Što adbyvajecca z cenami?
Zhodna z Pastanovaj, maksimalnaja handlovaja nadbaŭka na aŭtamabilnyja zapčastki dla imparciora składaje 45%, a dla roźničnych sietak — 35%. Hetyja abmiežavańni ŭžo paśpieli paŭpłyvać na canu niekatorych tavaraŭ, ale nie istotna.
«Krychu patańnieli matornyja alei, ceny na kamplekty HRM źnizilisia pryblizna na 10%. Pa niekatorych pazicyjach cana zastałasia niaźmiennaj», — kaža imparcier.
Pa słovach śpiecyjalista, bolš za ŭsio novyja patrabavańni paŭpłyvali na košt niedarahich tavaraŭ, takich, jak filtry, lampački, aŭtamabilnyja śviečy i h.d.
«Na takija darahija zapčastki, jak, naprykład, kamplekt sčapleńnia z machavikom, handlovyja nadbaŭki i raniej byli davoli ścipłymi.
A voś na drobnych pazicyjach imparciory i ŭ bolšaj stupieni roźničnyja pradaŭcy sapraŭdy rabili nacenku ŭ 50-100 i časam bolej pracentaŭ. U hetym niama ničoha nadzvyčajnaha, tak pracujuć va ŭsim śviecie. Ciapier ža, kali niejkaja drobiaź na ŭvachodzie budzie kaštavać 60 kapiejek, a maksimalnaja nadbaŭka na jaje składaje 45% — uźnikaje pytańnie ŭ metazhodnaści impartu takoha tavaru», — ličyć aptavik.
Svaju pazicyju jon abhruntoŭvaje tym, što ŭ takim vypadku fizičnyja i materyjalnyja vydatki mohuć być bolšymi za zarobak ad prodažu takoha tavara.
«Nam treba zachoŭvać tavar na składzie, apłočvać arendu pamiaškańnia, płacić zarpłatu kładaŭščykam. Taksama ŭ łancuhu ludziej, jakija buduć zadziejničany idzie mieniedžar, jaki apracoŭvaje zakaz, i kiroŭca, jaki jaho dastavić ad składa da handlovaj kropki. Heta kali razhladać praces raboty ŭ vielmi sproščanym vyhladzie.
Praz heta nam vielmi važna, kab na tannyja tavary možna było rabić nadbaŭku vyšejšuju za tuju, što prymieniajuć da bolš darahich rečaŭ. Inakš my možam pryjści da taho, što praściej budzie admovicca ad častki asartymientu, kab nie pracavać vyklučna dziela pracesu. Bo fizičnyja i finansavyja vydatki na apracoŭku zamovy na niejki tanny filtr koštam 5 rubloŭ i elemient elektroniki, jaki kaštuje 300 rubloŭ, adnolkavyja», — tłumačyć śpiecyjalist.
Surazmoŭca adznačaje, što ŭ kožnaha pastaŭščyka zapčastak zaŭždy byli peŭnyja pazicyi, na jakich jany ničoha nie zarablali. Ich trymajuć u najaŭnaści vyklučna dziela zachavańnia asartymientu. Ale jak pracavać, kali takich tavaraŭ stanie značna bolš, jon pakul nie razumieje.
U kožnaha imparciora zapčastak jość asnoŭnyja brendy, jakija jon sam pastaŭlaje ŭ Biełaruś, i druhasnyja — jakija jon jak aptovy pakupnik nabyvaje ŭ pieršaha pastaŭščyka i pierapradaje svaim klijentam.
«Ciapier atrymlivajecca, što pry prodažy tavaraŭ druhasnych dla nas brendaŭ hetyja 35% nadbaŭki aptavikam treba dzialić z roźničnaj sietkaj. Kab kančatkovy pradaviec moh choć niešta na hetym zarabić, bolšuju častku nadbaŭki (kala 20%) my pakidajem reseleru».
Pastanova nijakim čynam nie skaračaje vydatki biznesu
Biznesmien ličyć, što Pastanova stavić pad pahrozu isnavańnie drobnaha biznesu, pokolki toj moža prosta nie vytrymać pracy ŭ takich umovach.
«Pastanova nakiravanaja na toje, kab źmienšyć canu tavaraŭ u kramach. Heta vitajecca vialikaj častkaj spažyŭcoŭ, jaki, nie ŭnikajučy ŭ sutnaść ekanamičnych pracesaŭ, radujucca, što filtr, jaki miesiac tamu ŭ kramie pradavali za 35 rubloŭ, ciapier kaštuje 26. Ale mała chto zadumvajecca nad tym, jakija ŭ hetaha mohuć być nastupstvy.
Reč u tym, što, skaračajučy prybytak, Pastanova nijakim čynam nie skaračaje vydatki. Praz heta zarobak u častki drobnych handlaroŭ moža pamienšać nastolki, što im daviadziecca zakryć biznes», — miarkuje pastaŭščyk.
Jon vykazvaje zaściarohi, što takimi dziejańniami ŭłady taksama skarociać asartymient tavaraŭ, dasiažnych pakupnikam.
Što płanujuć rabić pastaŭščyki?
Što tyčycca imparcioraŭ, to isnuje jak minimum adzin varyjant, jak možna abyści novyja abmiežavańni.
Kab kampiensavać stračany prybytak, im treba pavysić uvachodnuju canu tavaraŭ i atrymlivać prybytak praz rachunak zamiežnaj firmy.
«Heta možna rabić praź firmy-prakładki, jakija buduć pradavać nam tavar pa zavyšanym košcie. Takim čynam biełaruski imparcior zmoža atrymać svaju stračanuju vyhadu», — tłumačyć śpiecyjalist.
Pa jahonych słovach, praca pa takoj uskładniennaj schiemie budzie asabliva aktualnaj dla tannych zapčastkak kitajskaj abo tureckaj vytvorčaści.
«Pry zamovie vialikaj partyi tavaraŭ u Kitai my musim spačatku raźličycca za jaho, a potym čakać, pakul hetyja detali zrobiać i dastaviać u Biełaruś. Hety praces zajmaje ad 6 da 12 miesiacaŭ. To-bok atrymlivajecca, što da taho, jak my zmožam realizavać tavar, našy hrošy ciaham hoda buduć zastavacca zamarožanymi ŭ hetaj pieradzamovie. Naturalna, što ŭ takim vypadku nichto nie budzie pracavać z 45% nadbaŭkaj, bo ŭ hetym nie budzie sensu», — tłumačyć śpiecyjalist.
Dla taho kab imparcior moh pavysić uvachodnyja ceny, jon budzie abaviazany abhruntavać, čamu tavary z hetaj pastaŭki stali daražejšymi za tyja, što jon pryvoziŭ niekalki miesiacaŭ tamu. Adnak biznesmien upeŭnieny, što hetaje abmiežavańnie imparciory taksama zmohuć abyści.
«Treba budzie źmianić nazvu, kab taja ci inšaja pazicyja vyhladała, jak novy tavar, jaki jašče nie pastaŭlali ŭ Biełaruś. Umoŭna kažučy, zamiest brenda «Abibas» buduć vykarystoŭvać nazvu «Abdziras» ci prybiaruć/daduć niejkuju ličbu ŭ artykuł tavara», — tłumačyć śpiecyjalist.
Kali apisanaja surazmoŭcam schiema sapraŭdy zapracuje, to źnižeńnie cen na častku tavaraŭ budzie nasić časovy charaktar, a biełaruskija spažyŭcy na niekatory čas sutyknucca z deficytam, pakul biznes nie naładzić novyja, vyhadnyja dla siabie schiemy. Nie budzie ŭ hetym ničoha dobraha i dla biełaruskaha biudžetu, bo častku hrošaj u vyhladzie padatkaŭ sydzie ŭ tyja krainy, dzie buduć zarehistravanyja firmy-prakładki.
Nie samyja lepšyja pierśpiektyvy, na dumku imparciora, čakajuć mienavita drobny biznes, jaki ŭ adroźnieńni ad bujnych hulcoŭ rynku nie maje paduški biaśpieki, kab pieražyć nieadnaznačnyja časy. IP apošnim časam akazalisia ŭ situacyi, kali z adnaho boku dziaržava pavialičvaje padatkovuju nahruzku, a ź inšaha — urazaje mahčymaści zarablać.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
