«Paśla taho, jak sud dazvoliŭ budaŭničaj inśpiekcyi źnieści niezakonna pabudavany budynak, u bližejšy čas budzie składzieny kaštarys na znos i praviedzieny pracedury dziaržzakupak dla vybaru padradčyka, jaki budzie vykonvać raboty. Płanujecca, što znos Doma Maskvy zavieršycca da kanca 2023 hoda», — havorycca ŭ paviedamleńni inśpiekcyi, raspaŭsiudžanaj u paniadziełak.
Jašče ŭ śniežni 2016 hoda ŭčastkovy sud horada Vilnia pryznaŭ niesapraŭdnym dakumient ab dazvole na budaŭnictva, vydadzieny Vilenskim samakiravańniem u 2008 hodzie, i abaviazaŭ zabudoŭščyka pierabudavać budynak u adpaviednaści ź im.
Ideja Doma Maskvy ŭ Vilni raźvivałasia z 2004 hoda, paśla vizitu tahačasnaha mera Maskvy Juryja Łužkova ŭ Vilniu, padčas śviatkavańnia 750-hodździa karanacyi karala Mindoŭha. Tady było pryniata i rašeńnie ab realizacyi anałahičnaha prajekta Vilenskaha doma ŭ Maskvie. Było abvieščana, što Dom Maskvy stanie centram kulturnaha i dziełavoha supracoŭnictva, metaj jakoha źjaŭlajecca stvareńnie i dalejšaje raźvićcio dobrasusiedskich adnosin pamiž Maskvoj i Vilniaj.
Adnak u 2016 hodzie Akruhovy sud horada Vilni častkova zadavoliŭ pazoŭ budaŭničaj inśpiekcyi i pryznaŭ vydadzieny samakiravańniem dazvoł niezakonnym, bo jon parušaje patrabavańni pa vyšyni i ščylnaści zabudovy, ustanoŭlenyja samim samakiravańniem u padrabiaznym płanie hetaj terytoryi.
Taksama ŭ acency pahroz nacyjanalnaj biaśpiecy 2017 hoda Departamient dziaržaŭnaj biaśpieki adznačyŭ, što pierśpiektyvy prajekta Doma Maskvy ŭ Vilni «majuć adnosna vysokaje simvaličnaje i praktyčnaje značeńnie dla Rasii jak patencyjnaha instrumienta jaje ŭpłyvu, unutranaj palityki i publičnaj dypłamatyi».
