Razam z tym ekśpierty Instytuta ličać, što «vierahodny zachop Saladara 11 studzienia nie źjaŭlajecca apieratyŭna-važnym raźvićciom situacyi — i jon naŭrad ci pradvieścić chutkaje rasijskaje akružeńnie Bachmuta».

U zvodcy ISW adznačajecca, što ŭ čaćvier Hienieralny štab USU paviedamlaŭ ab adbićci rasijskich atak u nasielenym punkcie Sol, jaki raźmieščany prykładna za kiłamietr na paŭnočny zachad ad Saladara. Adnak, u adroźnieńnie ad papiarednich dzion, ukrainskija vajskoŭcy nie kazali, što im udałosia adbić nastup na sam Saladar.

Pry hetym rasijskija krynicy pisali, što vojska RF zaviaršaje začystku Saladara, a ŭ telehram-kanałach vajskovych błohieraŭ publikavalisia kadry, na jakich bajcy PVK «Vahnier» chodziać pa vulicach horada.

«Usie dastupnyja śviedčańni kažuć pra toje, što ŭkrainskija siły bolš nie padtrymlivajuć arhanizavanuju abaronu Saladara», — zaklučajuć ekśpierty ISW.

Adnak pry hetym jany ličać, što ŭ vyniku «rasijskich infarmacyjnych apieracyj važnaść Saladara pierabolšvałasia», i nazyvajuć jaho ŭziaćcie «ŭ samym lepšym vypadku taktyčnaj piravaj pieramohaj Rasii».

«ISW pa-raniejšamu ličyć, što zachop Saladara — nasielenaha punkta płoščaj kala 14,2 kv. km — nie dazvolić rasijskim siłam ustalavać kantrol nad krytyčna važnymi ŭkrainskimi linijami naziemnaj kamunikacyi z Bachmutam i nie pastavić ich u bolš vyhadnuju pazicyju dla akružeńnia horada ŭ karotkaterminovaj pierśpiektyvie», — skazana ŭ zvodcy.

Ekśpierty ISW praciahvajuć, što armii RF, «vierahodna, udałosia zachapić Saladar, nakiravaŭšy značnyja resursy na dasiahnieńnie taktyčnaha pośpiechu, jaki źniasiliŭ» ich, i heta «paskoryć kulminacyju rasijskich sił, jakija stracili značnyja siły kala Bachmuta».

«Rasijskija siły mohuć pasprabavać padtrymlivać vysoki temp napadaŭ u rajonie Bachmuta, ale hetyja namahańni nie pryviaduć da apieratyŭna-značnych vynikaŭ, tak jak jany stracili bajavuju siłu i nazapasili źniasilenaść», — skazana ŭ zvodcy ISW.

Клас
2
Панылы сорам
0
Ха-ха
1
Ого
0
Сумна
9
Абуральна
6