Fota: 32gkp.by
Chaładovaja alerhija — heta što?
«U razumieńni alerhołahaŭ, adzinaje zachvorvańnie, jakoje možna ŭmoŭna nazvać chaładovaj alerhijaj — heta chaładovaja krapiŭnica, — kaža doktar. — Pry sapraŭdnaj alerhii suprać alerhienu imunnaj sistemaj utvarajucca śpiecyjalizavanyja antycieły ci kletki, jakija možna vyjavić. Ale pry chaładovaj krapiŭnicy takich niama.
U daśledavańniach u nievialikaj častki pacyjentaŭ byŭ pakazany ŭskosny ŭdzieł inšych imunnych, ale niealerhičnych miechanizmaŭ. Tamu paŭnavartasna nazvać chaładovuju krapiŭnicu alerhijaj niemahčyma. Ale alerhołahi tradycyjna zajmajucca krapiŭnicami, tamu z hetaj prablemaj źviartajucca da ich».
Krapiŭnica prajaŭlajecca puchirami, jakija vyhladajuć, jak apioki ad krapivy — tamu zachvorvańnie tak i nazyvajecca. Krapiŭnica moža taksama prajaŭlacca anhijaaciokami ci spałučeńniem anhijaaciokaŭ z puchirami.
Vostraj ličycca krapiŭnica, jakaja niepakoić da šaści tydniaŭ, chraničnaj — 6 tydniaŭ i bolš (čaściej pacyjenty mienavita z chraničnaj formaj źviartajucca da lekaraŭ).
«Jašče zimoj časta šukajuć dapamohi ludzi z suchoj, šurpataj skuraj ruk. Jany skardziacca na toje, što heta «alerhija». Ale ŭ takim vypadku patrebna dyfierencavać abvastreńnie atapičnaha dermatytu i abmaražeńnie skury.
Časta byvaje, što palčatki čałaviek zabyvajecca apranać, — skura abmarožvajecca i treskajecca, jak šklanaja butelka z vadoj u chaładzilniku. Pryncyp toj ža, uličvajučy kolkaść vady ŭ kletkach našaha cieła», — raskazvaje alerhołah.
Jakija jość pryčyny źjaŭleńnia chaładovaj alerhii?
Jak i pry inšych chraničnych krapiŭnicach, u chaładovaj krapiŭnicy peŭnaj pryčyny moža nie być.
«Chaładovaja krapiŭnica ŭ niekatorych vypadkach moža być źviazanaja ź infiekcyjnymi zachvorvańniami (bakteryjalnymi, virusnymi infiekcyjami), ukusami pierapončatakryłych, užyvańniem niekatorych lekaŭ ci ježy. Taksama jana moža być «fonavym» zachvorvańniem pry niekatorych aŭtaimunnych chvarobach — vaŭčancy, reŭmatoidnym artrycie i inšych; taksama pry limfapralifieratyŭnych chvarobach, naprykład, mijełomie», — tłumačyć Hanna.
Fota: tea.ru
Jak zrazumieć, što ŭ ciabie jość chaładovaja alerhija? Čym jana adroźnivajecca ad inšaj?
Čałaviek z chaładovaj krapiŭnicaj budzie reahavać na kantakt ź jakim-niebudź chałodnym pradmietam, naprykład, chałodnaj vadoj, napojami, źmiorzłymi poručniami.
Ad kantaktu z čymści chałodnym praz chvilinu (u niekatorych vypadkach — praz 20 chvilin i bolej) pačnie źjaŭlacca pačyrvanieńnie i śvierb skury ŭ miescy kantaktu, potym puchiry ci anhijaacioki.
«Jość atypovaja chaładovaja krapiŭnica, jakaja prajaŭlajecca prosta ad pieraachałodžvańnia cieła ŭ chałodnym (kala 4°C) pamiaškańni, bieź niepasrednaha kantaktu z chałodnym pradmietam.
Pry vialikim pa płoščy ŭździejańni choładu (naprykład, akunańni ŭ chałodny vadajom) u chvoraha na chaładovuju krapiŭnicu moža ŭźniknuć anafiłaksija — vostraja niebiaśpiečnaja dla žyćcia reakcyja. Jaje simptomy źjaŭlajucca vielmi chutka i mohuć pryvieści da śmierci», — kaža doktar.
Raniej da anafiłaksii adnosili tolki šokavy stan — heta kali ŭ čałavieka krytyčna źnižajecca cisk.
Ciapier anafiłaksiju dyjahnastujuć, kali ŭ čałavieka raptoŭna (praz chviliny ci praź niekalki hadzin) źjaŭlajecca hienieralizavanaja krapiŭnica abo śvierb, pačyrvanieńnie, aciok vusnaŭ ci jazyka ź jakimi-niebudź simptomami z boku inšych orhanaŭ:
— dychalnych šlachoŭ: zadyška abo śviściačaje dychańnie, asipłaść hołasu;
— krovazvarotu: źnižeńnie cisku abo strata prytomnaści;
— inšyja simptomy: schvatkapadobny bol u straŭniku, paŭtornyja vanity, nietrymańnie mačy ci kału.
«U takim vypadku patrebna nieadkładna paklikać na dapamohu i vyklikać chutkuju», — kaža Hanna.
Ad inšych zachvorvańniaŭ chaładovaja krapiŭnica adroźnivajecca tym, što jaje možna paćvierdzić probaj ź lodam. Zvyčajna takaja proba pravodzicca ŭ alerhołaha, kali lod fiksujecca na pieradpleččy na praciahu piaci chvilin. Isnuje taksama śpiecyjalizavany prybor dla vyjaŭleńnia paroha chaładovaj reakcyi: na jakuju tempieraturu źjaŭlajucca puchiry (u dyjapazonie ad 4°C da 44 °C), ale taki prybor nie vielmi šyroka raspaŭsiudžany.
Chaładovaja alerhija čym-niebudź niebiaśpiečnaja?
«Tak. Chaładovaja krapiŭnica — adziny vid chraničnaj krapiŭnicy, jaki moža skončycca śmierciu, kali čałaviek budzie akunacca ŭ chałodnuju vadu», — kaža alerhołah.
Što rabić, kali chaładovaja alerhija mocna prajaŭlajecca? Naprykład, mocnym śvierbam
Lohkija simptomy typovaj chaładovaj krapiŭnicy mohuć prajści samastojna — dzieści praz hadzinu. Ale važna adsočvać, kab nie było simptomaŭ anafiłaksii.
«Śvierb i puchiry ci anhijaaciok možna źniać antyhistaminnymi tabletkami 2-ha pakaleńnia (efiektu patrebna čakać da paŭhadziny). Pažadana, kab čałaviek z krapiŭnicaj mieŭ z saboj takija leki, asabliva ŭ padarožžy.
Pry simptomach anafiłaksii nieadkładna patrebny ŭnutrymyšačna adrenalin. Praściej za ŭsio dla lačeńnia anafiłaksii mieć z saboj ratavalnuju špryc-ručku z adrenalinam, ale, na žal, takija pryłady niedastupnyja ŭ Biełarusi, u adroźnieńnie ad šmatlikich susiednich krainaŭ», — tłumačyć doktar.
Jakija parady možna dać pa lačeńni i dyjahnostycy chaładovaj alerhii?
«Źviarnucca da alerhołaha, — raić Hanna. — Kali vyjavili ŭ siabie padazreńni na chaładovuju krapiŭnicu i nie možacie zavitać da lekara — paźbiahajcie kantaktu z chałodnymi rečami, napojami, nie razmarožvajcie samastojna chaładzilnik, varta paźbiahać chałodnaha dušu, nie akunacca ŭ chałodnyja vadajomy. Chaładovaja krapiŭnica moža być typovaj i nietypovaj, tamu lepiej źviarnucca da alerhołaha dla dakładnaj dyjahnostyki», — padsumoŭvaje jana.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Jak nablizić tradycyjnyja śviatočnyja stravy da pravił zdarovaha charčavańnia. Tłumačyć dyjetołah
Ci abaroniać vakcyny ad śvinoha hrypu. Adkazaŭ śpiecyjalist
Kardyjołah raskazaŭ, jakija simptomy pieradynfarktnaha stanu i jak dziejničać pry infarkcie
