Fota: vokrugsveta.ru
«Paśla 124 hadoŭ kałanijalizmu puertarykancy zasłuhoŭvajuć spraviadlivaha, prazrystaha i demakratyčnaha pracesu dla kančatkovaha vyrašeńnia pytańnia ab statusie», — napisała ŭ tvitary saaŭtar zakonaprajekta Nidzija Viełaskies.
Vostraŭ Puerta-Ryka z nasielnictvam kala 3,3 młn čałaviek i vysokim uzroŭniem biednaści staŭ terytoryjaj ZŠA ŭ 1898 hodzie. Ciapier u jaho status «svabodna asacyjavanaj dziaržavy»: jaho žychary źjaŭlajucca hramadzianami ZŠA, ale nie majuć prava hołasu ŭ Kanhresie, nie mohuć hałasavać na prezidenckich vybarach, nie płaciać fiederalny padachodny padatak.
Aktyvisty ŭžo niekalki dziesiacihodździaŭ viaduć kampaniju za bolš šyrokaje samavyznačeńnie Puerta-Ryka, uklučajučy nadańnie vostravu statusu štata. Z 1960-ch hadoŭ pa hetym pytańni było praviedziena šeść refierendumaŭ, ale jany nie mieli abaviazkovaj siły. Tolki Kanhres moža dać status terytoryi štata.
Novy zakonaprajekt vyznačaje ŭmovy refierendumu, a taksama nazyvaje try patencyjnyja statusy samakiravańnia — niezaležnaść, uvachodžańnie ŭ ZŠA ŭ jakaści štata abo suvierenitet sa svabodnaj asacyjacyjaj sa Złučanymi Štatami.
Apošni varyjant dziejničaje ŭ cichaakijanskich astraŭnych dziaržavach — Fiederatyŭnych Štatach Mikraniezii, Pałaŭ i na Maršałavych astravach.
Kali zakonaprajekt budzie pryniaty Pałataj pradstaŭnikoŭ ZŠA, spatrebicca jaho pryniaćcie 60 hałasami ŭ Sienacie i podpis prezidenta Džo Bajdena.
Zakonaprajekt atrymaŭ padtrymku zakanadaŭcaŭ ad abiedźviuch partyj i ad puertarykanskich uładaŭ. Adnak čas padciskaje, pakolki zakanadaŭcam treba razhledzieć masu pytańniaŭ pierad sychodam na kanikuły ŭ kancy nastupnaha tydnia. A novaje sklikańnie Kanhresa, u jakim Pałata pradstaŭnikoŭ apyniecca pad kantrolem respublikancaŭ, budzie pryviedziena da prysiahi 3 studzienia, i tady luby zakanadaŭčy praces treba budzie pačynać spačatku.
