Što viadoma ab novym varyjancie Covid XBB.1.5 11

Fota: Rick Bowmer, AP

U śviecie pačaŭ raspaŭsiudžvacca novy štam karanavirusnaj infiekcyi XBB.1.5., jaki ŭžo atrymaŭ nazvu «Krakien». Pieršyja fakty zachvorvańniaŭ, źviazanyja z novym štamam, byli vyjaŭlenyja jašče ŭ śniežni 2022 hoda ŭ Vialikabrytanii, adnak siońnia «Krakien» imkliva raspaŭsiudžvajecca pa śviecie i asabliva ŭ ZŠA, dzie jon usiaho za niekalki tydniaŭ staŭ pieravažać (XBB.1.5. užo składaje bolš za 40% siarod novych vyjaŭlenych vypadkaŭ karanavirusu).

Dalej raskažam pra asnoŭnyja momanty i ryzyku, źviazanyja z «Krakienam».

Covid XBB.1.5. — heta jašče adna raznavidnaść amikronu, jaki ŭ svaju čarhu sam źjaviŭsia paśla takich varyjacyj kavidu, jak alfa, beta, hama i delta.

Sam amikron, jaki źjaviŭsia ŭ kancy 2021 hoda, pieraŭzyšoŭ usie papiarednija viersii karanavirusu: padvidy amikronu bolš zaraznyja, čym jon sam.

Ličycca, što simptomy XBB.1.5. anałahičnyja simptomam papiarednich štamaŭ amikronu, ale ŭpeŭniena pra heta havaryć jašče zanadta rana. Siońnia da najbolš raspaŭsiudžanych simptomaŭ karanavirusnych raznavidnaściaŭ adnosiać nastupnyja:

• Anhina
• Nasmark
• Zakładzienaść nosa
• Čchańnie
• Kašal ź i biez makroty
• Hałaŭny bol
• Achrypłaść hołasu
• Boli ŭ ciahlicach
• Źmienieny niuch.

Niezadoŭha da źjaŭleńnia XBB.1.5. isnavaŭ zvyčajny XBB, jaki pačaŭ cyrkulavać u Vialikabrytanii ŭ vieraśni 2022 hoda, ale tady jon nie byŭ kłasifikavany orhanami achovy zdaroŭja jak «varyjant, jaki vyklikaje zakłapočanaść».

Pa słovach prafiesara Vendzi Barkłaj ź Impierskaha kaledža Łondana, u zvyčajnaj varyjacyi XBB była mutacyja, jakaja dapamahła jamu pieramahčy imunnuju sistemu arhanizma, ale hetaja ž jakaść taksama źnižała jaho zdolnaść zaražać kletki čałavieka. Ale ŭžo ŭ novym XBB.1.5. hetaha defiektu niama, bo jaho mutacyja, viadomaja jak F486P, zdolnaja rujnavać imunitet čałavieka, nie achviarujučy svajoj zaraznaściu. Heta značna palahčaje jaho raspaŭsiudžvańnie.

Taksama jana dadała, što hetyja źmieny byli padobnyja da «prystupak», bo virus evalucyjanuje, kab znajści novyja sposaby abychodu miechanizmaŭ samaabarony arhanizma.

4 studzienia navukoŭcy z Suśvietnaj arhanizacyi achovy zdaroŭja (SAAZ) paćvierdzili, što «Krakien» maje «pieravahu ŭ roście» i siońnia źjaŭlajecca samym zaraznym u paraŭnańni z usimi inšymi štamami karanavirusu. Pa źviestkach arhanizacyi, «Krakien» užo byŭ vyjaŭleny ŭ 29 krainach śvietu, ale jon moža cyrkulavać u značna bolšaj kolkaści krain. Taksama ŭ SAAZ adznačyli, što novy XBB.1.5. zdolny vyklikać jašče adnu karanavirusnuju pandemiju.

«My zaniepakojenyja jaho raspaŭsiudžvańniem, u pryvatnaści, u niekatorych krainach Jeŭropy i paŭnočna-ŭschodniaj častcy ZŠA, dzie XBB.1.5. chutka zamianiŭ inšyja isnujučyja varyjanty», — paviedamiła Maryja Van Kierchavie, pradstaŭnik SAAZ.

Pry hetym u SAAZ zajavili, što arhanizacyja pracuje nad analizam ciažkaści praciakańnia novaha štamu, vyniki abiacajuć apublikavać u najbližejšyja dni. Taksama było adznačana, što ciapier niama nijakich prykmiet taho, što «Krakien» bolš niebiaśpiečny, čym papiarednija varyjanty amikronu.

Čytajcie taksama:

Hetaj zimoj da hrypu moža dałučycca streptakok

Łukašenka: «Nichto tak u śviecie nie spraviŭsia z karanavirusam, jak u Biełarusi». Nasamreč śmiarotnaść u Biełarusi najbolšaja ŭ paraŭnańni z susiedziami

Brytaniec chvareŭ na karanavirus bolš za hod i ŭrešcie ačuniaŭ

5

3

2

16

6

15

Nashaniva.com