Skryn videa
Zavajoŭvać Daloki Uschod składaniej, čym Sankt-Pieciarburh ci inšy zachodni rehijon, piša vydańnie, bo supraćlehły kraj Rasii vielmi ciesna supracoŭničaje z Kitajem. Tamu tam i vybar bolšy, i ceny nižejšyja. I tym nie mienš MAZ sprobu zrabiŭ.
Pryvieźli abnoŭlenuju madel «MAZ-203». Ale, niahledziačy na dobryja paramietry, chabaraŭcaŭ nie zadavoliła cana — 15 miljonaŭ. Bonusam — subsidyi sumiesna ź Minpramtorham Biełarusi, vychodzić ekanomija da paŭtara miljona rubloŭ.
Tyja pradprymalniki, jakija karystajucca MAZami, skardziacca na toje, što kamplektujučyja vymušany čakać doŭha.
— U našaha pieravozčyka IP Šaduja jość inšyja aŭtobusy hetaha vytvorcy. I kamplektujučyja jana vymušany čakać nie adzin tydzień, a heta straty. Tamu pytańnie z absłuhoŭvańniem staić vostra, — vykazaŭsia Uładzimir Aščanoŭski, načalnik upraŭleńnia pramysłovaści, suviazi i transpartu.
Ale hałoŭnaje, pradprymalnikaŭ źbiantežyła cana. U minułym miesiacy adzin ź miascovych pieravozčykaŭ zaklučyŭ kantrakt z kitajskim zavodam, i tam siaredniaja cana transpartu skłała vosiem miljonaŭ rubloŭ — u dva razy mienš.
— Vielmi šmat zaležyć ad cany. Ciapier jana vielmi zavyšana — razy ŭ dva jaje treba źnižać. A tak aŭtobus cikavy. Choć i kamplektujučyja taksama biantežać. Skazali, što terminy minimalnyja, a potym akažacca, što i miesiac daviadziecca čakać pastaŭki.
Vyśvietliłasia, što i pamier aŭtobusa nie padychodzić da vulic horada — vielmi doŭhija, «patrebnyja karaciejšyja na mietr-dva, a to i dva z pałovaj». Bo ŭ Chabaraŭsku pavaroty ŭ centry horada vielmi krutyja.
U Chabaraŭsku štohod adbyvajecca abnaŭleńnie aŭtobusaŭ dla pieravozu pasažyraŭ. Na biahučy momant, jak zapeŭnivaje meryja, u horadzie kala 30 pracentaŭ hramadskaha transpartu z terminam ekspłuatacyi bolš za siem hadoŭ. Adnak z 2026 hoda pad zabaronaj akažucca ŭsie aŭtobusy starejšyja za dziesiać hadoŭ.
Biełaruski «MAZ-203» zaraz demanstrujecca transpartnym pieravozčykam pa ŭsioj Rasii. Prahon startavaŭ ad Maskvy, pabyvaŭ aŭtobus va Ułan-Ude i ŭ Błahavieščansku, dajechaŭ da Chabaraŭska. Na nastupnym tydni «MAZ-203» adpravicca va Uładzivastok.