Fota: Pixabay.com
Zvalnieńnie jak adzinaje vyjście
U niečym cichaje zvalnieńnie padobnaje da italjanskaha strajku. Heta taksama situacyja, kali supracoŭnik vykonvaje tolki minimalnyja patrabavańni adpaviedna svajoj pasadzie i ŭkładaje ŭ pracu nie bolš času, namahańniaŭ i entuzijazmu, čym jana patrabuje.
Jak i šmatlikija inšyja sučasnyja trendy, cichaje zvalnieńnie stała papularnym dziakujučy tyktoku. Usio pačałosia ź videa, jakoje zahruziŭ małady inžynier Zaid Chan. Za 17-siekundny rolik jon raskazaŭ miljonam ludziej pra novuju źjavu: «Vy pa-raniejšamu vykonvajecie svaje abaviazki, ale bolš nie padpisvajeciesia na mientalnaść kultury mituśni, pavodle jakoj praca musić być vašym žyćciom. Realnaść u tym, što heta nie tak — i vaša kaštoŭnaść jak asoby nie vyznačajecca vašaj pracaj».
Vydańnie Harvard Business Review, kab atrymać tłumačeńnie sutnaści cichaha zvalnieńnia, źviarnułasia da prafiesaraŭ Entani Kłotca i Marka Balina. Voś što jany skazali: «U ramkach cichaha zvalnieńnia supracoŭniki praciahvajuć vykonvać svaje abaviazki, ale mienš chočuć udzielničać u dziejnaści pa-za hetymi abaviazkami: bolš nie zatrymlivajucca dapazna, nie prychodziać na pracu rana i nie naviedvajuć nieabaviazkovyja sustrečy».
Pry hetym supracoŭnik nie pakidaje svaju pasadu i praciahvaje atrymlivać zarobak, tamu takija pavodziny nie ŭchvalajuć niekatoryja bosy. Niekatoryja kiraŭniki staviacca da cichaha zvalnieńnia spakojna, častkova tamu, što razumiejuć nieabchodnaść bałansu pamiž pracaj i asabistym žyćciom, a častkova — bo nie mohuć zamianić takoha supracoŭnika. Inšyja ž bosy cicha ci hučna zvalniajuć supracoŭnikaŭ, jakija, na ich dumku, uchilajucca ad pracy. Źjaviłasia navat źjava pad nazvaj quiet firing: heta situacyja, kali supracoŭnik nastolki nie adčuvaje addačy ad pracy, što zvalnieńnie robicca dla jaho adzinym vyjściem.
Pierš za ŭsio — bałans miž žyćciom i pracaj
Kali heta tak niebiaśpiečna, čamu ž ludzi vybirajuć taki styl pracy? Kali razmova nie idzie pra sapraŭdnuju italjanskuju zabastoŭku, to čaściej za ŭsio takija ludzi nie chočuć rabić pracu spravaj svajho žyćcia. Uviečary jany prosta sychodziać dachaty z ofisa, pakidajuć pracu za śpinaj i kancentrujucca na niepracoŭnych spravach i abaviazkach.
U toj ža čas cichaje zvalnieńnie moža być prykmietaj taho, što supracoŭniku nie padabajecca jaho praca ci što jon adčuvaje na joj vyharańnie, bo heta sposab paźbiehnuć dadatkovaha stresu. Taksama cichaje zvalnieńnie moža śviedčyć, što čałaviek hatovy źmianić pracu ci, mahčyma, užo šukaje dla siabie novaje miesca.
Nie ŭsie ličać cichaje zvalnieńnie novaj źjavaj, bo, musić, i raniej častka supracoŭnikaŭ imknułasia nie pierahareć na pracy. Jość mierkavańnie, što nazva novaha trendu stała papularnaj, bo supracoŭnikam, što vyhareli, prosta byŭ patrebny termin, kab apisać svaje pačućci. Šmat kamu ź ludziej zrazumiełaja situacyja, kali adčuvaješ i žadańnie być u finansavaj biaśpiecy, i imknieńnie nie dać pracy zachapić svajo žyćcio. Na ŭsio heta nakładvajecca tryvoha za svoj status, adčuvańnie viny za hetuju tryvohu i žadańnie adčajna zmahacca za pavyšeńnie. Voś ad hetaha nas i ratuje cichaje zvalnieńnie.
Čamu karysnamu moža navučyć cichaje zvalnieńnie? Voś adrazu niekalki ŭrokaŭ novaha trendu:
- važna, kab u vašym žyćci byŭ bałans;
- vaša kaštoŭnaść jak asoby nie zaležyć ad vašaj praduktyŭnaści na pracy.
U hetaha trendu možna znajści i minusy, navat kali razmova nie datyčyć vašych ułasnych supracoŭnikaŭ. Cichaje zvalnieńnie — heta pryncyp, pavodle jakoha nie ŭchvalajecca imknieńnie dasiahnuć vynikaŭ vyšej za svaje mahčymaści i pieraadoleć miežy. Z druhoha boku, ci treba śvietu takaja pracoŭnaja kultura, dzie ad čałavieka pastajanna patrabujuć bolš, bolš i bolš?
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Kociki — jak leki… Jak biazdomny kot napoŭniŭ novym sensam žyćcio biełaruskaha biznesmiena
U Minsku ŭ 5 razoŭ bolš svabodnych ofisaŭ, čym u 2019-m. Što pustuje?
«Ciahajuć «Rołtan» i tualetnuju papieru». Što ajcišniki vynosiać dadomu z ofisa
