Siarhiej Aksionaŭ. Fota: Kremlin.ru
Mety vajennaj apieracyi (tak rasijskaje kiraŭnictva i prapahanda nazyvajuć poŭnamaštabnaje ŭvarvańnie va Ukrainu) buduć źmienienyja, zajaviŭ kiraŭnik anieksavanaha Kryma Siarhiej Aksionaŭ, piša RBK.
«Mety tam pavinien paznačyć lidar, jon ich akreślić tak ci inakš, heta značyć kančatkova. Nu, jany paznačanyja, mety [śpiecyjalnaj vajennaj apieracyi]. Uładzimir Uładzimiravič pra ich uvieś čas kaža. Adnak situacyja mianiajecca štodnia, dumaju, što ŭsio ž taki i mety buduć tak ci inakš skarektavanyja, ja asabista nie sumniavajusia», — skazaŭ Aksionaŭ.
Ź jaho słoŭ, jon «pieršapačatkova» ličyŭ, što kali značnaja častka Ukrainy zastaniecca niedemilitaryzavanaj, to hetaja častka chutka ŭstupić u NATO, Jeŭrasajuz i hetak dalej, i potym nam ź imi naohuł budzie ciažka pra niešta havaryć, niešta budavać i ŭsio astatniaje».
Na pytańnie televiadučaha ab pieravažnym i najbolš imaviernym varyjancie raźvićcia padziej, «dzie hetyja miežy, jak heta moža vyhladać», Aksionaŭ nazvaŭ hetaje pytańnie «balučym». Jon admoviŭsia dać vyčarpalny adkaz publična.
Addajučy zahad na poŭnamaštabnaje ŭvarvańnie va Ukrainu 24 lutaha 2022 hoda, Pucin siarod met nazvaŭ «demilitaryzacyju» i «denacyfikacyju» Ukrainy, a taksama «abaronu» mirnaha nasielnictva Danbasa ad «hienacydu».
Paźniej jon skazaŭ, što finalnaja meta — «vyzvaleńnie Danbasa, abarona hetych ludziej i stvareńnie ŭmoŭ, jakija harantavali b biaśpieku samoj Rasii».
U vieraśni jon ahučyŭ namier Maskvy likvidavać «antyrasijski ankłaŭ», jaki, na jaho dumku, stvarajecca va Ukrainie.
