Fota: Andrew Harnik / AP

Fota: Andrew Harnik / AP

U aŭtorak Zialenski źjeździŭ na liniju frontu ŭ Bachmut, potym tajemna sieŭ na načny ciahnik u Polšču. Tak pačałosia jaho doŭhaje padarožža ŭ Vašynhton. U Polščy jaho adrazu ž zabraŭ samalot VPS ZŠA, jaki, jak paviedamlajecca, supravadžali samalot-raźviedčyk NATA i źniščalnik F-15.

Paviedamleńni pra jaho mahčymy vizit u Vašynhton pačali źjaŭlacca ŭ pačatku tydnia, ale jany zastavalisia niepaćvierdžanymi da samaje ranicy sierady, kali aficyjnyja asoby ZŠA ŭžo byli ŭpeŭnienyja, što ŭkrainski lidar u biaśpiecy i na šlachu ŭ stalicu ZŠA.

Mahčymaść takoha vizitu abmiarkoŭvałasia niekalki miesiacaŭ, adnak apošniaja padrychtoŭka była zroblenaja vielmi chutka. Prezidenty pahavaryli na hetuju temu 11 śniežnia, i Zialenski atrymaŭ zaprašeńnie ŭžo praz try dni. Tolki paśla paćviardžeńnia hetaha možna było zapuskać kančatkovy płan dziejańniaŭ.

Nie dziŭna, što aficyjnaj infarmacyi pra pajezdku nie drukavałasia — navat u mirny čas padčas prezidenckich vizitaŭ dziejničajuć strohija miery biaśpieki, a dla lidara vajujučaj krainy ryzyka jašče bolšaja.

Praz pahrozu rasijskich rakiet paloty nad Ukrainaj zanadta niebiaśpiečnyja, tak što Zialenski, miarkujučy pa ŭsim, tajemna prajechaŭ na ciahniku praz Ukrainu ŭ Polšču, dzie ranicaj u sieradu jaho zaŭvažyli na čyhunačnaj stancyi ŭ pamiežnym horadzie Pšemysl.

Polskaje telebačańnie pakazała Zialenskaha, jaki išoŭ sa svaim prezidenckim anturažam pa pieronie na fonie sinie-žoŭtaha ŭkrainskaha ciahnika. Zatym usie jany sieli ŭ aŭto, jakija ich čakali, u tym liku čornyja Chevrolet Suburban — lubimuju madel ŭrada ZŠA.

Mnohija zachodnija lidary i aficyjnyja asoby na sustrečy ź Zialenskim u Kijevie jeździli na ciahniku, ale dla jaho heta byŭ pieršy vizit za miažu z pačatku vajny.

Nieŭzabavie paśla hetaha sistemy adsočvańnia palotaŭ pakazali, što «Boinh» C-40B VPS ZŠA, na borcie jakoha, jak miarkujecca, znachodziŭsia Zialenski, uźlacieŭ z aeraporta Žešuva prykładna za 80 km na zachad ad Pšemyśla.

Samalot nakiravaŭsia na paŭnočny zachad u bok Vialikabrytanii, ale pierš čym jon uvajšoŭ u jaje pavietranuju prastoru nad Paŭnočnym moram, samalot-raźviedčyk NATA praskanavaŭ miascovaść. Viadoma, što patrulujuć mora rasijskija padvodnyja łodki.

A amierykanski źniščalnik F-15, jaki vylecieŭ z bazy ŭ Anhlii, supravadžaŭ samalot z prezidentam Ukrainy častku jaho šlachu.

Narešcie, kala apoŭdnia ŭ Vašynhtonie — amal praz 10 hadzin paśla ŭźlotu i da taho jašče mnohich hadzin u šlachu dla ŭkrainskaha prezidenta — samalot pryziamliŭsia niedaloka ad Vašynhtona.

Paśla prybyćcia jamu dali achovu — supracoŭnikaŭ Sakretnaj słužby, — jak i ŭsim kiraŭnikam dziaržaŭ.

Krynicy telekanała «Ej-bi-si» skazali, što navat u ZŠA jany aścierahalisia mahčymych dziejańniaŭ Rasii.

«My vydatna razumiejem, što ŭ Rasii ŭ hetaj krainie jość ahienty, i jana moža pasprabavać niešta zrabić», — skazaŭ telekanału adzin z vysokapastaŭlenych čynoŭnikaŭ. «My viedajem, što pastaŭlena na kartu», — dadaŭ jon.

Vizit prajšoŭ hładka, da čaćviarha Zialenski ŭžo znoŭ byŭ u Jeŭropie — jon napisaŭ u telehram, što zrabiŭ prypynak u Polščy i sustreŭsia ź jaje prezidentam Andžejem Dudaj.

Zatym, jak paviedamlajecca, Zialenski pierasiek miažu Ukrainy, ale supracoŭniki amierykanskich śpiecsłužbaŭ uzdychnuli spakojna tolki tady, kali jon ščaśliva viarnuŭsia ŭ Kijeŭ. Jak adznačyŭ raniej adzin z supracoŭnikaŭ u intervju «Ej-bi-si»: «Pucin i Kreml viedajuć, što jamu patrebnaja budzie daroha dadomu».

Клас
47
Панылы сорам
0
Ха-ха
0
Ого
1
Сумна
2
Абуральна
2