Dźmitryj Marozaŭ, dyrektar pradpryjemstva «Miehasiła». Fota: megasila.by
Dźmitryj Marozaŭ uznačalvaje kampaniju «Miehasiła» z 2003 hoda. Heta adna z najbujniejšych kampanij u Vaŭkavyskim rajonie i adna z samych vialikich transpartnych kampanij Biełarusi. Na siońnia ŭ joj pracuje kala 200 čałaviek, a ŭ parku kala 80 aŭtamabilaŭ.
Dziaržaŭnyja ŚMI pieradavali, što ahulny abarot kampanii siahaŭ 50 miljonaŭ dalaraŭ.
30 vieraśnia 2021 hoda padpolny «Rabočy ruch» abvinavaciŭ kampaniju ŭ tym, što jana supracoŭničaje z łukašysckim režymam i dapamahaje pradpryjemstvu «Hrodna Azot» abychodzić sankcyi. A ŭ mai 2022 hoda Marozaŭ atrymaŭ miedal «Hanarovy rabotnik BAMAP» (ad Biełaruskaj asacyjacyi mižnarodnych aŭtapieravozčykaŭ), jaki vydajecca za dasiahnieńni ŭ transpartnaj halinie.
Ale ŭ vieraśni 2022 hoda na jaho pačali napadać prapahandysty. Na ich kanałach vyjšaŭ materyjał, u jakim «Miehasiłu» abvinavacili ŭ tym, što supracoŭniki kampanii «zabiaśpiečvali pratestoŭcaŭ prachaładžalnymi napojami», a Dźmitryj «zmušaŭ supracoŭnikaŭ kampanii sačyć za milicyjantami».
Dźmitryj Marozaŭ, dyrektar pradpryjemstva «Miehasiła». Fota: megasila.by
Užo ŭ studzieni 2023 hoda Dźmitryja zatrymali razam z usioj siamjoj. Pa viersii Kamiteta dziaržkantrolu — za niaspłatu 270 tysiač rubloŭ padatkaŭ u vyniku štučnaha drableńnia biznesu (artykuł 243 KK), ale admietna, što jaho adzinaha z usich zatrymanych pakinuli pad vartaj.
Paru dzion tamu pa ŭsich dziaržaŭnych kanałach vyjšła videa ź Dźmitryjem Marozavym — tak stała viadoma, što jamu «naviesili» artykuł 364 KK («Hvałt abo pahroza prymianieńnia hvałtu da pradstaŭnika ŭłady»), a sam mužčyna raspaviadaje, što ŭdzielničaŭ u pratestach. Prapahandysty zhadvajuć jaho imia ŭ navinie pra «vyjaŭleńnie ekstremistaŭ». Viadoma, što jon dahetul znachodzicca pad vartaj.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie jašče:
Kala 30 čałaviek zvolnili z adnoj arhanizacyi ŭ Hłybokim pa palityčnych matyvach
