Pa danych ratavalnikaŭ, kolkaść achviar u Turcyi da ranicy aŭtorka ŭzrasła da 3419. Jašče 20534 čałaviek atrymali ranieńni. U vyniku ziemlatrusaŭ 5775 budynkaŭ abrynulisia. U susiedniaj Siryi zahinuli prynamsi 1602 čałavieki, paviedamlaje Bi-bi-si.
Usiaho, pavodle acenak SAAZ, stychija mahła zakranuć 23 młn čałaviek, jakija pražyvajuć na paciarpiełaj terytoryi.
Try ziemlatrusy
Pieršy ziemlatrus mahnitudaj 7,8 adbyłosia ŭ 04:17 pa miascovym časie, ačah zalahaŭ na hłybini 17,9 km pablizu horada Hazijantep na paŭdniovym uschodzie Turcyi. Za im adbyłosia bolš za 40 afteršokaŭ.
Zatym prykładna ŭ 13:30 pa miascovym časie adbyŭsia druhi ziemlatrus mahnitudaj 7,5. Jaho epicentr znachodziŭsia ŭ rajonie Elbistan u paŭdniova-ŭschodnim tureckim rehijonie Kachramanmaraš.
U noč na aŭtorak (u 03:13 pa Hrynvičy) u centralnaj častcy Turcyi adbyŭsia jašče adzin mocny ziemlatrus.
Pavodle źviestak Hieałahičnaj słužby ZŠA, padziemnyja šturški mahnitudaj 5,5 adbylisia na hłybini 10 km pablizu horada Hałbasi. Jeŭrapiejska-mižziemnamorski siejsmałahičny centr acaniŭ mahnitudu ziemlatrusu ŭ 5,6.
Usiu noč praciahvałasia ratavalnaja apieracyja pa pošuku ludziej, jakija apynulisia pad zavałami paśla abvalvańnia tysiač budynkaŭ u abiedźviuch krainach u vyniku pieršych dvuch ziemlatrusaŭ u paniadziełak.
Ratavalniki zmahajucca z praliŭnym daždžom i śnieham, kab znajści tych, chto vyžyŭ.
