školniki Biełaruś školniki schoolchildren Belarus

Što takoje «pieraviernutaje navučańnie»

Termin «pieraviernutaje navučańnie» (Flipped Learning) u 2000 hodzie vykarystaŭ vykładčyk markietynhu z Univiersiteta Majami Hlen Płat u adnajmiennaj publikacyi. Jon prapanavaŭ admovicca ad zvyčajnych urokaŭ na karyść farmatu videazapisaŭ.

Tradycyjnaje i «pieraviernutaje» navučańnie achoplivajuć adnu i tuju ž dvuchetapnuju piedahahičnuju paśladoŭnaść: spačatku instruktaž pa asnoŭnym źmieście, zatym — praktyka vyrašeńnia prablemy i jaje prapracoŭka.

Prychilniki «pieraviernutaha navučańnia» śćviardžajuć, što etap navučańnia pa svajoj pryrodzie pasiŭny i nie źjaŭlajecca najlepšym vykarystańniem času ŭ kłasie, jaki lepš patracić na aktyŭnaje navučańnie. Tamu pasiŭnuju častku jany vynosiać za ramki kłasa i prapanujuć vučniam samastojna jaje asvoić padčas prahladu videazapisu.

Sam mietad apisvajecca tak: «Toje, što tradycyjna rabiłasia ŭ kłasie, ciapier robicca doma, a toje, što tradycyjna vykonvałasia ŭ jakaści chatniaha zadańnia, ciapier vykonvajecca ŭ kłasie».

Novy padychod nabyŭ papularnaść paśla taho, jak pra paśpiachovaje jaho vykarystańnie raskazali dva nastaŭniki z amierykanskaha štata Kałarada. Jany vykładali chimiju ŭ nievialikaj škole. Častka vučniaŭ prapuskała zaniatki z-za ŭdziełu ŭ spartyŭnych spabornictvach. Kab jany nie adstali ad inšych, nastaŭniki vyrašyli rabić videazapisy svaich urokaŭ. Pa ich školniki samastojna vyvučali materyjał doma.

Novy padychod pakazaŭ svaju efiektyŭnaść, i nastaŭniki vyrašyli zapisvać na videa ŭsie svaje ŭroki. Pierad zaniatkami vučni prahladali zapis novaj temy i zatym u kłasie abmiarkoŭvali, pravodzili ekśpierymienty i atrymlivali zvarotnuju suviaź ad nastaŭnika.

Asnoŭnyja materyjały pa vykarystańni hetaha mietadu raźmieščanyja na sajcie mižnarodnaj supolnaści Flipped Learning Network.

Prychilniki «pieraviernutaha navučańnia» śćviardžajuć, što hety mietad zabiaśpiečvaje bolš aktyŭnaje navučańnie padčas zaniatkaŭ i ŭ vyniku pryvodzić da lepšych akademičnych vynikaŭ.

Arhanizacyja daśledavańnia

Adnak analiz, jaki praviała hrupa vučonych pad kiraŭnictvam prafiesara Šviejcarskaj vyšejšaj techničnaj škoły Manu Kapura, pakazała, što navučańnie pa novaj madeli nie daje tych vynikaŭ, ab jakich zajaŭlajuć jaje prychilniki. Svaimi vysnovami jany padzialilisia ŭ publikacyi ŭ časopisie Frontiers in Education.

Vučonyja praanalizavali 173 aryhinalnyja daśledavańni i 46 papiarednich mieta-analizaŭ novaj mietodyki, jakija achapili bolš za dźvie tysiačy rabot.

Hruntujučysia na analizie źmiestu artykułaŭ, vučonyja vyjavili, što «pieraviernutym navučańniem» było achoplena tolki 10% vučniaŭ siarednich škoł. Astatniaja dola prypadała na studentaŭ vyšejšaj škoły. Pry hetym najbolšaja kolkaść studentaŭ (73%) navučałasia na pryrodaznaŭčych śpiecyjalnaściach.

Daśledčyki źviarnuli ŭvahu na vialikuju varyjatyŭnaść «pieraviernutaha navučańnia». Pobač ź videaŭrokami vykarystoŭvajucca internet-błohi, tematyčnyja i prykładnyja zadačy, simulacyi, interaktyŭnyja demanstracyi i prezientacyi navučencaŭ. Sami zaniatki ŭklučali lekcyi, łabaratornyja raboty, nabory zadač, prablemnyja zadačy, debaty, sakrataŭski dyjałoh, rolevyja hulni, tematyčnyja daśledavańni, hrupavuju rabotu, razbor zadańniaŭ.

Z metaj vyvučeńnia charaktaru (aktyŭnaha ci pasiŭnaha) roznych zaniatkaŭ va ŭmovach «pieraviernutaha navučańnia» i kantrolu viedaŭ była raspracavanaja schiema kadavańnia. Heta było zroblena dla taho, kab vyjavić, ci sapraŭdy mietodyka «pieraviernutaha navučańnia» była realizavanaja tak, jak zadumvałasia (pasiŭnaje navučańnie pierad zaniatkam i nastupnaje aktyŭnaje navučańnie padčas zaniatku).

Što z «pieraviernutym navučańniem» nie tak

Analiz vyjaviŭ, što pry «pieraviernutym navučańni» pavialičvajecca čas na navučańnie ŭ paraŭnańni z tradycyjnym mietadam. Heta adbyvajecca za košt dabaŭleńnia papiaredniaj padrychtoŭki da zaniatkaŭ.

«Stanoŭčy ŭpłyŭ mietodyki na vynikovaść navučańnia moža być nastupstvam taho, što vučni traciać bolš času na vučebny materyjał. Adnak, kali čas na navučańnie patencyjna moža patłumačyć efiekty, to ci nie mahli b my dasiahnuć hetych efiektaŭ pry niaznačnym pavieličeńni času navučańnia dla tradycyjnaha mietadu?» — adznačajuć daśledčyki.

Pry hetym sami nastaŭniki i vykładčyki adznačali, što «pieraviernutaje navučańnie» patrabuje bolšych vydatkaŭ času pry padrychtoŭcy da zaniatkaŭ i ich supravadžeńni.

Daśledavańnie vyjaviła zvarotnuju zaležnaść pamiž aktyŭnaściu navučańnia i jaho vynikovaściu. Z rostam aktyŭnych formaŭ vynikovaść padała. Vučonyja tłumačać heta tym, što vykładčyki, jakija vykarystoŭvajuć «pieraviernutaje navučańnie», mała ŭvahi nadajuć praviercy taho, jak vučni zasvojvajuć materyjał.

Vučonyja taksama źviarnuli ŭvahu na toje, što vykarystańnie takich stratehij aktyŭnaha navučańnia, jak tematyčnyja daśledavańni, sakrataŭski dyjałoh i debaty, mieła bolšy efiekt, kali jany pravodzilisia ŭ adpaviednaści z tradycyjnymi instrukcyjami. Toje ž vučonyja zaŭvažyli i adnosna rehularnych viktaryn. Ich efiekt byŭ bolšy pry tradycyjnym navučańni. Mahčyma, heta tłumačycca tym, što pry «pieraviernutym navučańni» ŭdzieł u viktarynach nie zjaŭlajecca abaviazkovym.

«Upłyŭ na navučańnie abumoŭleny nie «pieraviernutym navučańniem» ci tradycyjnym navučańniem, a aktyŭnym navučańniem. Aktyŭnaje navučańnie, kali jano dobra sprajektavanaje, niezaležna ad taho, pieraviernutaje jano ci tradycyjnaje, efiektyŭnaje, i my pavinny na im skancentravacca», — adznačajuć daśledčyki.

Vučonyja pryjšli da vysnovy, što jakaść vykanańnia «pieraviernutaha navučańnia» nie adpaviadaje śćviardžeńniu ab tym, što aktyŭnaje navučańnie maje vyrašalnaje značeńnie dla jaho pośpiechu. «My nie tolki vyjavili nizkuju raspaŭsiudžanaść aktyŭnaha navučańnia ŭ realizacyi «pieraviernutaha navučańnia», ale i toje, što aktyŭnaje navučańnie, kali jano prysutničaje, nie ŭzmacniaje efiekt», — adznačajuć daśledčyki.

Vučonyja vyjavili, što važnaj častkaj «pieraviernutaha navučańnia» akazałasia lekcyja, jakaja zjaŭlajecca mietadam pasiŭnaha navučańnia. Pry hetym takaja forma navučańnia mieła najbolšy efiekt.

«Heta havoryć ab tym, što asnoŭnaj pieravahaj «pieraviernutaha navučańnia» moža stać dvajnoje ci pašyranaje znajomstva ź interpretacyjaj viedaŭ vykładčykam. Pry hetym nie abaviazkovaje aktyŭnaje ŭciahvańnie navučencaŭ», — adznačajuć vučonyja.

A voś papiaredniaja padrychtoŭka da łabaratornych, praktyčnych ci tematyčnych daśledavańniaŭ mieła mienšy efiekt.

Vučonyja taksama źviarnuli ŭvahu na toje, što pry «pieraviernutym navučańni» byŭ bolšy efiekt ad prymianieńnia stratehii pošuku rašeńnia prablemy da pačatku navučańnia.

Daśledavańni pakazvajuć, što navučencam časta nie ŭdajecca pravilna rašyć zadaču, bo jany jašče nie zasvoili kancepcyi. Adnak u toj miery, u jakoj jany mohuć hienieravać i daśledavać šmatlikija rašeńni prablemy, navat kali jany nie aptymalnyja ci nie pravilnyja, rychtuje ich da lepšaha zasvajeńnia materyjału.

Što treba źmianić

Niahledziačy na ŭsie pieraličanyja niedachopy, daśledčyki ličać, što «pieraviernutaje navučańnie» maje svaje pieravahi ŭ tym vypadku, kali jano staranna vykonvajecca, i prapanujuć svaju madel.

Jana składajecca z čatyroch krokaŭ, jakija jany nazvali «pravał, pieravarot, vypraŭleńnie i zvarotnaja suviaź».

Napačatku navučencam treba prapanavać dla rašeńnia prablemu ci zadaču. Rašeńnie, chutčej za ŭsio, nie budzie pravilnym. Ale jaho pošuk dazvolić nie tolki vykarystać najaŭnyja viedy, ale i vyjavić, jakich viedaŭ nie chapaje.

Na nastupnym etapie adbyvajecca papiaredniaje znajomstva z temaj. Navučency pa-za kłasam hladziać videa ci vyvučajuć materyjały, jakija ŭvodziać u temu budučaha zaniatku.

Treci etap adbyvajecca ŭ kłasie. Na im navučency dzielacca sposabami rašeńnia prablemy ci zadačy, paraŭnoŭvajuć heta ź viernym mietadam. Hety etap taksama ŭklučaje lekcyju. Padčas jaje vykładčyk daje adkazy na ŭsie pytańni i dapamahaje lepš razabracca ŭ temie.

Na apošnim etapie adbyvajecca zvarotnaja suviaź. Navučency i vykładčyk razam vyznačajuć, što jany vyvučyli i čaho dasiahnuli, a taksama nakolki hruntoŭna byŭ zasvojeny materyjał. Daśledčyki adznačajuć, što mienavita zvarotnaj suviazi nie chapaje «pieraviernutamu navučańniu».

Čytajcie jašče:

Jak škoły i himnazii buduć zaličvać dziaciej u 1-ja kłasy

Navukoŭcy: Pryhažejšyja studentki atrymlivajuć u anłajn-režymie horšyja adznaki, čym u aŭdytoryjach

U Biełarusi źbirajucca zakonam admianić mahčymaść navučańnia na movach nacmienšaściaŭ

Клас
6
Панылы сорам
3
Ха-ха
0
Ого
1
Сумна
0
Абуральна
3