Fota: James Duncan Davidson pa licenzii CC BY-NC 3.0
U Twitter panuje chaos.
Kampanija zvolniła tysiačy svaich inžynieraŭ, a taksama tysiačy padradčykaŭ, adkaznych za baraćbu z dezynfarmacyjaj i škodnym kantentam.
U toj ža čas zvolnilisia kiraŭnik adździeła infarmacyjnaj biaśpieki i kiraŭnik adździeła davieru i biaśpieki, raptam pakinuli svaje pasady hałoŭnyja śpiecyjalisty pa pryvatnaści i zachavańni narmatyŭnych patrabavańniaŭ, a taksama inšyja top-mieniedžary kampanii.
A što robić novy ŭładalnik Twitter?
Iłan Mask adpužvaje rekłamadaŭcaŭ svaimi dziŭnymi pavodzinami, bo pryniatyja im rašeńni dazvolili machlaram vydavać siabie za bujnyja brendy i publikavać tvity, jakija nanieśli nieźličonuju škodu reputacyi kampanij, i jany stracili miljardy.
Jakaja apošniaja pamyłka Twitter? Niepradumanaja inicyjatyva Maska pa pazbaŭleńni Twitter ad «nahruvaščvańniaŭ», padobna, vypadkova zabłakavała častku karystalnikaŭ na niekatory čas, bo dvuchfaktarnaja aŭtentyfikacyja na asnovie SMS była vypadkova adklučanaja.
Padobna da taho, što kamuści zahadali vyrvać kavałak koda z Twitter, a jon prosta nie zrazumieŭ usioj składanaści sistemy — proćmy ŭzajemasuviaziej i nastupstvaŭ, jakija adno źmianieńnie moža mieć dla inšych častak sajta.
Adzinymi ludźmi, zdolnymi zrazumieć hetyja suviazi i zaležnaści pamiž sistemami Twitter i papiaredzić pra mahčymyja nastupstvy, chutčej za ŭsio, jość tyja, kaho Twitter užo zvolniŭ. A kali jany ŭsio jašče pracujuć u kampanii, jość imaviernaść, što novy bos Twitter ich nie pasłuchaje.
Takim čynam, što heta značyć dla vas, kali vy karystalnik Twitter? Ja, jak karystalnik Twitter, kažu, što mianie heta turbuje.
Tamu što, choć bolšaja častka taho, što ja rablu ŭ Twitter źjaŭlajecca publičnym, za amal 15 hadoŭ majoj aktyŭnaści na płatformie ŭ mianie było šmat asabistych hutarak z dapamohaj asabistych paviedamleńniaŭ.
Ja nie mahu ŭzhadać usio, što ja kazaŭ u hetych hutarkach, abo što ludzi mahli adkazać mnie.
Kali Twitter nastolki nie chvalujecca, kab parušyć pracu dvuchfaktarnaj aŭtentyfikacyi dla niekatorych svaich karystalnikaŭ, to jakuju pamyłku jon moža ździejśnić nastupnym razam? Kali ekśpierty pa biaśpiecy Twitter albo zvolnienyja, albo dumajuć pra pošuk novaj pracy, a nie pra samu pracu, to nakolki biaśpiečnyja maje danyja ŭ Twitter?
Imaviernaść taho, što Twitter zrobić miehapamyłku ŭ sistemie biaśpieki abo pacierpić ad uzłomu, dla abarony ad jakoha ŭ jaho prosta nie chopić dośviedu, vielmi małaja, ale jana isnuje. I hetaja imaviernaść siońnia zdajecca značna bolšaj, čym da taho, jak Iłan Mask kupiŭ kampaniju.
Ja ničoha nie mahu zrabić, kab Twitter staŭ bolš biaśpiečny. Ale ja mahu pamienšyć patencyjnuju ryzyku dla siabie, vydaliŭšy svaje asabistyja pierapiski.
Vydaleńnie paviedamleńnia. Fota: grahamcluley.com
Mnie nie patrebnyja ŭsie hetyja staryja hutarki, ich možna ścierci. Ich varta vydalić.
Heta pracajomki praces, Twitter nie daje vam aŭtamatyčnaha sposabu zrabić heta, ale ja lepš vydalu ich pa adnoj, čym adnojčy adkryju dla siabie, što maje pierapiski znachodziacca ŭ rukach chakiera abo pakryŭdžanaha supracoŭnika Twitter.
Niekalki dumak na zaklučeńnie.
- Zaachvočvajcie svaich siabroŭ pa Twitter vydalać svaje DM-paviedamleńni, kab «abodva baki» razmovy byli ściortyja.
- Navat kali Twitter nie vydalaje ich, u vypadku ŭzłomu vašaha akaŭnta paviedamleńni nie pavinny być lohka dastupnyja chakieru.
- Kali Twitter zachoŭvaje vašy asabistyja paviedamleńni navat paśla taho, jak vy paprasili vydalić ich, ci źjaŭlajecca heta patencyjnym (darahim dla kampanii) parušeńniem GDPR?
- Kali vy chočacie zachavać vaš tvitar-archiŭ, to padumajcie pra toje, kab zapytać pra jaho zaraz (instrukcyja — tut).
Jak adznačaje časopis Forbes, viarnuć davier da płatformy mahło b skraznoje šyfravańnie. Chodziać čutki, što Iłan Mask płanuje dadać jaho ŭ asabistyja paviedamleńni ŭ novy pakiet padpiski Twitter Blue za 8 dalaraŭ u miesiac.
