Adkul uziałasia heta ideja? I čamu «Unutranaja mihracyja»?
Jak pryznajucca stvaralniki, hierainiami prajekta stali žančyny-majstrychi, žančyny-mastački, jakija vybudoŭvajuć madeli idealnaha Suśvietu ŭ miežach svaich chat. «Dziakujučy im na fonie šeraści i ciažkaści paślavajennaha adnaŭleńnia sialanskija interjery vybuchnuli sakavitymi vyšytymi, malavanymi i tkanymi «džunhlami» ź jaskravymi kvietkami, ekzatyčnymi žyviołami i fantastyčnymi istotami».
«Fotaprajekt «Unutranaja mihracyja» naradziŭsia jak vynik našych razvah pra toje, adkul u tutejšych žančyn znachodzilisia siły dla tvorčaści, adkul źjaviłasia patreba ŭ nievierahodnaj jaskravaści atačeńnia nasupierak zmročnaj rečaisnaści», — piša kamanda @by_kod na svajoj staroncy ŭ Instagram.
«Unutranaja mihracyja» — bo heta pošuk biaśpiečnych miežaŭ dla žančyny. «Heta dom u šyrokim sensie, siamja, jakija žančyna achoŭvaje ad mietafizičnych centrabiežnych sił. Vyšytyja kvietki, ekzatyčnyja kalarovyja ptuški, rajskija drevy — heta sproba zamianić chibny i zmročny vonkavy śviet idealizavanym i dobrazyčlivym śvietam znutry».
U kamientaryjach CityDog.io stvaralniki prajekta raskazali, što natchnialisia realnymi historyjami ŭłasnych babul i dziadul, asabistymi ekśpiedycyjnymi natatkami, knihami, a taksama ŭłasnym dośviedam pieraadoleńnia traŭmy.
«Mienavita hety dośvied i staŭ padmurkam hierojaŭ, ich charaktaraŭ, uzajemadziejańniaŭ. Heta psichałahičnyja partrety realnych ludziej ź ich realnymi niaprostymi losami».
«Zdymali ŭvosień prosta ŭ poli ŭ ekstremalnych umovach. Chutka ciamnieła, tamu šmat času na vystaŭleńnie kadra nie było. Zatoje praz umovy zmročnaja, niaŭtulnaja atmaśfiera pieradałasia naturalna. Było dosyć choładna, što asabliva adčuli madeli, i kab jany nie źmierźli ŭščent, my paili ich haračaj harbataj».
Jak jany heta rabili?
«Što da vyšyvak, to hetyja kampazicyi kvietak ź interjeraŭ sučasnych viaskovych chat Vietkaŭščyny i Uschodniaha Paleśsia, — raskazali stvaralniki prajekta CityDog.io. — Bukiety byli vyšytyja na navałačkach, praścinach, survetkach. Kopii vyšyvak atrymalisia dakładnyja, tolki što ŭ inšym maštabie. Možna skazać, što heta rekanstrukcyja.
Eskizy žanočaha kaściuma raspracoŭvalisia razam ź idejami vyšyŭki na ich. Kvietki ŭkładalisia ŭ kampazicyju ŭzdoŭž rukavoŭ i na hrudziach. Pa eskizach vyšyvalisia na raskrojenych frahmientach, potym usio źbirałasia ŭ kaścium.
Vyšyŭka, pa zadumie, pavinna była taksama ŭpryhožyć realnyja fotazdymki, tamu my intehravali fota vyšyŭki jak elemient na etapie apracoŭki fotazdymkaŭ prajekta».
Chto pracavaŭ nad prajektam «Unutranaja mihracyja/In-Migration»
Aŭtary kancepcyi i dyzajnu vopratki: kamanda @by_kod
Aŭtary vyšyvanych uzoraŭ: babuli Homielščyny
Vyšyŭka: @aksini9
Pašyŭ vopratki: @old_clobbers
Fotazdymki: @katya_kilyakova
Madeli: @bug_of_evol, @zhenechka_prischepova
Čytajcie taksama:
Harderob vykładčycy teatralnaj studyi: kalekcyja minijaciurnych i dziŭnych sumak — i prosta pryhožyja dy ramantyčnyja ŭbory
«Dalej u płanach — skaryć Ńju-Jork». Raboty hetaj biełaruskaj kieramistki stajać u tajvańskim muziei i ŭ pryvatnych kalekcyjach pa ŭsim śviecie
