Alaksandr Rusiecki. Fota: gazeta.ru
U padmaskoŭnym Damadziedava 16 listapada znajšli cieła 63-hadovaha biznesoŭca, zabitaha strełam u hałavu. Jak paviedamlajecca, zabity — uradženiec Biełarusi Alaksandr Rusiecki. Jon byŭ zasnavalnikam TAA «Komtrans», TAA «Inforkom-avtosiervis», TAA «Tiechničieskij cientr Inforkom», jakija pradastaŭlajuć pasłuhi pa ramoncie i prodažy aŭtazapčastak dla hruzavych aŭtamabilaŭ.
Zabojstva Rusieckaha ŭžo samo pa sabie nahadvaje pra «lichija 1990-ja», kali rasijski biznes ciesna splataŭsia z mafijaj i siłavymi strukturami, a ekanamičnyja pytańni ŭ tym liku vyrašalisia pry dapamozie zbroi. Adnak heta tolki adzin epizod u šerahu śmierciaŭ rasijskich biznesmienaŭ i top-mieniedžaraŭ u 2022 hodzie. I daloka nie samaja značnaja i zahadkavaja. Kala pałovy z zahinułych top-mieniedžaraŭ vyrašyli ździejśnić suicyd, a jašče ŭ čverci apynulisia prablemy z sercam. Prykładna pałova raptoŭna pamierłych była źviazana z naftahazavaj halinoj.
Śmierci ŭ naftahazie
29 studzienia ŭ svaim asabniaku ŭ Leninhradskaj vobłaści byŭ znojdzieny miortvym 60-hadovy kiraŭnik transpartnaj słužby «Hazprom inviesta» Leanid Šulman. Jon znachodziŭsia na balničnym z traŭmaj nahi. Cieła znajšli ŭ vannym pakoi z nažom i pieradśmiarotnaj zapiskaj, u jakoj havaryłasia, što top-mieniedžar praz traŭmu nahi nie choča być «kłopatam».
Mienš čym praź miesiac, 25 lutaha, u elitnym pasiołku Leninskaje ŭ haražy paviesiŭsia jašče adzin top-mieniedžar «Hazproma» Alaksandr Ciulakoŭ. Na momant śmierci jon zajmaŭ pasadu namieśnika hiendyrektara adzinaha raźlikovaha centra kampanii — miascovaha kaznačejstva.
18 krasavika ŭ ich maskoŭskaj kvatery znajšli cieły byłoha vice-prezidenta «Hazprombanka» Uładzisłava Avajeva, jaho žonki i 13-hadovaj dački. Pavodle viersii śledstva, bankir zastreliŭ blizkich, a paśla skončyŭ žyćcio samahubstvam. Paśla sychodu z «Hazprombanka» Avajeŭ byŭ saŭładalnikam TAA«Karboniks» — vytvorcy kościezamiaščalnych vuhlarodnych impłantaŭ. Taksama jon vałodaŭ dolaj u TAA «RT-Karbon», jakaja naležyć «Rostiechu».
Alaksandr Ciulakoŭ, Uładzisłaŭ Avajeŭ i Juryj Voranaŭ. Kałaž: novayagazeta.ru / kp.ru / life.ru
4 lipienia hiendyrektar padradčyka «Hazproma» na arktyčnych prajektach — kampanii «Astra Šippinh» Juryj Voranaŭ byŭ znojdzieny miortvym u basiejnie na terytoryi ŭłasnaha ŭčastka ŭ pasiołku na bierazie Finskaha zaliva. U jaho była prastrelenaja hałava.
Zakranuli śmierci i inšyja kampanii haliny. Tak, 1 vieraśnia pad voknami Centralnaj kliničnaj balnicy znajšli cieła staršyni rady dyrektaraŭ «Łukojła» Ravila Mahanava. Na lačeńnie jon trapiŭ praz prablemy z sercam, a potym, na dumku pravaachoŭnikaŭ, vykinuŭsia z balničnaha akna.
Raniej, 8 maja, u padvale pryvatnaha doma pad Myciščami byŭ znojdzieny miortvym Alaksandr Subocin — były člen praŭleńnia TAA «Torhovyj dom «Łukojł», jaki staŭ zatym uładalnikam «Novoj transportnoj kompanii». Nibyta jon pryjechaŭ da šamana ŭ stanie mocnaha ałkaholnaha i narkatyčnaha apjanieńnia dla praviadzieńnia «antypachmielnych» rytuałaŭ. Aficyjna ž Subocin pamior ad sardečnaj niedastatkovaści.
Akramia taho, 7 lutaha ŭ Arhiencinie zahinuŭ kiraŭnik finansava-ekanamičnaha ŭpraŭleńnia inviestycyjnaha chołdynha «TAIF» (uvachodzić u naftahazachimičny chołdynh «Sibur») Dźmitryj Ciaślenka. Padčas uzychodžańnia na haru jon adčuŭ siabie drenna, straciŭ prytomnaść i pamior ad spynieńnia serca.
3 sakavika ŭ svaim asabniaku ŭ Anhlii byŭ znojdzieny paviešanym Michaił Uotfard (jon ža Taŭstašeja). Palicyja nie paličyła jaho śmierć «vyklikajučaj padazreńni», ale i matyŭ suicydu patłumačyć nie mahła, paviedamlała «Daily Mail». Uotfard zarabiŭ bahaćcie na zdabyčy nafty i hazu ŭ Rasii, a ŭ pačatku 2000-ch emihravaŭ u Vialikabrytaniju, dzie źmianiŭ proźvišča i zaniaŭsia nieruchomaściu.
U krasaviku palicyja Ispanii na elitnaj vile ŭ kurortnym Loret-de-Mar vyjaviła cieły byłoha top-mieniedžara «Novateka» Siarhieja Pratasieni, jaho žonki i dački. Pobač ź biznesmienam byli znojdzienyja siakiera i nož. Pa viersii ispanskaj palicyi, Pratasienia spačatku zabiŭ svaju siamju, a potym skončyŭ žyćcio samahubstvam. Jon z 2002 hoda byŭ hałoŭnym buchhałtaram «Novateka», a ŭ 2015 hodzie ŭvachodziŭ u skład praŭleńnia.
Siarhiej Pratasienia z žonkaj
Ad miedycyny da fast-fudu
Ale hinuli top-mieniedžary nie tolki ŭ naftahazavaj halinie. Tak, 8 lutaha stała viadoma pra śmierć 43-hadovaha hiendyrektara Karparacyi raźvićcia Dalokaha Uschodu i Arktyki Ihara Nosava — jon pamior u reanimacyi paśla insultu. 10 vieraśnia pamior jašče adzin pradstaŭnik hetaj ža karparacyi — dyrektar avijacyjnaj haliny Ivan Piačoryn. Jon na chadu vypaŭ z katara ŭ Japonskim mory. Darečy, u śfieru dziejnaści karparacyi ŭvachodzić u tym liku i dapamoha ŭ realizacyi inviestprajektaŭ u naftahazavaj halinie.
Ihar Nosaŭ, Uładzimir Habryjelan, Dźmitryj Kanaploŭ. Kałaž: government-nnov.ru / eg.ru / tula.kp.ru
23 sakavika ŭ Nižnim Noŭharadzie znajšli miortvym dyrektara bujnoj miedycynskaj kampanii «Miedstom» Vasila Mielnikava, a taksama jaho žonku i dvuch dziaciej — va ŭsich byli nažavyja ranieńni. Pa adnoj ź viersij, biznesmien moh zabić siabie i svaju siamju.
6 červienia ŭ Nienieckaj aŭtanomnaj akruzie zahinuli pieršy namieśnik hiendyrektara VK Uładzimir Habryjelan i dyrektar kampanii pa zakupkach Siarhiej Mierźlakoŭ, jakija znachodzilisia ŭ ekśpiedycyi pa bierazie Biełaha mora. Pry sprobie pierapravicca praz raku ich usiudychody pierakulilisia, i płyń paniesła ich u mora.
16 červienia ŭ svaim domie ŭ Padmaskoŭi znajšli cieła byłoha hiendyrektara dziaržkampanii «Rosvooružienije», jakaja zajmałasia ekspartam i impartam zbroi (ciapier — «Rosoboroneksport») Alaksieja Aharova. Bačnych prykmiet hvałtoŭnaj śmierci nie vyjavili.
23 lipienia ŭ Tule pamior dyrektar kanstruktarskaha biuro pryborabudavańnia Dźmitryj Kanaploŭ. Jon pamior u pryvatnaj klinicy padčas sieansu ksienaterapii — udychańnia iniertnaha hazu ksienonu.
28 vieraśnia stała viadoma pra śmierć Paŭła Pčelnikava, top-mieniedžara RČ, jaki zajmaŭ pasadu dyrektara pa kamunikacyjach u daččynaj kampanii TAA «Cifrovaja łohistika», jakaja śpiecyjalizujecca na hruzavych pieravozkach. Trup mužčyny znajšli na bałkonie jaho kvatery. Aficyjnaja viersija miarkuje suicyd.
31 kastryčnika ŭ Maskvie ŭ elitnym žyłym kompleksie «Vorobjovy hory» znajšli miortvym 39-hadovaha biznesoŭca Arcioma Asłaniana. Cieła z kulavym ranieńniem vyjaviŭ supracoŭnik kamunalnych słužbaŭ. Asłanian byŭ zasnavalnikam i suzasnavalnikam kampanij pa dastaŭcy rołaŭ «Bluefin», sietki kafe tureckaj kuchni «Istanbuł Kiebab», firmy pa kiejterynhu «Moskou Fud», kampanij «Park Mieniedžmient» i «Kurskaja płoŝad́».
Amal niama infarmacyi
Jak adznačaje rasijskaja žurnalistka Viktoryja Paŭłava, bolšaść hetych śmierciaŭ abjadnoŭvaje «amal poŭnaja adsutnaść infarmacyi ab chodzie śledstva».
«Zaŭsiody ŭsio zaviaršajecca publikacyjaj papiaredniaj infarmacyi. I zahadkavym čynam vinavatyja ŭ hibieli zaŭsiody akazvajucca… užo miortvyja. Hetyja vypadki nie kamientuje nichto ź viadomych ludziej. Časam tolki prabivajucca abryŭki infarmacyi ab davoli dziŭnym chodzie rasśledavańnia», — piša žurnalistka.
U kamientary «Biełsatu» ekśpiert u naftahazavaj śfiery Michaił Krucichin adznačyŭ, što budavać zdahadki ab pryčynach šerahu śmierciaŭ top-mieniedžaraŭ i bujnych biznesoŭcaŭ, u pryvatnaści, u naftahazavaj śfiery, «na adlehłaści i biez dastatkovaj infarmacyi» niemahčyma.
«Naŭmysnyja zabojstvy praktykavalisia ŭ rasijskaj naftahazavaj halinie na davoli doŭhim praciahu času, pačynajučy z 1990-ch hadoŭ. Heta było. Ale što adbyłosia ŭ kožnym kankretnym vypadku ciapier, kali adsutničaje infarmacyja, ja skazać nie mahu», —padkreśliŭ ekśpiert.
Ekanamist z zasnavanaha lidaram rasijskaj apazicyi Alaksiejem Navalnym Fondu baraćby z karupcyjaj Mikita Kułačenkaŭ taksama nie vyklučyŭ, što ŭ bolš ciažkija časy ludzi mohuć pamirać čaściej.
Čytajcie taksama:
«Kali Šroder byŭ kancleram, Pucin razmaŭlaŭ ź im jak ź dzienščykom»
