Pryjšła pozva z vajenkamata. Što rabić?
Artykułam 10 Zakona «Ab vajskovym abaviazku i vajskovaj słužbie» praduhledžany nastupny pieralik uvažlivych pryčyn niajaŭki pa poźvie ci nakiravańni:
— kalectva (ranieńnie, traŭma, kantuzija) abo zachvorvańni, źviazanyja sa strataj pracazdolnaści;
— ciažki stan zdaroŭja baćki, maci, ajčyma, mačachi, žonki, muža, syna, dački, rodnych brata ci siastry, dzieda, babuli, apiekuna abo ŭdzieł u pachavańni nazvanych asob;
— pieraškoda, jakaja ŭźnikła ŭ vyniku dziejańnia niepieraadolnaj siły, ci inšaja akaličnaść, jakaja nie zaležyć ad vašaj voli;
— inšyja pryčyny, pryznanyja ŭvažlivymi pryzyŭnoj kamisijaj (vajennym kamisaram, kiraŭnikom adasoblenaha padraździaleńnia, orhana dziaržaŭnaj biaśpieki) abo sudom.
Pry hetym pryčyny nieźjaŭleńnia pavinny być paćvierdžanyja dakumientalna.
Jakaja isnuje adkaznaść, kali nie pajści ŭ vajenkamat paśla atrymańnia pozvy?
Niajaŭka moža traktavacca jak uchileńnie ad mierapryjemstvaŭ pryzyvu na vajskovuju słužbu, što ŭtvaraje skład złačynstva (artykuł 435 Kryminalnaha kodeksa).
«Varta adznačyć, što artykuł 435 Kryminalnaha kodeksa mocna pierahukajecca z artykułam 26.1 Kodeksa ab administracyjnych pravaparušeńniach, dzie taksama vyznačanaja adkaznaść za niajaŭku pa poźvie abo nakiravańni.
Adnak administracyjnaja adkaznaść nadychodzić tolki ŭ tym vypadku, kali takaja niajaŭka nie pieraškodziła pryniaćciu i (abo) realizacyi rašeńnia pryzyŭnoj kamisii (vajennaha kamisara) ab vykanańni hramadzianinam vajskovaha abaviazku», — tłumačać jurysty LegalHub.
Na praktycy, vierahodna, kryminalnaja adkaznaść budzie nastupać u tym vypadku, kali niajaŭka abo inšyja dziejańni pryviali da taho, što čałaviek nie byŭ pryzvany ŭ vyznačanyja terminy ŭ vyznačanym paradku.
«Administracyjnaja adkaznaść nastupić u tym vypadku, kali asoba ŭsio-taki prybyła ŭ vajenkamat, chaj i ź niejkim spaźnieńniem», — kažuć jurysty.
Taksama varta adznačyć, što ŭ Kryminalnym kodeksie adroźnivajucca ŭchileńnie ad mierapryjemstvaŭ pa pryzyvie na terminovuju vajskovuju słužbu i ŭchileńnie ad mierapryjemstvaŭ pa pryzyvie pa mabilizacyi: u pieršym vypadku, u zaležnaści ad abstavin, pahražaje pakarańnie ŭ vyhladzie pazbaŭleńnia voli na termin da 5 hadoŭ, u druhim, niezaležna ad abstavin, — na termin da 7 hadoŭ.
Ci pavinien čałaviek iści ŭ vajenkamat, kali jamu adtul patelefanavali i skazali źjavicca?
Zhodna z punktam 13 Pałažeńnia ab pryzyvie hramadzian na terminovuju voinskuju słužbu, słužbu ŭ reziervie, zaćvierdžanaha Pastanovaj Savieta Ministraŭ ad 04.11.2019 №741, paviedamleńnie hramadzianam ab nieabchodnaści ich jaŭki na mierapryjemstvy pa pryzyvie pravodzicca šlacham nakiravańnia piersanalnych pozvaŭ vajennaha kamisaryjata, u jakich paznačajucca terminy jaŭki hramadzian na hetyja mierapryjemstvy.
Uručeńnie pozvaŭ pad raśpisku ab nieabchodnaści jaŭki na mierapryjemstvy pa pryzyvie ŭskładajecca na arhanizacyi, jakija ažyćciaŭlajuć ekspłuatacyju žyllovaha fondu i (abo) akazvajuć žyllova-kamunalnyja pasłuhi, miascovyja vykanaŭčyja i rasparadčyja orhany, u jakich viadziecca piersanalna-pieršasny ŭlik pryzyŭnikoŭ, ustanovy adukacyi.
«Zhadanyja pozvy mohuć uručacca hramadzianam pa miescy ich pracy, a taksama rabotnikami vajennych kamisaryjataŭ i inšymi ŭpaŭnavažanymi imi asobami pa miescy znachodžańnia hramadzian.
Takim čynam, z analizavanych normaŭ nie vynikaje, što vyklik u vajenkamat moža rabicca pa telefonnym zvanku. Zvyčajna ŭ zakanadaŭstvie takija vypadki prapisvajucca», — tłumačać jurysty LegalHub.
Naprykład, u artykule 242 KPK paznačana, što abvinavačany moža być vyklikany z vykarystańniem i inšych srodkaŭ suviazi.
«Tady my razumiejem, što telefonny zvanok śledčaha źjaŭlajecca naležnym paviedamleńniem i ŭ vypadku niajaŭki pa im nadychodzić adkaznaść, — kažuć jurysty. —
Cikavaść taksama ŭjaŭlaje pałažeńnie ab tym, što ŭ miascovych srodkach masavaj infarmacyi publikujucca vypiski z rašeńniaŭ vykanaŭčych i rasparadčych orhanaŭ ab nieabchodnaści jaŭki na mierapryjemstvy pa pryzyvie hramadzian, jakija nie atrymali paviestki.
Adnak u KaAP praduhledžanaja adkaznaść za niajaŭku na mierapryjemstvy pa pryzyvie tolki pa poźvie abo nakiravańni vajennaha kamisaryjata. Heta značyć, što da administracyjnaj adkaznaści pryciahnuć asobu, jakoj «paviedamili» takim čynam, niemahčyma».
U kryminalnym pracesie kopii takich publikacyj u ŚMI mohuć być daśledavanyja ŭ jakaści adnoj (ale nie adzinaj) krynicy dokazaŭ abvinavačańnia.
Taksama zhodna z artykułam 39 Zakona ad 05.11.1992 №1914-XII «Ab vajskovym abaviazku i vajskovaj słužbie», apaviaščeńnie hramadzian, jakija padlahajuć pryzyvu na vajskovuju słužbu, słužbu ŭ reziervie, jakija nie atrymali pozvaŭ abo nakiravańniaŭ vajennaha kamisaryjata abo inšaha orhana, ažyćciaŭlajecca zakaznym listom pa ich miescy žycharstva z apaviaščeńniem ab jaho ŭručeńni.
«Z sensu normy nie zrazumieła, ci budzie ličycca ŭručeńnie pozvy inšaj asobie naležnym apaviaščeńniem hramadzianina. Pałažeńni hetaha artykuła možna tłumačyć dvajaka», — kažuć jurysty LegalHub.
Patelefanavali z vajenkamata dla źvierki danych. Ci pavinien čałaviek ich davać?
Abaviazku davać takuju infarmacyju ŭ telefonnym režymie niama.
«Ale ŭ ciapierašnich realijach pry vialikim žadańni admova ŭ davańni infarmacyi moža być interpretavanaja jak niepadparadkavańnie zakonnym patrabavańniam słužbovaj asoby (artykuł 24.3 KaAP)», — ličać jurysty.
Što rabić, kali źvierka danych na pracy, a čałaviek nie choča ich davać?
Usie pryzyŭniki i vajennabaviazanyja padlahajuć vajskovamu ŭliku. Ad žadańnia supracoŭnika ničoha nie zaležyć.
Vajskovaja słužba maje pryjarytet nad pracoŭnaj, tamu najmalnik abaviazany zabiaśpiečyć paŭnatu i dakładnaść vajskovaha ŭliku pryzyŭnikoŭ i vajennaabaviazanych, jakija pracujuć u arhanizacyjach.
U arhanizacyjach z hetaj metaj pryznačajucca asoby, adkaznyja za vajskovy ŭlik. Jany abaviazanyja praviarać pry pryjomie na pracu dakumienty vajskovaha ŭliku: u pryzyŭnikoŭ — paśviedčańni pryzyŭnikoŭ, a ŭ vajennaabaviazanych — vajskovyja bilety.
U miesiačny termin z dnia pryniaćcia vajennaabaviazanaha na pracu ŭ vajenny kamisaryjat pieradajucca źviestki ab im pa vyznačanaj formie.
«Kožny hod da 1 śniežnia najmalnikam pradastaŭlajucca ŭ vajenny kamisaryjat śpisy hramadzian mužčynskaha połu, jakija padlahajuć prypiscy da pryzyŭnych učastkaŭ u nastupnym kalandarnym hodzie», — kažuć jurysty.
Asabistyja kartki pryzyŭnikoŭ i vajennaabaviazanych taksama štohod spraŭdžvajucca z zapisami ŭ paśviedčańniach pryzyŭnikoŭ i vajskovych biletach, a taksama dajucca dla źvierki ŭ dziaržaŭnyja orhany.
Usie abaviazki najmalnika ŭ halinie vajskovaha ŭliku vyznačanyja Pastanovaj Savieta Ministraŭ Respubliki Biełaruś ad 18.12.2003 №1662 (red. ad 31.08.2021) «Ab zaćviardžeńni Pałažeńnia ab vajskovym uliku».
«Za parušeńnie słužbovaj asobaj abaviazkaŭ pa vajskovym uliku praduhledžanaja administracyjnaja adkaznaść u vyhladzie štrafu (ad 4 da 5 bazavych vieličyń) zhodna z artykułam 26.3 KaAP.
Takim čynam, adziny sposab paźbiehnuć uliku danych z boku najmalnika — nie ŭładkoŭvacca na pracu», — tłumačać jurysty.
Akramia taho, na najmalniku lažyć abaviazak zabiaśpiečvać vajennaabaviazanym mahčymaść svoječasovaj jaŭki pa pozvach u vajennyja kamisaryjaty.
Za nieapaviaščeńnie hramadzian ab vykliku ŭ vajenny kamisaryjat abo niezabieśpiačeńnie im mahčymaści svoječasovaj jaŭki pa vykliku zakanadaŭstvam praduhledžana administracyjnaja adkaznaść słužbovaj asoby zhodna z artykułam 26.2 KaAP u vyhladzie štrafu (da troch bazavych vieličyniaŭ).
Važna adznačyć, što ŭ sučasnaj Biełarusi navat hetyja zakony mohuć traktavacca siłavymi orhanami advolna.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«U našaj arhanizacyi 70% atrymali pozvy»: što viadoma pra schavanuju mabilizacyju ŭ Biełarusi
«U tym liku šlacham užyvańnia vajennaj siły». Minsk pahražaje Ukrainie, Polščy i Litvie kompleksam «previentyŭnych mier stratehičnaha strymlivańnia»
«Miarzotniki śviatoje padstaŭlajuć». Łukašenka vystupiŭ z zajavami pra padzieńnie rakiety ŭ Polščy
