Fota: AP
Za apošnija dva tydni Ruskaj słužbie Bi-bi-si sumiesna z vydańniem «Miedyjazona» i kamandaj vałancioraŭ udałosia ŭstanavić imiony 1213 čałaviek. Niahledziačy na zaviaršeńnie aktyŭnaj fazy rasijskaha nastupu, tempy pryrostu strat praciahvajuć zastavacca vysokimi i ŭsio jašče ŭ dva razy pieravyšajuć siarednija ličby paćvierdžanych štotydniovych strat na praciahu 2022 hoda.
Havorka idzie tolki pra tyja źviestki, jakija možna znajści i pravieryć pa adkrytych krynicach: paviedamleńniach čynoŭnikaŭ i ŚMI, publikacyjach blizkich svajakoŭ zahinułych u sacsietkach i infarmacyi z mohiłak.
Realnaja kolkaść strat vyšejšaja, čym ustanoŭlenyja ličby.
Pa stanie na 9 červienia maksimalnuju kolkaść zahinułych vajskoŭcaŭ z rehijonaŭ nazvali ŭłady i ŚMI Śviardłoŭskaj vobłaści — 945.
Śpis moža ŭtrymlivać prynamsi ŭ dva razy mienš imionaŭ zahinułych, čym nasamreč pachavana ŭ Rasii. Da takoj vysnovy žurnalisty pryjšli, sistematyčna vyvučajučy abstanoŭku na mohiłkach u bolš čym 65 rasijskich nasielenych punktach na praciahu apošnich 15 miesiacaŭ.
Takim čynam, pavodle najbolš kansiervatyŭnaj acenki, padčas uvarvańnia va Ukrainu Rasija mahła stracić 50 tysiač čałaviek zahinułymi. Biezzvarotnyja straty Rasii z ulikam tych, chto vybyŭ sa stroju pa pryčynie ranieńnia abo śmierci, mohuć składać prynamsi 225 tysiač čałaviek.
Hetaja ličba atrymanaja na asnovie nazirańniaŭ Centra vajskova-marskoha analizu ZŠA, zhodna ź jakimi na kožnaha zahinułaha rasijskaha vajskoŭca padčas vajny va Ukrainie prypadaje ŭ siarednim blizu troch z pałovaj paranienych.
U hetuju ličbu nie ŭvachodziać tyja, chto vajavaŭ na baku Rasii ŭ składzie «narodnych milicyj» samaabvieščanych respublik Danbasa.
Sa śniežnia minułaha hoda najbolšyja straty niasuć padraździaleńni, składzienyja ź ludziej ź minimalnaj vajennaj padrychtoŭkaj. Heta dobraachvotniki, mabilizavanyja, a taksama źniavolenyja, jakija vajujuć u składzie PVK «Vahnier» i vajskovych złučeńniaŭ samaabvieščanych DNR i ŁNR.
Miarkujučy pa sabranych danych, samyja surjoznyja straty panieśli atrady, składzienyja z asudžanych. Ciapier viadomyja imiony 4 689 źniavolenych, jakija adpravilisia vajavać ź miescaŭ pazbaŭleńnia voli. Bolšaść ź ich zahinuła pry šturmie Saladara i Bachmuta.
Zasnavalnik PVK «Vahnier» Jaŭhien Pryhožyn zajaviŭ, što pry šturmie Bachmuta zahinuła kala 10 tysiač asudžanych. Kali hetaja acenka dakładnaja, to jana paćviardžaje nazirańni ab tym, što pajmienny śpis zahinułych moža być u dva razy mienšy, čym realnaja kolkaść strat.
Taksama viadomyja imiony 1 704 zahinułych, što vajavali ŭ składzie PVK «Vahnier». 1 660 ź ich zahinuli paśla 1 žniŭnia — prykładnaj daty pačatku bajoŭ za Bachmut. Ahułam ustanoŭlenyja straty PVK «Vahnier» pieravyšajuć paćvierdžanyja straty złučeńniaŭ motastrałkoŭ i desantnikaŭ rasijskaj armii.
«Rasijanie vidavočna źmianili svaju kancepcyju praviadzieńnia apieracyj, toje, jak jany vykarystoŭvajuć sałdat, — adznačaje ekśpiert Karaleŭskaha abjadnanaha instytuta abaronnych daśledavańniaŭ (RUSI) Džek Uotlinh. — Ciapier Maskva vykarystoŭvaje svaich prafiesijnych vajskoŭcaŭ dla vyrašeńnia troch zadač: dla ŭtrymańnia pazicyj, dla dakładnych udaraŭ pa ŭkrainskich vajskoŭcach, naprykład, dla snajpierskaj stralby, abo dla kankretnych nastupalnych apieracyj, ale tolki tady, kali ŭmovy na miescach spryjalnyja».
Čytajcie taksama:
Ministr abarony Rasii Siarhiej Šajhu ŭpieršyniu ź vieraśnia 2022 hoda raskazaŭ pra rasijskija straty
Rasiejcy atakavali Adesu «Šachiedami». Troje zahinułych, bolš za 10 paranienych
