Alaksandr Łukašenka ličyć, što taryfy na enierhanośbity dla nasielnictva ŭ 2010 hodzie mohuć vyraści nie bolš čym na 7 dalaraŭ. Pra heta jon zajaviŭ padčas spravazdačy ministra enierhietyki Alaksandra Aziarca.

Jak paviedamiła pres-słužba kiraŭnika dziaržavy, padčas narady Aziarec vystupiŭ z prapanovaj adychodzić ad praktyki pierakryžavanaha subsidavańnia i pavysić taryfy na enierhanośbity dla nasielnictva. Zaraz straty haliny za košt niedapłaty nasielnictva składajuć 900 młrd. rubloŭ. Siońnia nasielnictva apłačvaje prykładna pałovu realnaha koštu pryrodnaha hazu, jaki pastaŭlajecca ŭ damy.

U svaju čarhu, prezident ličyć, što «pakul nie treba śpiašacca z pryniaćciem takoha rašeńnia». Pavodle mierkavańnia kiraŭnika dziaržavy, nieabchodna šukać šlachi aptymizacyi zatrat, z tym kab nie dapuścić pavyšeńnia taryfaŭ. Damahčysia hetaha možna ŭ tym liku i za košt źnižeńnia sabiekoštu.

Łukašenka padkreśliŭ, što «nie moža być i havorki pra pavyšeńnie taryfaŭ dla nasielnictva adrazu na 5-7%».

«Davajcie damovimsia tak: pačynajučy z 1 studzienia ŭ miesiac pa dalary, dzieści maleńkimi zruchami, i to — spačatku abhruntavaŭšy i prainfarmavaŭšy prezidenta. I my spakojna, u zaležnaści ad taho jak budzie raźvivacca kryzis, budziem pryrastać u ahulnaj sumie na 7 dalaraŭ u nastupnym hodzie. Ale pa adnym dalary, a nie pa 5 abo 7. Adnak usio heta jašče treba praličyć», — padkreśliŭ Łukašenka.

«Treba mieć na ŭvazie, što siońnia nasielnictva nie moža bolš zapłacić. Tamu nie treba siońnia patrabavać ad mianie pavyšeńnia taryfaŭ. Treba razumieć, što my nie tak pavysili zarpłaty i piensii nasielnictvu, kab 5-7 dalaraŭ u ich zabrać. Ale i nasielnictva pavinna razumieć, što kali my zahubim enierhietyku, nie budzie dziaržavy i naohuł zarpłat», — adznačyŭ kiraŭnik dziaržavy.

Pavodle słoŭ prezidenta, varta jašče raz «uvažliva pahladzieć, dzie i na čym možna zekanomić u vytvorčym pracesie». «A z 1 studzienia pa adnym dalary, mahčyma, pačniem pavyšać. Ale heta rašeńnie jašče napieradzie. I vy pavinny mnie jaho dać, dobra abhruntavaŭšy», — dadaŭ Alaksandr Łukašenka.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?