«Dynasad»
Nahadajem, što na terytoryi «Novaj Baravoj» užo jość try dziciačyja sadki i adna škoła. Śviežy «Dynasad» adkryjecca ŭ «kalarovym» kvartale, pobač z užo isnujučymi «ałoŭkami». Kab jon harmanična ŭpisaŭsia ŭ navakolnuju prastoru, fasad budynka vyrašyli taksama raznastaić kalarovymi pałosami, ale hetym razam pafarbavali nie sami ścieny, a akonnyja adchony, za košt čaho atrymaŭsia cikavy abjomny efiekt.
Tematyka hetaha dziciačaha sadka — dynazaŭry. Tamu ich vyjavy milhajuć paŭsiul, u tym liku na vulicy: u centry hulniavoj placoŭki pastaviać vialikuju skulpturu paŭzuna.
Interjer adroźnivajecca vykarystańniem naturalnych materyjałaŭ (ich dapoŭniać jarkija akcenty), a jašče šyrokimi kalidorami ź vialikaj kolkaściu voknaŭ i šklanych dźviarej, jakija viaduć u kabiniety, — takim čynam zabudoŭščyk prytrymlivajecca pryncypu «adkrytaści» adukacyjnych prastor.
Dla kožnaj hrupy pradumany svaje harderobnyja, pakoj dla zaniatkaŭ i spalnia, a ŭ prybiralniach usie rukamyjnicy i rakaviny padbiaruć pad siaredni rost dziaciej roznaha ŭzrostu.
«Dynasad» vyraście na try pavierchi i zmoža pryniać da 230 dziaciej. Na terytoryi raźmieścicca hulniavaja zona ź niekalkimi varyjantami pakryćcia (humovym, piasočnym), placoŭka dla malavańnia i vyvučeńnia PDR, areli i h. d. Dla bolšaj biaśpieki abharodžanyja terytoryi vychodziać u dvor blizkich damoŭ, zakryty dla aŭtamabilaŭ.
U sadku taksama budzie vialikaja spartzała i kancertny pakoj dla zaniatkaŭ tancami i muzykaj. Źjavicca svaja kuchnia, kabiniety psichołaha i defiektołaha. Praduhledžany i miedycynski błok ź niekalkimi pałatami.
Škoła «Art Park»
Novaja škoła pad kodavaj nazvaj «Art Park» źjavicca ŭ kvartale «Centralny park». Jana raźmieščana takim čynam, kab da jaje lohka možna było dabracca jak pieššu, tak i na hramadskim transparcie — aŭtobusny prypynak znachodzicca zusim pobač. Taksama praduhledžana aŭtamabilnaja stajanka sa zručnaj zonaj dla pasadki/vysadki dziaciej. Na parkoŭcy ŭstalujuć jašče i navies, dzie možna budzie pačakać baćkoŭ, a taksama zachoŭvać svoj rovar.
Budynak składajecca z troch pramavuholnych karpusoŭ, źlohku paviernutych adzin da adnaho. Adzin budzie ahulnym, astatnija dva padzielać pamiž małodšymi i starejšymi kłasami. Usie abjekty pabudujuć sa zbornych žalezabietonnych kanstrukcyj ad zavoda «A-100 Deviełapmient», adnak jany buduć źniešnie adroźnivacca pamiž saboj. Centralny korpus vykanajuć u čyrvonym kolery z chaatyčna raźmieščanym škleńniem. Pravy, pryznačany dla małodšych dziaciej, dekarujuć akcentnymi elemientami ŭ vyhladzie jarkich panelaŭ vakoł voknaŭ, ale ŭ cełym vyhladać jon budzie kudy spakajniej. A voś korpus starejšaj škoły vizualna zrobiać bolš strohim.
Usie karpusy złučać šklanymi halerejami ź leśvicami i amfiteatrami. U kožnaha budynka budzie svoj asobny ŭvachod, tak što z boku kompleks budzie čymści nahadvać kampaktny haradok.
«Art Park», raźličany na 1125 dziaciej, budzie svojeasablivaj škołaj talentaŭ. Jarkija viestybiuli, adkrytyja leśvicy, kreatyŭnyja zony adpačynku, kabiniety dla zaniatkaŭ muzykaj, malavańniem i inšymi vidami mastactva — usio heta zaklikana raskryvać tvorčy patencyjał vučniaŭ. Na pieršym paviersie centralnaha korpusa navat budzie interaktyŭny elektronny archiŭ škoły, dzie na vialikim ekranie buduć pastajanna tranśliravać raboty navučencaŭ.
U škole praduhledziać i mnostva rekreacyjnych zon, jakija majuć roznuju tematyku — muzyka, sport, miedyja. A pobač z kabinietam astranomii ŭ starejšym korpusie źjavicca hieaśfiera dla pakazaŭ śfieryčnaha kino. Vyhladać heta ŭsio budzie davoli jarka i niezvyčajna.
A voś navučalnyja kabiniety i kalidory, naadvarot, aformiać u niejtralnym styli. Taksama ŭ «Art Parku» budzie niekalki spartzałaŭ z trybunami, biblijateka, aktavaja zała, stałovaja, jakaja pa kancepcyi nahadaje haradskija bistro. Administracyjnyja pamiaškańni zrobiać z prazrystymi ścienami z kalarovaha škła, kab ścierci hrań pamiž vučniem i nastaŭnikam.
Dach škoły taksama budzie ekspłuatavacca: tam stvorać zony adpačynku dla małodšych i starejšych kłasaŭ.
«Dynasad» płanujuć zdać da kanca 2023 hoda. A da kanca 2024-ha budzie ŭviedzieny ŭ ekspłuatacyju i «Art Park». Pobač ź im, darečy, abiacajuć adkryć jašče adnu škołu z troch karpusoŭ, jakuju nazavuć «Kibierdalinaj». Ich abjadnaje ahulnaja spartyŭnaja zona, adzinaja kancepcyja dobraŭparadkavańnia terytoryi i stylistyka fasada.
Zabudoŭščyk uzvodzić usie hetyja abjekty za svoj košt. Paśla zaviaršeńnia budaŭnictva ich pieradaduć na bałans horada, a ŭžo ŭ Ministerstvie adukacyi buduć raźmiarkoŭvać miescy.
