Skryn ź videa
Viadučy kanała Illa Malinoŭski zapytaŭsia ŭ ekanamista, ci moža ŭviadzieńnie stoli cenaŭ na rasijskija enierharesursy niejkim čynam źmianić chod vajny?
— Kali dumać pra heta jak pra zbroju, što voś my kinuli bombu i ŭ hetym miescy nie zastałosia nijakich umacavańniaŭ, źniščanyja varožyja samaloty, to nie, takich ekanamičnych mier niama, jakija dziejničajuć jak bomba.
Ale kali dumać pra heta jak pra toje, što ŭskładniaje Rasii viadzieńnie vajny, pavialičvaje vydatki, to tak, hetyja miery tak dziejničajuć, i ŭ hetym sensie jany dapamahajuć.
Malinoŭski ŭdakładniŭ, ci mohuć sankcyi suprać Rasii adbicca na padtrymcy rasijskim režymam biełaruskaha, ci moža jany pamienšać hetuju padtrymku?
Sonin skazaŭ, što heta vialikaje pytańnie, ci zaležyć ciapier Biełaruś ekanamična ad Rasii, heta, pavodle jaho, užo nie tak zrazumieła.
— Vidavočna, što ad Rasii i ad padtrymki Rasii zaležyć Łukašenka i jahonyja siłaviki. Ale ci šmat ciapier Biełaruś, biełaruskija hramadzianie, pradpryjemstvy atrymlivajuć ad Rasii? Ja zusim nie ŭpeŭnieny. Ciapier užo dapamoha pierajšła prosta ŭ hrošy Łukašenku i siłavikam, i heta ŭsia dapamoha i jość. Heta značyć,
ad źnižeńnia dapamohi Rasii, ad ekanamičnych ciažkaściaŭ Rasii pacierpiać tolki Łukašenka, jahonyja siłaviki, ale nie biełarusy.
Illa Malinoŭski raspavioŭ, što praciŭniki režymu paśla 2020 hoda ŭskładali nadziei na toje, što sankcyi dapamohuć źmianić režym u Biełarusi.
— Jość Paŭnočnaja Kareja, jakaja całkam zabłakavanaja, i adnak ža jana nie abvalvajecca. Što takoje abvalvacca? Kali my heta ŭjaŭlajem, jak u filmach pra Džejmsa Bonda, što prosta voś damy padajuć, tramvai pierastajuć chadzić, to ŭspomnicie ekanamičny kryzis 30 hadoŭ tamu, kali razvaliŭsia Saviecki Sajuz. Byŭ najciažejšy ekanamičny kryzis, u mirny čas takich spadaŭ pramysłovaści, takich spadaŭ dachodaŭ praktyčna nie byvaje, i tym nie mienš, heta nie značyć, što tramvai pierastali chadzić. Palikliniki ŭsio roŭna pracavali, usio padaražeła, ale heta nie značyć, što ludzi stali pamirać ad hoładu.
Sonin kaža, što ŭpeŭnieny: navat kali pa miažy Biełarusi vybudavać ścianu, žyćcio ŭsio roŭna budzie praciahvacca.
«I nie tolki ludzi buduć vyroščvać harodninu na prysiadzibnych učastkach, ale buduć i daktary pracavać, i teatry buduć pracavać. Usio budzie horš, usim budzie składaniej, usie buduć adčuvać siabie bolš niaščasnymi, budzie drenna, ale heta nie značyć, što ŭsio spynicca».
Ilustracyjnaje fota. Skrynšot ź videa ź jutub-kanała «Rudabielskaja pakazucha»
Na pytańnie, dzie miaža kiepskaha ŭzroŭniu žyćcia, paśla jakoj mahli b pačacca pratesty suprać takoha stanovišča, Sonin skazaŭ:
— Na žal, adkaz ekanamista taki, što niama takoha ekanamičnaha ŭzroŭniu.
Sonin pryvodzić u prykład isłamski režym u Iranie, jaki, ź jahonych słoŭ, «akramia ŭsiaho inšaha, akramia svajoj žorstkaści, adstałaści, archaičnaści, jašče i vielmi niaŭdałaje kiraŭnictva ŭ płanie ekanomiki».
— Ludzi pry isłamistach ciapier žyvuć hetak ža, jak jany žyli pry šachu 50 hadoŭ tamu. To-bok jany sapraŭdy vielmi mocna adstali ad śvietu. I voś u ich ciapier iduć šmat miesiacaŭ davoli mahutnyja pratesty.
Ale akazvajecca, što ekanamičnaja adstałaść, jana navat pracuje na karyść isłamistaŭ (u dadzienym vypadku). Bo kraina takaja adstałaja, što navat toje, što ludzi pratestujuć zamiest taho, kab pracavać, heta ŭsio roŭna nie źnižaje ŭzroŭniu žyćcia, tamu što tam niama čamu asabliva źnižacca.
I ŭ hetym sensie takaja moža być pastka: situacyja ekanamičnaja horšaje, ale ludzi pratestujuć navat mienš. Bo ty pratestuješ, i što? Ad hetaha ničoha nie mianiajecca, a siłaviki stanoviacca tolki bolš žorstkija. Tamu ja voś takoj pramoj suviazi nie čakaŭ by, što situacyja ekanamična stanovicca horšaja — i režym razvalvajecca.
Na pytańnie, čamu, u adroźnieńnie ad Rasii, suprać Biełarusi Jeŭrasajuz nie ŭvodzić sankcyi ŭ suviazi z vajnoj, Sonin kaža, što i Ukrainie, i Jeŭropie važna zachoŭvać status-kvo, kali Biełaruś nie ŭdzielničaje aktyŭna ŭ vajnie.
— Tamu što navat kali biełaruskija siły nie vielmi vialikija, ale kali Biełaruś budzie ŭdzielničać u vajnie, Ukrainie budzie ciažej.
Z toj ža pryčyny, mnie zdajecca, ukrainski ŭrad i nie pryznaje Śviatłanu Cichanoŭskuju lehitymnym kiraŭnikom Biełarusi. Ja dumaju, jany rychtujuć heta na toj momant, kali Biełaruś ustupić u vajnu.
Tady jany ŭžo pryznajuć, i nie tolki, ja dumaju, ukrainski ŭrad, ale i mnohija ŭrady ŭ śviecie.
