— Na praciahu śviatkavańnia Novaha hoda i Kalad my zvyčajna dazvalajem sabie šmat lišniaha: šmat pjom, jadzim, nie śpim pa načach i adsypajemsia dniom. My zabylisia pra dyjetu, zdarovy ład žyćcia i fizkulturu. Ale prychodzić čas viartacca ŭ zvykły rytm žyćcia, i, na žal, nie zaŭsiody heta lohka zrabić biez padrychtoŭki. Časta heta pahražaje źnižeńniem nastroju i tryvožnaściu, — raspaviała S. Kaŭryha.
Niezdarma ŭžo niekalki hadoŭ aktyŭna abmiarkoŭvajecca paniaćcie «postśviatočnaja depresija». Mnohija paśla doŭhich kanikuł nie adčuvajuć siabie badziorymi i poŭnymi sił, a, naadvarot, skardziacca na maralnaje i fizičnaje źniasileńnie, doŭha nie mohuć pryjści ŭ siabie. Jak patłumačyła śpiecyjalist, usia biada ŭ tym, što ŭ nas zaciažnyja śviaty i iniercyja nastolki vialikaja, što my nie paśpiavajem ad ich adyści da pačatku budniaŭ. Jak maleńkaje dzicia choča spać, ale nie moža zasnuć, tak i darosłyja nie mohuć spynicca i adyści ad razhulnaha ładu žyćcia.
Ludzi sprabujuć u hetyja dni adarvacca na ŭsiu katušku, pryčym u Novy hod jašče i stvarajecca ŭsieahulnaja panika, što treba pavinšavać usich i paśpieć davieści da kanca niezavieršanyja spravy. Bo heta čas, kali pryniata padvodzić vyniki, a jany nie zaŭsiody adpaviadajuć čakańniam. Kali čałaviek nie paśpieŭ darabić niešta, to heta pieraškadžaje jamu adčuvać siabie ščaślivym. Jon nie zadavoleny saboj.
— Nam jašče varta razabracca ŭ adnym važnym pytańni: čamu nie chočacca pracavać.
Z adnaho boku, čałaviek moža prosta lenavacca paśla doŭhich vychadnych, jamu nieabchodna znajści matyvacyju i ruchacca da jaje ŭvasableńnia. Z druhoha — mahčyma, jon uvieś hety čas zajmajecca nie svajoj spravaj. Adkul jamu ŭziać matyvacyju, jakaja nie znachodziłasia apošnija 10 hadoŭ? Kali davodzicca ŭ pramym sensie prymušać siabie, to, vierahodna, treba pierahledzieć žyćcio i razabracca, što mienavita niapravilna, — paraiła S. Kaŭryha.
Chutka pryjści ŭ normu i ŭ pracoŭny nastroj dapamohuć pravilnaje charčavańnie i sport, tamu što pryčynaj drennaha samaadčuvańnia mohuć być ałkahol i niazvykłyja nam nie zusim karysnyja pradukty, źjedzienyja za śviatočnym stałom.
Fizičnaja aktyŭnaść dapamahaje padniać nastroj i spryjaje vykidu ŭ kroŭ endarfinu — harmonu ščaścia. Taksama treniroŭki vypracoŭvajuć samaarhanizacyju i dyscyplinu.
— Kali chočacie pachudzieć paśla śviataŭ, to ni ŭ jakim razie nie siadajcie na strohija dyjety, tak jak jany tolki pravakujuć nabor vahi ŭ dalejšym. Lepš za ŭsio vyklučyć niekalki hrup praduktaŭ sa svajho racyjonu, astatniaje ž jeści biez zhryzot sumleńnia. Pažadana admovicca ad cukru, łasunkaŭ i biełaha chleba abo naohuł luboj vypiečki, — dadała S. Kaŭryha.
Navahodnija śviaty prajšli, ale heta nie aznačaje, što ŭsie ščaślivyja padziei zastalisia ŭ minułym.
Možna radavać siabie štodnia, niezaležna ad daty ŭ kalendary.
Naprykład, zapłanavać mierapryjemstvy, jakija prynosiać zadavalnieńnie: prajścisia pa kramach, pahutaryć ź siabrami, naviedać kancert i h. d. Vielmi časta naš nastroj paśla śviataŭ na nuli mienavita tamu, što my abmiažoŭvajem siabie ŭ pazityvie, z hałavoj apuskajučysia ŭ šeryja pracoŭnyja budni.
