Mabilizavanyja z Tuvy zapisali videazvarot, u jakim paskardzilisia na samaŭpraŭstva vajskoŭcaŭ samaabvieščanaj «DNR» i vajennaj palicyi. Zvarot byŭ zapisany na tuvinskaj movie, jaho pierakład na ruskuju movu apublikavaŭ telehram-kanał «Azijaty Rasii».
Na videa stajać ludzi ŭ maskach i kamuflažnaj vopratcy. Adzin ź ich raspaviadaje, što ich mabilizavali 29 vieraśnia, try miesiacy jany prachodzili padrychtoŭku ŭ Navasibirsku. Ale ŭ vučebnaj častcy ich «nie navučali i nie rychtavali dla bajoŭ na pieradavoj».
29 śniežnia mabilizavanych adpravili ŭ Danieck, častku ź ich — na pieradavuju.
Paśla taho, jak niekalki vajskoŭcaŭ z Tuvy atrymali ranieńni, vyśvietliłasia, što ich nie prypisali ni da jakoha padraździaleńnia Minabarony Rasii, u ich «niama kamandavańnia».
Taksama tuvincy paskardzilisia na paboi i pahrozy z boku pradstaŭnikoŭ narodnaj milicyi tak zvanaj «DNR».
«4 lutaha 2023 hoda pryjechali vajskoŭcy z «DNR». U nas stralali aŭtamatami, prymušali adciskacca. Skazali, što my žyvymi adsiul nie vyjdziem. Kazali, što my adnosimsia da ich, da DNR… Vajskovaja palicyja pryjechała i pabiła nas», — zajaviŭ adzin z vajskoŭcaŭ.
U niejki momant videazvarot źmianiajecca kadrami z mabilnaha telefona, na jakich uzbrojenyja ludzi ŭ vajskovaj formie valać na ziamlu mužčynu ŭ kamuflažy, jaki staić pierad imi na kaleniach, i, vierahodna, źbivajuć.
Kiraŭnik Tuvy Uładzisłaŭ Chavałyh paprasiŭ staršyniu ŭrada samaabvieščanaj «DNR» Vitala Chacenku pravieryć zakonnaść dziejańniaŭ «narodnaj milicyi», zhadanyja ŭ videa, a taksama nakiravaŭ svaich pradstaŭnikoŭ u «DNR» dla «niepasrednaha razboru na miescy».
«Z usioj krainy ŭ ramkach častkovaj mabilizacyi baćki, mužyki, syny adpravilisia abaraniać ajčynu, vykonvać zadačy śpiecyjalnaj vajennaj apieracyi. Heta aburalny vypadak, jaki dyskredytuje stanovišča mabilizavanych», — skazaŭ kiraŭnik Tuvy.
«Pierapyniaju kamandziroŭku ŭ Sibiry i vylataju dla vyśviatleńnia abstavinaŭ. Armija — heta zaŭsiody paradak i dyscyplina. Biez prynižeńnia čałaviečaj hodnaści małodšych i adnačasova ŭśviadomlenaha padparadkavańnia kamandziram», — napisaŭ u telehram-kanale vice-śpikier Dziarždumy, były kiraŭnik Tuvy Kara-Aoł.
