U Minskim haradskim upraŭleńni Śledčaha kamiteta jamu viarnuli rečy, adabranyja padčas pieratrusu i zatrymańnia letam 2021 hoda.
Paśla vyzvaleńnia z turmy na Akreścina Aleś Daščynski byŭ u statusie padazravanaha i pad padpiskaj ab niavyjeździe ź Biełarusi. Ciapier hetyja abmiežavańni źniatyja.
Zhodna z tekstam pastanovy ab zatrymańni, Alesia Daščynskaha padazravali pavodle č. 1 art. 342 Kryminalnaha kodeksa Biełarusi — «arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich».
16 lipienia 2021 hoda siłaviki šturmavali minski ofis «Radyjo Svaboda»: vyłamali dźviery, vyrvali kamiery videanazirańnia, kanfiskavali techniku, a što nie zmahli vynieści, prosta paškodzili.
Paralelna pravaachoŭniki pryjšli da niekatorych karespandentaŭ-fryłansieraŭ, jakija supracoŭničali ź miedyja, — Alesia Daščynskaha, Aleha Hruździłoviča, Inesy Studzinskaj. Usich ich paśla pieratrusaŭ zatrymali i advieźli ŭ minski izalatar časovaha ŭtrymańnia na Akreścina.
Aleś Daščynski znachodziŭsia za kratami da 23 lipienia 2021-ha, jahonyja kalehi prabyli tam na try dni bolš. U vyniku da realnaha terminu asudzili tolki Aleha Hruździłoviča — sioleta ŭ sakaviku sud Savieckaha rajona Minska pakaraŭ jaho 1,5 hadami kałonii nibyta za «arhanizacyju masavych biesparadkaŭ i ŭdzieł u ich». Za kratami jon prabyŭ amal 9 miesiacaŭ, paśla čaho niečakana apynuŭsia na voli i byŭ praktyčna vydvarany ŭ Litvu.
