Rasijskija mabilizavanyja. Fota: AP
Błohier piša, jak jon sam akreślivaje, «tezisna»:
«Ruskaja armija adčuvaje surjozny deficyt bojeprypasaŭ na fonie aktyŭnych pastavak bojeprypasaŭ praciŭniku, hetaja prablema z surjoznaj nabyvaje charaktar krytyčnaj.
Kali ničoha nie źmienicca, u najbližejšy čas praciŭnik pačnie nabyvać panavańnie artyleryi na froncie.
Kab razumieć hłybiniu prablemy, nieabchodna ŭśviadomić toj fakt, što absalutna ŭsie pośpiechi našaj armii, jak nastupalnyja, tak i abarončyja, źjaŭlajucca vynikam pieravahi našaj artyleryi».
Varyjantaŭ raźvićcia padziej, na jahony pohlad, tut niekalki.
1. Rasija damaŭlajecca pra pastaŭki bojeprypasaŭ z adnoj ź niešmatlikich krain-sajuźnic.
2. Rasija sprabuje zamarozić kanflikt na samych haniebnych umovach, kab paśpieć naraścić vytvorčyja mahutnaści, jakija pakryjuć deficyt.
3. Rasija navažvajecca na ryzykoŭny, absalutna avanturny tankavy ryvok, nakiravany na toje, kab bolšaja častka vojskaŭ zmahła zamacavacca ŭ nasielenych punktach, a nie stajać u adkrytym stepie pad minami i snaradami.
Nastupnaja častka pasta pryśviečanaja bajavomu stanu vojskaŭ, składzienych całkam ci ŭ značnaj stupieni z mabilizavanych ciaham apošnich miesiacaŭ:
«Mabilizacyja całkam pravaliłasia. Varta razumieć, što absalutnaja bolšaść — 70—80% mabilizavanych vajskoŭcaŭ — akazałasia niebajazdolnaja pa niekalkich pryčynach.
1. Adsutnaść jakasnaj vajskovaj padrychtoŭki. Tut ja nie baču sensu razmaŭlać, mahu skazać tolki, što kali ŭčarašniaha kasira z praduktovaha 2 tydni pakatać u tanku pa palihonie, to dobrym tankistam jon, vidavočna, nie stanie.
2. Adsutnaść ideałahičnaj matyvacyi mabilizavanych z pryčyny adsutnaści vyraznych metaŭ SVA, jakija pavinny tranśliravacca ŭładaj i ŚMI. Učarašni zavadčanin paniaćcia nie maje, što takoje denacyfikacyja i demilitaryzacyja brackaj Ukrainy (ja taksama nie zusim razumieju).
Užo vidavočna, što hetyja čaroŭnyja i abstraktnyja vyrazy nie źjaŭlajucca pryčynaj, pa jakoj rabaciaha z uśmieškaj na tvary i błasłaŭleńniem žonki adpravicca na vajnu za ruski narod dy ruskuju ziamlu i za denacyfikacyju brackaj Ukrainy.
3. Z pryčyny papiaredniaha punkta adbyvajecca maštabny naŭmysny i nienaŭmysny sabataž viadzieńnia bajavych dziejańniaŭ z boku mabilizavanych.
Naprykład, mužyki asvoilisia i navučylisia hulać u «radyjohulni», h. zn. imitavać u radyjoefiry vykanańnie bajavoj zadačy, siedziačy va ŭtulnym i biaśpiečnym blindažy. Z usimi vynikajučymi pieramožnymi vokličami i paničnymi krykami.
Užo maŭču pra pavalnaje pjanstva i poŭnuju adsutnaść choć by jakich mieraŭ biaśpieki i supraćdziejańnia dyviersijnaj aktyŭnaści praciŭnika.
4. Paśla papiaredniaha punkta ŭźnikaje zakanamiernaje pytańnie — a dzie ž zahartavanyja vopytam i dyscyplinavanyja starejšyja tavaryšy, jakija pavinny ŭ šerahach mabilizavanych navodzić paradak i procidziejničać sabatažu? Ich niama, jany zmahajucca na inšych pazicyjach,
tamu što niejkim kazačnym idyjotam było pryniata rašeńnie ŭkamplektavać asobnyja, vielmi adkaznyja i važnyja napramki tolki adnymi mabilizavanymi.
U vyniku my atrymlivajem sotni dvuchsotych i trochsotych u bai za śvinarnik, zaniaty USU, jaki nie maje nijakaj kaštoŭnaści.
A kali mabilizavanyja pačnuć brać vierch, praciŭnik spakojna i arhanizavana adstupić, zakryŭšysia artyleryjskim vałam, jaki realizoŭvać stanovicca ŭsio praściej i praściej, a potym zakidaje znoŭ zaniatyja pazicyi «chajmarsami».
