«Fihurant nieadnarazova ŭčyniaŭ seksualnyja dziejańni ŭ dačynieńni da 13-hadovaj svajački, kali žyŭ ź siamjoj dziaŭčynki ŭ adnoj kvatery. Takija fakty adbyvalisia, navat kali baćki dziciaci znachodzilisia doma ŭ susiednim pakoi».

«29-hadovy žychar Hłybokaha nie raz hvałtavaŭ 8-hadovuju dačku svajoj sužycielki, kali dziaŭčynka znachodziłasia ŭ biezdapamožnym stanie».

«11-hadovaja dziaŭčynka paviedamiła školnamu psichołahu pra damahańni blizkaha svajaka. Takaja ž infarmacyja była atrymanaja i ŭ dačynieńni da 15-hadovaj siastry školnicy. Ustanoŭlena, što žychar rajcentra nieadnarazova ŭčyniaŭ dziejańni seksualnaha charaktaru i ŭstupaŭ u pałavuju suviaź ź dziaŭčynkami».

Takija padrabiaznaści apošnim časam rehularna ŭspłyvajuć u dziaržaŭnaj presie. A pra toje, što nie ŭspłyvaje, narod i sam viedaje i havoryć. Tak, naprykład, Viciebskaja vobłaść ciapier abmiarkoŭvaje historyju nastaŭnika fizkultury N., jaki ŭ rajonnaj škole raźvioŭ ceły «harem» sa staršakłaśnic, jaki isnavaŭ hadami. Na minułym tydni nastaŭnika z zaniatkaŭ vyvieŭ AMAP. 

Zrešty, uzrost seksualnaj zhody ŭ Biełarusi — 16 hadoŭ, tamu nie luby seks z navučencami pa zakonie možna ličyć piedafilijaj. 

Piedafilija adnosicca da vysokałatentnych złačynstvaŭ — tych, što ŭ realnaści adbyvajecca bolš, čym fiksujecca na papiery, tamu što vynikam nie stanovicca niešta vidavočnaje. Tak, rabaŭnictva łambarda ci zabojstva naŭrad ci schavaješ, a voś piedafiliju — lohka.

Achviara piedafilii vonkava nie adroźnivajecca ad adnahodkaŭ, a pra ŭčynieny akt złačynstva nad dziciom zvyčajna darosłym stanovicca viadoma tolki vypadkova i, čaściej za ŭsio, nie adrazu. 

Časta dakazać vinu mierkavanaha piedafiła składana, tamu što bijałahičnyja ślady złačyncy, kali jon ich i pakinuŭ, doŭha nie zachoŭvajucca.

A heta asnoŭny dokaz, bieź jaho atrymlivajecca situacyja słova suprać słova, što, u svaju čarhu, robić takija spravy «nielubimymi» i ŭ śledčych ź milicyjaj. 

Byvajuć situacyi i vielmi zabłytanyja. Tak, u historyi Biełarusi była hučnaja sprava D., jakomu padabalisia maleńkija chłopčyki. Ale byŭ niuans — piedafił D. zmušaŭ chłopčykaŭ da aralnaha kantaktu, śladoŭ nie zastavałasia. Ad pakazańniaŭ achviary admaŭlalisia, bo bajalisia. A raniejšyja achviary, jakija ŭžo vyraśli i mieli ŭłasnyja siemji, pramym tekstam adpraŭlali śledčych, jakija prasili ŭspomnić pra adnosiny z D. U vyniku D. pryjšłosia źmiaścić u SIZA pa ekanamičnym artykule, a ŭžo kali jon byŭ tam, niekatoryja z achviar pierastali bajacca i dali pakazańni. 

Ale hetaja historyja tolki adlustroŭvaje ciažkaść rasśledavańnia takich złačynstvaŭ, dzie achviar było bolš čym dastatkova, a žadańnie orhanaŭ pasadzić piedafiła vializnym. Tuju spravu, darečy, vioŭ ciapier užo palitviazień, a tady śledčy Jaŭhien Juškievič. 

Jak ža zvyčajna atrymlivajuć infarmacyju pra seksualnyja złačynstvy suprać niepaŭnaletnich i što źmianiłasia ciapier? 

«Raniej pracavali tolki pa zajavach z dastatkovaj dokaznaj bazaj, a taksama atrymlivali trochi infarmacyi ad hiniekołahaŭ», — kaža «Našaj Nivie» adzin sa śledčych pa takich spravach.

«Ciapier, na maju dumku, śmiełaść orhanaŭ u palityčnym represavańni biełarusaŭ daje niečakanyja efiekty ŭ rasśledavańni sapraŭdnaha kryminału. I značeńnie maje bolšy, čym raniej, raspaŭsiud mabilnych telefonaŭ, a taksama pašyranaść sacsietak.

Raniej, kali źjaŭlalisia niejkija padazreńni, u čałavieka, naprykład, nie mahli pravieści narmalny vobšuk, zaleźci ŭ devajsy, bo tam paroli, abo prosta niama sankcyi na kanfiskacyju techniki. Zaraz heta pracuje prykładna tak: nastaŭnik niešta takoje pačuŭ ad dziciaci i paviedamiŭ u milicyju. Padazravanaha adrazu zatrymali i zabrali ŭ jaho devajsy, paroli vybili. I tam adkryvajecca paralelny suśviet: videazapisy ź dziećmi, zroblenyja samim padazravanym, abo ściahnutyja dla prahladu.

Heta ŭžo vielmi spraščaje rasśledavańnie spravy i źjaŭlajecca arhumientam na karyść abvinavačańnia. Taksama źmiest archivaŭ, historyi braŭziera, pierapiski ŭ sacsietkach z achviarami, patencyjnymi achviarami ci ź ludźmi hetakich ža seksualnych pohladaŭ i fantazij. Bolšaja aktyŭnaść u dakumientavańni śladoŭ złačynstva z boku piedafiłaŭ i bolšaja aktyŭnaść orhanaŭ u apieratyŭnaj rabocie — voś pryčyna, na maju dumku, usplosku rehistracyi takich vypadkaŭ. Hadoŭ 10—15 tamu čałaviek moh by być toj ža samy, ale nijakich dokazaŭ na siabie jon by nie pakinuŭ, bo nie tak aktyŭna karystaŭsia internetam i sacyjalnymi sietkami», — paviedamiŭ naš surazmoviec. 

Клас
12
Панылы сорам
10
Ха-ха
1
Ого
11
Сумна
9
Абуральна
31