Praces, jaki vioŭ sudździa Vital Łabocki, pačaŭsia jašče 28 krasavika 2022 hoda, ale razhlad prypynili dla praviadzieńnia kompleksnych linhvistyčnych ekśpiertyz. 20 vieraśnia ŭ pracesie abviaścili čarhovy pierapynak, kab dać mahčymaść abvinavačanamu spłacić materyjalnyja kampiensacyi maralnaj škody paciarpiełym.
Alaksandra Durajeva zatrymali napačatku studzienia 2022 hoda. Utrymlivaŭsia da suda ŭ hrodzienskaj turmie № 1.
Na videa pieratrusu doma Alaksandra na kanale HUBAZiKa pakazali pistalet, patrony i časopisy z aholenymi žančynami. Hrodzieniec rastłumačyŭ, što patrony jon pryvioz z Manholii, jany ŭ jaho zachoŭvajucca z 1990-ha. Jaki zakon jon parušyŭ časopisami i čamu na ich źviarnuli ŭvahu, siłaviki nie abhruntavali.
U vinu Durajevu taksama raźmiaščeńnie na asabistaj staroncy ŭ «Adnakłaśnikach» materyjałaŭ z łahatypami i nadpisami «Biełsat», Tut.by, «Zierkała», «Nechta» (resursy pryznanyja ekstremisckimi materyjałami).
U chodzie sudovaha pracesu ahučvalisia vyniki šmatlikich linhvistyčnych ekśpiertyz. Tak, ekśpiertyza pryznała niehatyŭnymi vykazvańni ŭ dačynieńni da Alaksandra Łukašenki: «psichapat», «zvarjacieły», «karnik i dyktatar», «žyvioła» i dziasiatki inšych, nazvała ich nienarmatyŭnaj formaj maŭlenčaha vykazvańnia. Niekatoryja vyrazy pryznanyja nieprymalnaj formaj vykazvańnia. Ich pieralik źmiaščajecca na niekalkich dziasiatkach staronak spravy.
Doktara abvinavacili ŭ abrazie pradstaŭnika ŭłady (art. 369), abrazie i paklopie na Alaksandra Łukašenku (č. 1 art. 368 i č. 2 art. 367), a taksama ŭ niezakonnych dziejańniach u dačynieńni da ahniastrelnaj zbroi, bojeprypasaŭ i vybuchovych rečyvaŭ (č. 2 art. 295 Kryminalnaha kodeksa), i pa sukupnaści pakarańniaŭ 29 vieraśnia kančatkova pryznačyli pazbaŭleńnie voli terminam na try hady ŭ kałonii va ŭmovach ahulnaha režymu.
