Fiederalny ŭrad Hiermanii pierahladaje isnujučuju imihracyjnuju palityku na fonie niedachopu pracoŭnaj siły ŭ krainie. Zakonaprajekt, jaki ablehčyć ujezd u FRH kvalifikavanych śpiecyjalistaŭ z-za miažy, byŭ u sieradu ŭchvaleny Kabinietam ministraŭ Hiermanii. Ciapier jon pavinien prajści praz Bundestah (parłamient) i bundesrat (pradstaŭnictva fiederalnych ziamiel), piša Deutsche Welle.
Dakumient, padrychtavany ministram unutranych spraŭ Nensi Fiezier i ministram pracy Chubiertusam Chajlem, praduhledžvaje, siarod inšaha, uviadzieńnie novaj «karty mahčymaściaŭ» (Chancenkarte) ź sistemaj bałaŭ. Kryteryi, jakija ŭličvajucca pry padliku bałaŭ, uklučajuć kvalifikacyju, viedańnie niamieckaj movy, prafiesijny dośvied, suviaź z Hiermanijaj (naprykład, svajaki, jakija ŭžo pražyvajuć u krainie) i ŭzrost.
«Karta mahčymaściaŭ» daje adzin hod na pošuk pracy ŭ Hiermanii
Kab atrymać «kartu mahčymaściaŭ», dastatkova budzie vykanać try kryteryi, kazaŭ Chajl, raspaviadajučy pra płany ŭrada vosieńniu 2022 hoda. «Karta mahčymaściaŭ» daje kvalifikavanym zamiežnym śpiecyjalistam adzin hod na pošuk pracy ŭ Hiermanii. Kab šukalniki mahli finansava zabiaśpiečvać siabie na praciahu hetaha času, jana taksama daje mahčymaści dla padpracoŭki.
Novy zakonaprajekt źjaŭlajecca častkaj pakieta zakonaŭ, z dapamohaj jakich kirujučaja ŭ FRH kaalicyja imkniecca madernizavać zakanadaŭstva ŭ halinie imihracyi, afarmleńnia vidu na žycharstva i atrymańnia hramadzianstva. Pavodle acenak jaho aŭtaraŭ, imihracyja kvalifikavanych rabotnikaŭ z krain, jakija nie ŭvachodziać u Jeŭrasajuz, pavialičycca prykładna na 60000 čałaviek u hod, što amal udvaja pieravyšaje pakazčyki 2019 hoda, da pandemii COVID-19.
«Pracujem pa 10—12 hadzin». Biełaruskija zvarščyki pra žyćcio i hrošy na radzimie i ŭ Polščy
