Karekciroŭcy paddajucca 99% aŭtamabilaŭ
Adnym z hałoŭnych pakazčykaŭ, jaki ŭpłyvaje nie tolki na stan aŭtamabila, ale i na jahony košt, źjaŭlajecca prabieh. Praz heta pakazčyki adomietra niaredka padviarhajucca karekciroŭcy. Niahledziačy na toje, što heta vidavočny padman, akazańnie takich pasłuh źjaŭlajecca zakonnym.
Karekciroŭcy paddajucca 99% madelej aŭtamabilaŭ. Hałoŭnaje — znajści adpaviednaha śpiecyjalista i być hatovym jamu za heta zapłacić.
Košt pasłuh pa «amaładžeńni» zaležyć ad marki i madeli aŭtamabila, a taksama ad hłybini ačystki infarmacyi. Ceny na takija pasłuhi pačynajucca z 20 dalaraŭ i dachodziać da niekalki sotniaŭ. Dla mnohich mašyn na vybar dasiažnyja dva varyjanty skrutki prabiehu — biudžetny, kali pakazčyki źmianiajuć tolki na adomietry, i bolš darahi, kali danyja ab prabiehu źmianiajuć va ŭsich elektronnych błokach, dzie zachoŭvajecca infarmacyja.
Atrymlivajecca, što kali pradaviec vyrašyŭ sekanomić na skrutcy, to, źviarnuŭšysia pa dapamohu da śpiecyjalistaŭ pa kampjutarnaj dyjahnostycy, u vas atrymajecca daviedacca praŭdu.
Kali ž pradaviec abraŭ varyjant «hłybokaha amaładžeńnia», to daviedacca pra sapraŭdny stan, prynamsi, elektronnym šlacham, budzie niemahčyma.
Adsiul vynikaje, što kampjutarnaja dyjahnostyka choć i karysny sposab zaścierahčy siabie pry kupli aŭto, ale daloka nie 100%-ny varyjant abarony. Tym nie mienš, admaŭlacca ad takoha sposabu pravierki nie varta, pakolki akramia aryhinalnaści prabiehu dyjahnostyka dapamoža pravieryć mnostva inšych pakazčykaŭ, asabliva kali havorka idzie pra aŭto, nie starejšyja za 10—15 hadoŭ.
Što datyčyć prabiehu, śpiecyjalisty śćviardžajuć, što praściej za ŭsio biasśledna «skrucić» jaho možna ŭ aŭtamabilach japonskich vytvorcaŭ, kancerna GM, a taksama ŭ biudžetnikach rasijskaj vytvorčaści. Składaniej za ŭsio iduć spravy sa śviežymi Volvo.
Taksama majstry pa karekciroŭcy prabiehu adznačajuć, što siarod pierakupaŭ papularna zapuskać čutki, nibyta ŭ śviežych aŭtamabilach prabieh adkrucić niemahčyma, tamu jon abaviazkova pavinien być «rodny». Śpiecyjalisty ž śćviardžajuć advarotnaje: niahledziačy na papularnyja mify, jak «śviežyja» BMW, tak i VAGi z elektronnymi prybornymi panelami paddajucca karekciroŭcy prabiehu.
Jak jašče možna pravieryć aryhinalnaść prabiehu?
Pravieryć praŭdzivaść pakazčykaŭ adomietra možna nie tolki pry dapamozie kampjutarnaj dyjahnostyki. Danyja ab prabiehu aŭtamabila čaściakom traplajuć adrazu ŭ niekalki baz danych. Naprykład, kali aŭtamabil absłuhoŭvaŭsia ŭ aficyjnaha dylera, to ŭ jaho bazie zastajecca infarmacyja ab usich vizitach, praviedzienych ramontach i prabiehu na momant zvarotu ŭ servis. Zamović padobnuju spravazdaču možna, naprykład, na sajcie ka.by, tam ža možna pravieryć historyju aŭtamabilaŭ, nabytych na aŭkcyjonie ŭ Jeŭropie. (Pa danych stvaralnikaŭ servisu, bolš za tracinu aŭto, pryviezienych ź Jeŭropy ŭ Biełaruś, pradajuć sa skručanym prabieham).
Taksama pradadzienyja na jeŭrapiejskich aŭkcyjonach aŭto možna biaspłatna pravieryć na sajcie vf.vin, ubiŭšy ŭ radok pošuku VIN-numar. Kali aŭtamabil pradadzieny praz aŭkcyjon, to vy ŭbačycie datu prodažu, jaho fota na momant realizacyi i aktualnyja danyja prabiehu.
Aproč hetaha, pravieryć historyju aŭto ź Jeŭropy možna, kupiŭšy płatnuju spravazdaču ad carvertical.
Jak pravieryć aŭto z ZŠA?
Kali havorka idzie pra aŭtamabil, nabyty na aŭkcyjonie ŭ ZŠA, to daviedacca pra jaho stan na momant prodažu možna, prosta ŭvioŭšy VIN u pošukaviku.
Važna: sajty, jakija zachoŭvajuć padobnuju infarmacyju, heta ŭ pieršuju čarhu biznes. Tamu za peŭnuju płatu (400—600$) pradaviec moža vydalić usiu infarmacyju ź internetu. Kali vy nabyvajecie mašynu z ZŠA i pry ŭvodzie numara kuzava vam nie vydaje nijakaj infarmacyi ab kankretnym aŭto, možacie być na 99% upeŭnienym, što aŭtamabil «adbialili».
Pravieryć historyju taksama možna, kupiŭšy spravazdaču Carfax. Jana zachoŭvaje danyja ab kolkaści ŭładalnikaŭ, vizitach na STA, najaŭnaści avaryjnaha minułaha i h.d. Fota aŭtamabila da adnaŭleńnia vy ŭ joj nie ŭbačycie, ale zatoje budziecie viedać, jakaja častka mašyny paciarpieła pry DTZ, a taksama ci nie źjaŭlajecca aŭtamabil «taplakom».
Adznačym, što čym starejšy aŭtamabil, tym składaniej pravieryć aryhinalnaść pakazańniaŭ adomietra. Prabiehi pamianšajuć nie tolki ŭ śviežych aŭtamabilach, ale i ŭ dosyć uzrostavych. Za svaju historyju ekspłuatacyi ŭ Biełarusi adna i taja ž mašyna moža prajści praceduru «amaładžeńnia» nie adzin raz.
Pravierka historyi ŭ Biełarusi i RF
Pravieryć historyju aŭtamabilaŭ, jakija doŭha ekspłuatujucca ŭ Biełarusi ci RF, možna praz płatny servis av.by/vin. Spravazdača źmiaščaje infarmacyju ab aŭto, jakija kali-niebudź byli zarehistravanyja nie tolki ŭ Biełarusi, ale i Rasii. Što nie małavažna, servis ad av.by dapamoža znajści staryja abjavy ab prodažy aŭto na sajcie (kali raniej pradaviec pakazvaŭ praŭdzivy VIN).
Naŭmysna ŭkazvajuć falšyvy VIN
Jak bačym, majučy VIN-numar, my možam atrymać davoli šmat infarmacyi pra aŭtamabil, nie ŭstajučy z kanapy. Naturalna, što ab hetym vydatna viedajuć niadobrasumlennyja pradaŭcy, tamu časam jany naŭmysna paznačajuć u abjavie VIN-numar z pamyłkaj albo biaruć jaho ad padobnaha aŭto z prazrystaj historyjaj. Kab nie zhubicca na hetym momancie, prasicie dasłać fota techpašparta albo samoha numara na kuzavie aŭtamabila.
«Pamylajucca» ŭ apisańni hoda vypusku
Akramia manipulacyj z prabieham, pradaŭcy časta paznačajuć u abjavie nie adpaviedny realnamu hod vypusku aŭtamabila. Heta robicca jak dla taho, kab pakupnik, jaki abmiažoŭvaje ŭzrost aŭto ŭ paramietrach pošuku, moh ubačyć jaho abjavu, tak i dla sproby pradać aŭto pad vyhladam bolš śviežaha. Jak praviła, takija niesastykoŭki pakupnik zaŭvažaje tolki padčas ahladu aŭto ŭžyvuju albo ŭžo padčas pierarehistracyi ŭ DAI. Tamu, kab nie patrapić u niepryjemnuju situacyju, zaŭsiody ŭdakładniajcie, jaki hod vypusku paznačany ŭ techpašparcie.
Darečy, pa takoj ža schiemie adbyvajecca i padman z prabieham. Časam pradaŭcy mohuć pakazać u abjavie mienšy prabieh, čym jość na adomietry. Jak i ŭ vypadku z ukazańniem falšyvaha ŭzrostu, heta dapamahaje im prachodzić pad bolš pryvabnyja pakazčyki pry pošuku abjavaŭ. Časam takija manipulacyi bačnyja padčas prahladu fota, kali vyjaŭlajecca, što paznačany prabieh u apisańni źlohku mienšy, čym adlustroŭvajecca na ščytku pryboraŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Chutka kuplać i pradavać aŭtamabili treba budzie pa novych praviłach. Što źmienicca?
