Fota: kadr ź filma
U sercy hetaha sieryjała znachodzicca inśpiektar Arman Harmaš — detektyŭ i sapraŭdny džentlmien. Dla kanadcaŭ, jakija lubiać litaraturu, hety piersanaž — toje ž samaje, što dla brytancaŭ — Puaro ci Chołms, tłumačyć Variety.
Vybar akciora na rolu Harmaša byŭ adnym z važniejšych elemientaŭ sieryjała, i Alfred Malina, jaki ŭ vyniku i ŭvasobiŭ detektyva, z zadačaj spraviŭsia. Jon ułaviŭ sapraŭdnuju, miahkuju sutnaść svajho hieroja, jaho dabryniu i naziralnaść, i pieradaje heta ź pieršaha momantu svajho źjaŭleńnia na ekranie.
Padziei sieryjała adbyvajucca ŭ vydumanym haradku, stvoranym na asnovie rodnaha horada Pieni, kanadskaha Noŭłtana. U pieršym siezonie «Troch sosnaŭ» jość čatyry asobnyja zahadkavyja historyi pra zabojstvy. Nie rasčarujciesia pieršymi dźviuma sieryjami — jany mohuć padacca słabymi, ale heta tolki praz toje, što šou na toj čas jašče nie vyznačyła da kanca svoj charaktar. Tak my i atrymlivajem pavolny pačatak, dy i achviara ŭ im zdajecca nie samaj pryjemnaj.
Na ščaście, my majem ceły siezon, kab raskryć usiu zahadku ŭ jaje poŭnaj pryhažości, u čym kryjecca sapraŭdnaja hienijalnaść hetaj ekranizacyi knih. Harnaš sprabuje raskryć pieršaje zabojstva i ŭ toj ža čas pačynaje rasśledavać źniknieńnie maładoj pradstaŭnicy karennych narodaŭ. Sud Kviebieka nie pahadziŭsia šukać jaje, bo dziaŭčyna nibyta źbiehła sama, niahledziačy na toje, što, pa słovach jaje rodnych, jana b nikoli ich nie kinuła.
Hetaj siužetnaj linii niama ŭ pieršakrynicy. Jana — prapanova ad stvaralnikaŭ «Troch sosnaŭ» pahutaryć pra aktualnuju prosta ciapier prablemu, kali ŭ Kanadzie palicyja nie rasśleduje źniknieńni žančyn, jakija naležać da karennych narodaŭ. Vidavočna, što aŭtary šou žadajuć asensavana daśledavać hetyja historyi, što jany robiać z pavahaj i čułaściu.
Ale sieryjał «Try sasny» hłyboka pahružajecca i ŭ kulturu ciapierašniaj Kanady. Piersanažy vykarystoŭvajuć to francuzskuju, to anhlijskuju movu, časam ad ich čuvać typova kanadskija vyrazy, i pad pavierchniaj usioj historyi kipić praciahłaja napružanaść pamiž frankamoŭnymi i anhłamoŭnymi žycharami krainy.
Adaptavać papularnuju knihu (ci sieryju knih) u sieryjał i nie zhubić pry hetym niuansaŭ pieršakrynicy — ciažkaja zadača. Tym bolš ciažka rabić heta, kali ty pašyraješ śviet knihi i palapšaješ aryhinalnuju pracu. I sieryjał «Try sasny» bliskuča spraŭlajecca z abiedźviuma zadačami.
Kali sieryjał padoŭžać na druhi siezon, my pačujem jašče šmat sakretaŭ pra jaho piersanažaŭ. Ciapier ža my majem karotkuju, ale pryjemnuju adaptacyju, poŭnuju kultur i historyj, jakija zasłuhoŭvajuć, kab ich pačuli va ŭsim śviecie, i pry hetym addajuć naležnaje ramanam, na jakich jany zasnavanyja.
Rejtynhi na vialikich suśvietnych resursach:
IMDB — 7,2/10
Rotten Tomatoes — 78% (krytyki), 68% (hledačy)
Čytajcie taksama:
«1899» — sieryjał, što zastajecca zahadkaj da samaha kanca
Ukrainskija dakumientałki možna budzie pahladzieć anłajn na kinafeście — za dalar abo naohuł biaspłatna
