Minčuka Ivana Ziańko zatrymali 20 kastryčnika 2020 hoda. Letaś u sakaviku Ivana sudzili ź Jaŭhienam Baroŭskim, Alaksiejem Drabaj i Uładzimiram Kackielem. Ich abvinavačvali adrazu pa troch artykułach Kryminalnaha kodeksa: u hvałcie ŭ dačynieńni da supracoŭnika orhanaŭ unutranych spraŭ (art. 364 KK), va ŭdziele ŭ dziejańniach, jakija hruba parušajuć hramadski paradak (art. 342 KK), u naŭmysnym paškodžańni majomaści (art. 218 KK).
Padziei, za jakich ich sudzili, adbyvalisia paśla 17 hadzin 11 kastryčnika 2020 hoda. Padčas razhonu «Maršu honaru» kala stancyi mietro «Puškinskaja» abvinavačanyja pieraškodzili amapaŭcam zatrymać čałavieka, raspačali ź imi bojku, nanieśli niekalki ŭdaraŭ pa hałovach i raźbili škło ŭ słužbovym aŭtamabili. Pa spravie paciarpiełymi vystupali siem supracoŭnikaŭ AMAPa.
Ziańko svajoj viny na sudzie nie pryznaŭ, a skazaŭ:
«Na sto adsotkaŭ nie vinavaty, admaŭlajusia davać pakazańni».
Fihuranty hetaj spravy na sudzie zajaŭlali pra katavańni. Ivan raspavioŭ, što jaho źbivali, pahražali zhvałtavańniem, zdymali štany.
Ale, niehledziačy na zajavy ab katavańniach, sudździa suda Frunzienskaha rajona Minska Jula Bliźniuk pa zapycie prakurorki Valeryi Taratynka asudziła Ivana Ziańko da piaci hadoŭ kałonii va ŭmovach ahulnaha režymu. Adbyvać termin Ivana Ziańko nakiravali ŭ škłoŭskuju kałoniju.
5 studzienia hetaha hoda Ivan Ziańko staŭ fihurantam kryminalnaj spravy pavodle art. 342 Kryminalnaha kodeksa. U suviazi z hetym Ivana pieraviali ŭ SIZA-1 na Vaładarskaha.
Viadoma, što 16 sakavika palitviaźnia źmiaścili na 10 sutak u ŠIZA. Ale pryčyna nieviadomaja.
6 i 7 krasavika 2022 hoda kryminalnaja sprava suprać Ziańko razhladałasia ŭ sudzie Frunzienskaha rana Minska. Spravu razhladała sudździa Natalla Buhuk.
Hetym razam palitviaźnia abvinavačvali va ŭdziele ŭ akcyi pratestu 9 žniŭnia 2020 hoda, a mienavita ŭ błakiroŭcy ruchu transpartu šlacham «sčepki» ź inšymi nieŭstanoŭlenymi asobami. Asnoŭnym dokazam pa spravie vystupała videa, na jakim «nieŭstanoŭlenaja asoba» spartyŭnaha ciełaskładu instruktuje pratestoŭcaŭ, jak stać u «sčepku». Na sudzie advakat vykazaŭ zdahadku, što heta apieratyŭny supracoŭnik milicyi:
«Vidavočna, što heta nieŭstanoŭlenaja asoba pravacyravała astatnich da ździajśnieńnia supraćpraŭnych dziejańniaŭ. Pry hetym tvar jaho zaretušavany. Nielha vyklučać, što heta supracoŭnik pravaachoŭnych orhanaŭ. Bo inakš jak rastłumačyć naŭmysnaje ŭtojvańnie jaho tvaru na videa? A orhan papiaredniaha śledstva tak i nie ŭstanaviŭ jaho asobu. Na moj pohlad, ustanavić hetuju asobu nie ŭjaŭlała asablivaj ciažkaści».
Taksama ŭ materyjałach spravy jość niekalki fotazdymkaŭ. Inšych dokazaŭ viny Ziańko niama.
Napačatku suda Ziańko admoviŭsia ŭstavać, za što sudździa papiaredziła jaho ab adkaznaści. U apošnim słovie palitviazień skazaŭ:
«Rady bačyć rodnych, blizkich, siabroŭ. U mianie ŭsio ŭ paradku, ja nabirajusia sił, ja zdarovy. Mahčyma, tam byŭ ja ŭ pieršych šerahach. Ale kali ja vyjdu, ja dakładna budu ŭ pieršych šerahach».
Prakurorka zaprasiła dla Ivana Ziańko pa novaj kryminalnaj spravie pa art. 342 Kryminalnaha kodeksa dva hady kałonii — mienavita takoje pakarańnie i pryznačyła sudździa Buhuk. Ale na vynikovy termin heta nie paŭpłyvała: u vyniku palitviazień asudžany da piaci hadoŭ kałonii.
ŠIZA, PKT i novaja kryminalnaja sprava
U lipieni Ivana znoŭ etapavali paśla razhladu apielacyi ŭ škłoŭskuju kałoniju № 17. Amal adrazu jaho źmiaścili ŭ štrafny izalatar za «parušeńnie paradku». Paśla hetaha administracyja kałonii adpraviła Ivana ŭ pamiaškańnie kamiernaha typu (PKT) da 19 listapada i inicyjavała zaviadzieńnie kryminalnaj spravy pavodle art. 411 KK. Razhlad novaj spravy byŭ pryznačany na 21 kastryčnika, ale paśla pieršaha pasiadžeńnia byŭ abvieščany pierapynak. Sud prachodziŭ na terytoryi kałonii, kudy možna trapić tolki z dazvołu načalnika ŭstanovy.
9 listapada sudździa Alaksandr Tarakanaŭ prysudziŭ Ivanu ŭ dadatak da piaci hadoŭ źniavoleńnia jašče adzin hod ŭ kałonii. Paśla suda palitviaźnia pieraviali ŭ mahiloŭskuju turmu № 4 da razhladu apielacyjnaj skarhi. Ciapier kožny čałaviek moža padtrymać Ivana hrašovymi pieravodami, pasyłkami z roznymi pryjemnymi drobiaziami i miedycynskimi banderolkami. Heta budzie dobraj padtrymkaj nie tolki dla Ivana, ale i dla jahonaj siamji.
Pa danych pravaabaroncaŭ, za apošni hod jak minimum 41 palitźniavolenaha pieraviali na turemny režym i suprać jašče 16-ci raspačali novyja kryminalnyja spravy.
Padtrymajcie Ivana hrašovymi pieravodami, pasyłkami, telehramami i listami na adras:
Turma № 4, 212011, h. Mahiloŭ, vuł. Krupskaj, 99A
Ivan Alaksandravič Ziańko
