Karystalniki Twitter pažartavali, što jon moh padpisać kantrakt z madelnym ahienctvam. Post staŭ virusnym, piša vydańnie focus.ua.
«Syn Uładzimira Sałaŭjova Daniił Sałaŭjoŭ raspavioŭ, što pakul nie moža padpisać kantrakt ź Ministerstvam abarony Rasii i adpravicca na abaronu Danbasa, bo ŭ jaho ŭžo padpisany kantrakt z łondanskim madelnym ahienctvam», — skazana ŭ humarystyčnym tvicie. Jon źjaviŭsia na fonie zajaŭ Sałaŭjova-starejšaha pra toje, što na vajnu va Ukrainie treba adpraŭlać sałdat terminovaj słužby.
Televiadučy taksama viadomy svaimi rezkimi zajavami suprać ES i ZŠA, taksama na svaim šou jon zaklikaŭ udaryć pa jeŭrapiejskich stalicach rakietami. «Bierlin, Paryž, Łondan i Brusiel hatovyja hareć ad udaraŭ našych rakiet? A kali spatrebicca — ad vykarystańnia taktyčnaj jadziernaj zbroi?» — pytaŭsia Sałaŭjoŭ u efiry.
Fota Daniiła Sałaŭjova, jakoje razyšłosia pa sietcy, było zroblena ŭ ramkach rekłamnaj kampanii sałona pryhažości «Kantora Uładzisłava Lisaŭca». Sałon papularny siarod rasijskaha bamondu, siarod jaho klijentak — Kryścina Arbakajcie.
Va Uładzimira Sałaŭjova vaśmiora dziaciej, u tym liku jašče dva syny pryzyŭnoha ŭzrostu, ale jany, jak vidać, na front nie śpiašajucca.
Daniił — syn Sałaŭjova ad jaho treciaha šlubu z madellu Elhaj Sep, dačkoj humarysta Viktara Kakluškina. Pra jaho viadoma tolki toje, što jon skončyŭ prestyžnuju Łamanosaŭskuju škołu ŭ Maskvie.
Pra 34-hadovaha Alaksandra Sałaŭjova, syna viadučaha ad pieršaha šlubu, viadoma bolš: jon z 18 hadoŭ vučyŭsia ŭ Łondanie na režysiora. U Rasii Alaksandr Sałaŭjoŭ zdymaje rekłamnyja roliki. U pryvatnaści, jon zdymaŭ rekłamu dla dziaržaŭnaha Śbierbanka.
