Ahniavaja padrychtoŭka na palihonie pad Brestam (ilustracyjnaje fota). Fota: MA Biełarusi / Telegram
U kastryčniku «Naša Niva» paviedamiła, što, pavodle krynic, Łukašenka pryniaŭ pryncypovaje rašeńnie pravieści ŭ Biełarusi patajemnuju mabilizacyju z metaj pavieličeńnia kolkaści bajavych čaściej. Jana budzie prachodzić pad vyhladam pravierki bojehatoŭnaści. Taksama stała viadoma, što žycharoŭ Homielščyny z pačatku vosieni stali masava vyklikać u vajenkamaty. Tady mnohija hramadzianie nie viedali, jak reahavać na pozvy i ci varta naviedvać vajenkamat.
«Fłahštok» pahavaryŭ z dvuma žycharami Homielskaj vobłaści, jakija vosieńniu 2022 hoda prajšli vajennyja zbory i mabilizacyjnyja vučeńni. Na ŭmovach ananimnaści vydańnie publikuje raspoviedy Alaksandra i Uładzimira (imiony źmienienyja).
Alaksandr (žychar rajonnaha centra) atrymaŭ pozvu na zbory ŭ pačatku kastryčnika i prachodziŭ ich na praciahu dvuch tydniaŭ u vojskach Sił śpiecyjalnych apieracyj.
«Na dany momant vajskovyja zbory nie majuć asablivaj masavaści. Zychodziačy z taho, što Siły śpiecyjalnych apieracyj jašče ni razu nie rabili zboraŭ, heta byŭ ich ekśpierymient, na jakim jany treniravalisia. Jany zabirali pradstaŭnikoŭ roznych śpiecyjalnaściaŭ: niechta pieravučvaŭsia na inšy VUS [vajenna-ulikovaja śpiecyjalnaść], a niechta (chto zastaŭsia na štatnych pasadach) adnaŭlaŭ stračanyja navyki.
Ja nie zaŭvažyŭ, kab viałasia padrychtoŭka da kankretnych dziejańniaŭ. Heta była kłasičnaja praca pa mietadyčkach SSSR, niejkaj vuzkanakiravanaj padrychtoŭki nie było. Adzinaja asablivaść vajskovych zboraŭ — treba było ŭkłaścisia ŭ pieryjad zboraŭ, tamu niekatoryja momanty (ahniavaja padrychtoŭka, da prykładu) u nas byli ŭ ščylnym hrafiku.
Palitruki, na ździŭleńnie, ni na što nie nastrojvali, tym [reziervistam], chto kazaŭ, što ich adpraviać u paŭdniova-ŭschodniuju častku Biełarusi, adkazvali: «Heta nie naša vajna».
Z-za taho, što padobnych karotkich zboraŭ raniej nie pravodzili, byli vialikija prablemy z materyjalnym zabieśpiačeńniem,
chłopcy praź niekalki dzion chadzili z mazalami, niechta da kryvi ściraŭsia.
Rady zboram adnaznačna nichto nie byŭ: niechta prapuściŭ mahčymaść zarabić, niechta čakaje, kali narodzicca jaho dzicia».
Uładzimira vyklikali na niekalki dzion na mabilizacyjnyja vučeńni ad bujnoha pradpryjemstva Homiela.
«U nas mabilizacyjnyja vučeńni ładzilisia nie masavyja. Pryjazdžali vajenkamy z usioj vobłaści, pravodzili niešta kštałtu kanfierencyi. Časta rabili ŭpor, što heta nie mabilizacyja, a vučeńni, kab nie chavalisia, a kali buduć chavacca, budzie tolki horš.
Vajnu kamientavali ŭ takim płanie — maŭlaŭ, im [ukraincam] tam nie sałodka, ale, kali da nas sunucca, budzie jašče horš. Časta kazali słovami prapahandystaŭ pra Ukrainu i ŭvohule palityku ŭ krainie, mnie ŭvohule padałosia, što jany jak zombi! Jany nijak nie tłumačyli, navošta heta, prosta «ŭ suviazi ź situacyjaj, jakaja skłałasia», ale na samich vučeńniach tema Ukrainy ŭvieś čas praskokvała.
Sasłužyŭcy temu Ukrainy asabliva nie ŭzdymali, u volny čas žartavali, hladzieli prykoły, hulali ŭ hulni, a ŭvohule skłałasia ŭražańnie, što bolšaść aktyŭna imkniecca vykonvać svaje funkcyi».
Abodva surazmoŭcy «Fłahštoka» adznačyli: kamandziry paviedamlali im, što ŭ kancy listapada — śniežni 2022 hoda płanujucca masavyja vučeńni.
«Jak nam tłumačyli, zbory pravodziacca, kab być hatovymi ŭ luby momant arhanizavać mabilizacyju. Mahčyma, heta padrychtoŭka da jaje pačatku. U kancy hoda płanujucca jašče vučeńni. I jany ŭžo buduć nie pakazalnymi, a masavymi», — raspavioŭ Alaksandr.
«U nas prosta skazali, što buduć pravodzicca vučeńni pa mabilizacyi (ci heta budzie pačatak mabilizacyi) z poŭnym pracoŭnym dniom u kancy listapada — pačatku śniežnia. Pieršapačatkova, kali nas źbirali dla pakazalnaj mabilizacyi, nam ničoha nie kazali pra hetyja vučeńni», — skazaŭ Uładzimir.
Pavodle aficyjnaj infarmacyi, jakuju apublikavali niekatoryja rajonnyja haziety Homielskaj vobłaści, da kanca hoda pa daručeńni Łukašenki budzie pravodzicca kantrolnaje apaviaščeńnie vajennaabaviazanych i kantrolnaja jaŭka na punkty zboru vajennaabaviazanych pa ŭkazanym u pozvach adrasie. Abviestcy buduć padlahać aficery zapasu, a taksama vajennaabaviazanyja, u jakich u 2022 hodzie nie ŭdakładnili danyja voinskaha ŭliku.
