Kali nie vijahra, to što?

Foto: pixabay.com

Pieršapačatkova, u 1996 hodzie, była adkrytaja jaho zdolnaść padaŭlać raźvićcio mietastazaŭ puchlinaŭ. Kiśpiepcin sintezujecca šmat u jakich orhanach: hipatałamusie, płacencie, nyrkach, padstraŭnikavaj załozie, piačoncy, kišečniku, aorcie, karanarnych arteryjach i pupočnaj vienie.

Dalejšyja daśledavańni adkryli važnuju rolu hetaha harmonu ŭ pracesie pałavoj dyfierencyjacyi, pałavoha saśpiavańnia, avulacyi, u padtrymcy stabilnaha abmienu rečyvaŭ i fiertylnaści.

Naprykład, daśledavańni na žyviołach pakazali, što ŭviadzieńnie kiśpiepcinu pryvodzić da zaŭčasnaha pałavoha saśpiavańnia. Hałandskija vučonyja ličać, što kiśpiepcin zdolny źbierahčy ad biaspłodnaści.

Viadoma, što źnižeńnie ŭzroŭniu kiśpiepcinu adbyvajecca z-za enierhietyčnaha deficytu, vyklikanaha praźmiernymi fizičnymi nahruzkami ci rezkim źnižeńniem vahi, a taksama praciahłaha stresu. Heta ŭ vyniku pryvodzić da źnižeńnia seksualnaha žadańnia, što akazvaje niehatyŭny ŭpłyŭ na adnosiny, psichičnaje zdaroŭje i naradžalnaść.

Kiśpiepcin stymuluje vykid inšych repradukcyjnych harmonaŭ u arhaniźmie. Zychodziačy z hetaha, brytanskija vučonyja vyrašyli daśledavać, ci mohuć injekcyi kiśpiepcinu ŭzmacnić seksualnyja reakcyi ŭ ludziej.

Spačatku byli praviedzienyja daśledavańni na mužčynach, u jakich seksualnaje žadańnie znachodziłasia ŭ normie. Vyniki pakazali, što kiśpiepcin moža ŭzmacniać reakcyju na seksualnyja razdražnialniki i stymulavać mazhavyja šlachi seksualnaha žadańnia, niezaležna ad inšych repradukcyjnych harmonaŭ, takich, jak testasteron.

Stanoŭčyja vyniki naviali na dumku vyprabavać terapiju kiśpiepcinam na ludziach, jakija ciarpiać ad takoha zachvorvańnia, jak parušeńnie aktyŭnaści seksualnaha žadańnia. Da hetaj hrupy adnosiacca da 10% žančyn i 8% mužčyn.

Byli praviedzienyja dva asobnyja daśledavańni: na mužčynach (32 čałavieki, siaredni ŭzrost 37,9 hoda) i na žančynach (32 čałavieki, siaredni ŭzrost 29,2 hoda). Ich vyniki apublikavanyja ŭ JAMA Network Open.

Udzielniki kožnaha daśledavańnia (adznačajecca, što ŭsie jany byli hieterasieksualnymi) byli padzielenyja na dźvie hrupy. Adna hrupa ŭ pieršy vizit atrymała ŭnutryvienna płaceba, a ŭ druhi vizit — kiśpiepcin. Udzielnikam druhoj spačatku byŭ uviedzieny harmon, a ŭ nastupny raz — płaceba. Daśledavańni z žančynami pravodzilisia z 1 pa 7 dzień mienstrualnaha cykłu.

Paśla ŭviadzieńnia rastvoru žančynam prapanoŭvałasia pahladzieć karotkija eratyčnyja videa i vykanać zadańnie na vyznačeńnie pryvabnaści asobaŭ na zdymkach. Mužčyny prahladali spačatku karotkija (20 siekund), a zatym bolš praciahłyja (8 chvilin) videa. Videa z pałavym aktam čarhavalisia ź videa, na jakim hieterasieksualnaja para zajmałasia sportam. Padčas hetaha pravodziłasia MRT-skanavańnie hałaŭnoha mozha. U mužčyn jašče nazirali za erekcyjaj.

Vyniki pakazali, što kiśpiepcin pavialičvaje aktyŭnaść centra seksualnaha žadańnia jak u mužčyn, tak i ŭ žančyn. Najbolšaje palapšeńnie było zaŭvažanaje ŭ tych, chto čaściej za ŭsio skardziŭsia na źnižeńnie libida. Akramia hetaha, byŭ vidavočny stanoŭčy ŭpłyŭ harmonu i na erektylnuju funkcyju ŭ mužčyn.

Žančyny adznačali, što paśla pryjomu hetaha niejraharmonu adčuvajuć siabie «seksualniejšymi». U svaju čarhu, mužčyny paviedamili, što jany stali adčuvać siabie bolš ščaślivymi ad seksu.

Vučonyja adznačajuć, što ŭ adroźnieńnie ad vijahry, jakaja dapamahaje pry impatencyi, kiśpiepcin uździejničaje na pracesy ŭ hałaŭnym mozhu, stymulujučy libida. Akramia hetaha, jon dobra pieranosicca i nie maje pabočnych efiektaŭ u adroźnieńnie ad isnujučych mietadaŭ lačeńnia dla žančyn, jakija vyznačajucca značnymi pabočnymi efiektami i abmiežavanaj efiektyŭnaściu. A dla mužčyn uvohule niama licenzavanych mietadaŭ lačeńnia. Tamu vučonyja bačać vialikuju budučyniu ŭ kliničnym prymianieńni kiśpiepcinu.