Ilustracyjnaje fota
Pravaabaroncy zafiksavali, što ŭ kastryčniku sudovaja sistema praciahvała ŭžyvać da represavanych pakarańni, źviazanyja z pazbaŭleńniem i abmiežavańniem voli. Sumarna za kastryčnik pa viadomych PC «Viasna» spravach, sudy vynieśli:
— 425 hadoŭ i 8 miesiacaŭ pazbaŭleńnia voli ŭ dačynieńni da 77 čałaviek (u tym liku asudžanych pa spravie Aŭtuchoviča);
— 15 hadoŭ abmiežavańnia voli z nakiravańniem u papraŭčuju ŭstanovu adkrytaha typu («chimija») u dačynieńni da 7 čałaviek;
— 67 hadoŭ abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija») u dačynieńni da 27 čałaviek;
— 4 miesiacy aryštu ŭ dačynieńni da 2 čałaviek;
— 100 bazavych vieličyń štrafu na sumu 3 200 rubloŭ u jakaści asnoŭnaha pakarańnia ŭ dačynieńni da adnaho čałavieka;
— 12 120 bazavych vieličyń štrafaŭ na sumu 387 840 rubloŭ u jakaści dadatkovaha pakarańnia da 27 čałaviek razam z pazbaŭleńniem (da 26 asudžanych) i abmiežavańniem voli biez nakiravańnia ŭ papraŭčuju ŭstanovu (da adnaho čałavieka);
— 10 hadoŭ pazbaŭleńnia prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ u dačynieńni da 2 čałaviek razam z pazbaŭleńniem voli kožnaha;
— pazbaŭleńnie voinskaha zvańnia «staršy praparščyk u adstaŭcy» ŭ dačynieńni da 1 čałavieka razam z pazbaŭleńniem voli (Mikałaj Aŭtuchovič);
— prymusovyja miery biaśpieki i lačeńnia ŭ vyhladzie prymusovaha lačeńnia ad chraničnaha ałkahalizmu pa miescy adbyvańnia pakarańnia ŭ dačynieńni da 1 čałavieka razam z pazbaŭleńniem voli.
Pavodle słoŭ viadomych pravaabaroncaŭ, u kastryčniku sudy ŭžyvali pakarańnie, źviazanaje z pazbaŭleńniem voli, u 67.54% vypadkaŭ. Abmiežavańnie voli z nakiravańniem u PUAT («chimija») sudy vykarystoŭvali ŭ jakaści pakarańnia ŭ 6.14% vypadkaŭ. Abmiežavańnie voli biez nakiravańnia ŭ PUAT («chatniaja chimija») užyvałasia ŭ 23.7% vypadkaŭ asudžeńnia hramadzian. Pakarańnie ŭ vyhladzie aryštu sudy ŭžyvali ŭ 1.75% vypadkaŭ asudžeńnia fihurantaŭ palityčnych spraŭ. Štraf prymianiaŭsia tolki ŭ 0.87% vypadkaŭ asudžeńnia hramadzian.
Takim čynam, u kastryčniku pakarańnie pa kryminalnych spravach, źviazanaje z pazbaŭleńniem voli, jaje abmiežavańniem u vyhladzie «chimii», «chatniaj chimii» i aryštu sudy ŭžyvali ŭ 99.13% vypadkaŭ asudžeńnia fihurantaŭ palityčna matyvavanych kryminalnych spraŭ.
