Rakieta Ch-22. Fota ilustracyjnaje
Zvyčajna SPA USU pierachoplivaje kryłatyja rakiety «Kalibr», Ch-55, Ch-101 abo drony «Šachied». Heta davoli roznyja celi, ale ŭ ich jość adna ahulnaja rysa — jany pavolnyja, niebalistyčnyja i lotajuć nizka. Heta značyć, da ich lohka dastać supraćrakietaj, jany nie padajuć źvierchu, i jość davoli šmat času na ich pierachop.
Jašče adna akaličnaść — marskija kryłatyja rakiety «Kalibr» zapuskajuć zdalok. Pusk davoli lohka adsočvajecca, paśla čaho, z ulikam nievysokaj chutkaści palotu rakiety (kala 900 km/h), u SPA chapaje času na toje, kab bolš-mienš dakładna raźličyć trajektoryju jaje palotu.
Pusk «Šachieda» adsačyć ciažej, jaho možna zapuskać bližej da linii frontu, ale jon i lacić zusim pavolna, tak što pieradavyja pasty abo navat zvyčajnyja ludzi sa smartfonami davoli chutka ich zasiakajuć.
U adroźnieńnie ad ich, Ch-22 lacić na vielmi vialikaj vyšyni — ad 22 da 25 km. Pry hetym na takoj vyšyni jana raźvivaje vielmi vysokuju chutkaść — 3,5 — 4,6 macha. Heta rakieta pavietranaha bazavańnia, što aznačaje, što jaje možna zapuskać, padlatajučy davoli blizka da zony dziejańnia SPA, — va ŭkrainskich zienitčykaŭ prosta nie zastajecca času na toje, kab padrychtavacca da jaje pierachopu. Na zaklučnym etapie palotu rakieta źnižajecca ŭ kirunku da celi, ale hety etap praciahvajecca ŭsiaho 50-60 kiłamietraŭ.
Tearetyčna pierachapić Ch-22 moh by amierykanski ZRK Patriot z rakietaj PAK-2, ale dla hetaj rakiety 25 kiłamietraŭ — stol. Bolš manieŭranaja i dakładnaja, ale mienš vyšynnaja rakieta PAK-3 źbivaje celi na vyšyni maksimum 20 kiłamietraŭ. Akramia taho, u hetych rakiet-pierachopnikaŭ dalokaść dziejańnia abmiežavanaja dziasiatkami kiłamietraŭ. Adzin kompleks zatulaje ŭ vypadku z PAK-2 kruh radyusam u 160 km, a ŭ vypadku z PAK-3 — i zusim u 40 km. A hałoŭnaje — Ukrainie pakul abiacanyja tolki dźvie batarei, jakija nie zastupili na bajavoje dziažurstva.
Dla inšych sučasnych zachodnich ZRK — Iris-T SLM, naprykład, Ch-22 taksama zastajecca vielmi ciažkaj cellu z-za chutkaści i vyšyni. Hety kompleks dziejničaje na vyšyniach da 20 km i addalenaści da 40 km. NASAMS, u zaležnaści ad rakiety, moža pracavać pa celach na adlehłaści da 180 km, ale jaho stol taksama abmiežavanaja 20 kiłamietrami.
Zrazumieła, aceńvać realnyja mahčymaści SPA na asnovie charaktarystyk ZRK składana, tamu što jość šmat inšych abstavin, jakija ŭpłyvajuć na vynikovaść ich pracy. Ale ŭ kožnym razie vidavočna, što ŭsie hetyja sistemy, navat samaja dalokaja i vyšynnaja viersija Patriot, kali mierkavać pa ich taktyka-techničnych charaktarystykach, suprać X-22 buduć dziejničać albo na miažy svaich mahčymaściaŭ, albo i zusim nie zmohuć «dastać» hetuju rakietu ŭ niebie.
U amierykancaŭ jość stratehičnaja ZRK Thaad z dalokaściu 200 km i stollu ŭ 150 km. ZŠA ŭ pryncypie pastaŭlajuć jaje na ekspart, ale razmoŭ ab pastaŭkach va Ukrainu havorki pakul nie išło. Uzbrojenyja siły Ukrainy taksama zajavili, što nie majuć ahniavych srodkaŭ, zdolnych źbivać rakiety Ch-22.
Čytajcie taksama:
Arastovič patłumačyŭ svaju zajavu pra toje, što rakietu ŭ Dniapry źbiła SPA
Mer Dniapra zaklikaŭ SBU adreahavać na słovy Arastoviča pra rakietu
Udar pa Dniapry: kolkaść achviar vyrasła da 21, ukrainskija SPA nie źbivali rakietu
«Jaje źbili. Jana ŭpała na padjezd». Arastovič zajaviŭ, što rakieta ŭ Dniapry, jakaja trapiła ŭ šmatpaviarchovik, była źbitaja SPA
