fervo znoŭ dasiahnie padobnych vynikaŭ i zmoža paśpiachova madernizavać dyzajn dla maksimalnaha pavieličeńnia mahutnaści, to ŭstanoŭka zmoža vyrablać dastatkova elektraenierhii dla adnačasovaha siłkavańnia 300 000 damoŭ, zajaŭlajuć u kampanii. A heta prykładna čverć usich damoŭ u štacie Juta.

U kampanii Google z aptymizmam hladziać na partniorstva z Fervo, jakoje raspačałosia jašče ŭ 2021 hodzie, i bačać vialiki patencyjał dla hieatermalnaj technałohii, užo nazyvajučy apošniaje dasiahnieńnie Fervo «važnaj techničnaj viachoj».

Čytajcie taksama:

Ci zmohuć akijanskija chvali stać dla čałaviectva nievyčerpnaj krynicaj enierhii?

Vializnyja «piasčanyja batarei» — novaja technałohija dla zachoŭvańnia liškaŭ soniečnaj i vietravoj enierhii

Vialikaja batareja zmoža zabiaśpiečvać enierhasiłkavańniem uvieś vaš dom amal tydzień

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?