Pa słovach 27-hadovaha Mikity Čybryna, jon pravioŭ va Ukrainie bolš za čatyry miesiacy ŭ składzie 64-j asobnaj hvardziejskaj motastrałkovaj bryhady — taho samaha padraździaleńnia, jakoje abvinavačvajuć u ździajśnieńni vajennych złačynstvaŭ pad Kijevam u sakaviku hetaha hoda.
U telefonnaj razmovie z karespandentam haziety jon zajaviŭ ab svajoj niedatyčnaści da vajennych złačynstvaŭ, u jakich abvinavačvajuć jaho padraździaleńnie, skazaŭšy, što za čas znachodžańnia va Ukrainie jon nie ździejśniŭ nivodnaha strełu.
Pa jaho słovach, jon poŭny rašučaści dać pakazańni ŭ mižnarodnym sudzie pra ŭsio, što bačyŭ va Ukrainie. «Mnie chavać niama čaho», — skazaŭ jon.
«Heta złačynnaja vajna, jakuju raźviazała Rasija. Ja chaču zrabić usio, što ad mianie zaležyć, kab spynić jaje», — skazaŭ jon.
Čybryn raspavioŭ, što pryniaŭ rašeńnie ŭciakać z Rasii paśla taho, jak u červieni dezierciravaŭ sa svajho atrada. Pavodle jaho słoŭ, jon abviaściŭ svaim kamandziram, što suprać vajny, u pieršy ž dzień uvarvańnia, 24 lutaha.
Pavodle jaho apoviedu, paśla taho, jak jon vykazaŭ usłych svaju pazicyju, jaho vyvieli sa składu padraździaleńnia, dzie jon słužyŭ u jakaści miechanika, i adpravili zajmacca fizičnaj pracaj.
«Jany pahražali mnie turmoj, — raspavioŭ Čybryn. — Urešcie maje kamandziry vyrašyli vykarystać mianie ŭ jakaści prybiralščyka i hruzčyka. Mianie adpravili ŭ tył».
Mikita Čybryn rodam ź Jakucka. Jak jon kaža, na słužbu ŭ armiju pajšoŭ letam 2021 hoda ŭ suviazi ź finansavymi ciažkaściami nie dumajučy, što jamu daviadziecca ŭdzielničać u jakoj by tam ni było vajnie.
Na terytoryi Ukrainy jon apynuŭsia ŭ pieršy ž dzień vajny, zajechaŭšy tudy praź Biełaruś: ź jaho słoŭ, im nichto nie paviedamiŭ, kudy i navošta ich viazuć.
Jaho padraździaleńnie raźmiaščałasia ŭ vioscy Lipaŭka, za 45 km ad Kijeva, niepadalok ad Bučy i Andrejeŭki — dźviuch viosak, dzie ździajśnialisia masavyja źvierstvy ŭ adnosinach da mirnaha nasielnictva. U hetych złačynstvach abvinavačvajecca 64-ja bryhada, u jakoj słužyŭ Čybryn. Paśla taho, jak ab złačynstvach u Bučy daviedaŭsia ŭvieś śviet, Pucin prysvoiŭ hetaj bryhadzie zvańnie hvardziejskaj.
Pa słovach Čybryna, choć jon asabista nie bačyŭ rasstrełaŭ mirnych žycharoŭ u toj čas, kali znachodziŭsia ŭ Lipaŭcy, ale razmovy ab zabojstvach i zhvałtavańniach hučali pastajanna, a rabavańnie ŭkrainskich damoŭ było zusim rucinnaj spravaj.
«Jany krali ŭsio, što tolki mahli: pralnyja mašyny, elektroniku, usio», — kaža jon.
Čybryn kaža, što jamu ŭdałosia źbiehčy 16 červienia, schavaŭšysia ŭ hruzaviku, jaki adpraviŭsia ŭ Rasiju dla papaŭnieńnia zapasaŭ charčavańnia.
Praź niekatory čas jon naładziŭ kantakt z pravaabaroncami, jakija dapamahli jamu vyjechać z krainy. Zasnavalnik pravaabarončaj arhanizacyi Gulagu.net Uładzimir Asiečkin u hutarcy z Guardian paćvierdziŭ, što sapraŭdy dapamoh Čybrynu pakinuć Rasiju.
Jak piša vydańnie, u hety aŭtorak Čybryn prylacieŭ u Madryd. Uviečary ŭ čaćvier jon byŭ adpuščany z centra časovaha ŭtrymańnia mihrantaŭ i źmieščany ŭ časovaje žyllo na čas razhladu jaho prašeńnia ab prytułku.
Hazieta adznačaje, što nie vałodaje niezaležnym paćviardžeńniem historyi, raskazanaj vajskoŭcam. Adnak jon pradstaviŭ dakumienty i fotazdymki, jakija śviedčać ab tym, što jon znachodziŭsia ŭ składzie 64-j motastrałkovaj bryhady na terytoryi Ukrainy.
Čybryn — druhi viadomy rasijski vajskoviec, jaki ŭciok z krainy paśla taho, jak pabyvaŭ na vajnie va Ukrainie. Uletku hetaha hoda były rasijski desantnik Pavieł Fiłaćjeŭ, jaki taksama ŭdzielničaŭ va ŭvarvańni va Ukrainu, źjechaŭ z Rasii i apublikavaŭ knihu «ZOV», u jakoj raspavioŭ, što ź im adbyvałasia na vajnie.
