Taćciana Zareckaja i Śviatłana Cichanoŭskaja. Fota: t.me/CabinetBelarus
Pavodle Cichanoŭskaj, na pasadu pradstaŭnika Kabinieta pa finansach i ekanomicy razhladalisia roznyja kandydaty, i Taćciana Zareckaja była prapanavanaja da razhladu aŭtarytetnym śpiecyjalistam, imia jakoha Cichanoŭskaja nie nazvała. Pry hetym niekalki inšych kandydataŭ admovilisia, a Zareckaja nie tolki pahadziłasia, ale prajaviła entuzijazm i zacikaŭlenaść.
Toje, što pry pošuku kandydatury na pasadu pradstaŭnika pa finansach i ekanomicy šukali mienavita žančynu, Cichanoŭskaja admaŭlaje, «ale, viadoma, my vitajem, kab u kabiniecie i na lidarskich rolach u demakratyčnych siłach było bolš žančyn».
Pierad zastupleńniem na pasadu Zareckaja prajšła pravierku biaśpieki, jaje na palihrafie pravieryŭ BYPOL. Stanoŭčyja vodhuki byli atrymanyja i ad MZS Estonii, u ich niama nijakich pytańniaŭ da Taćciany. Ale dbajnaj pravierki biznesaŭ i słoŭ Zareckaj da pryznačeńnia jaje na pasadu nie rabiłasia, i Cichanoŭskaja pahadziłasia, što heta, mahčyma, było pamyłkaj, što nie zrabili hruntoŭnaj pravierki.
Adnosna pahroz Zareckaj sudami na adras žurnalistaŭ, jakija zadavali joj niazručnyja pytańni, Cichanoŭskaja ćviorda adznačyła, što «niedapuščalna cisnuć na ŚMI i zabaraniać publikacyi. Žurnalisty majuć prava zadavać pytańni».
Adnosna taho, što Zareckaja paśpieła zrabić u Kabiniecie: jana ŭdzielničała ŭ pasiadžeńniach Kabinieta i viała pramyja pieramovy z partniorami, razam z členami Kabinieta pracavała nad składańniem biudžetu i finansavaha płana raboty. Cichanoŭskaja ŭpeŭnienaja, što jaje napracoŭki spatrebiacca Kabinietu, i źviarnuła ŭvahu na toje, što Zareckaja padpisała damovu ab nierazhałošvańni i paśla sychodu publična padkreślivała, što kirujecca joj, tamu možna raźličvać, što kanfidencyjnyja źviestki, jakija byłaja pradstaŭnica pa pasadzie atrymała, zdabytkam publičnaści nie stanuć.
Na važnaje pytańnie, ci było pryznačeńnie Zareckaj na pasadu pamyłkaj Kabinieta, Cichanoŭskaja adkazała:
Našaj pamyłkaj było toje, jak my reahavali, jak my kamunikavali padčas hetaha kryzisu. Pamyłkaj było taksama, što niedastatkova kansultavalisia z ekśpiertnaj supolnaściu. Pamyłkaj było toje, što Taćciana, napeŭna, adkazała nie na ŭsie pytańni, i heta dało hlebu dla abvinavačvańniaŭ. Heta ŭrok. My vynieśli hety ŭrok, pryznajom pamyłki i praciahvajem pracu.
Pry hetym jana adznačyła: papiaredniaja zajava Kabinieta, što jon budzie dapamahać u rasśledavańni spravy i pryciahnieńnia da adkaznaści vinavatych za cisk na Zareckuju, zastajecca ŭ sile, a tyčycca jana «tych, chto ananimna pahražaŭ Taćcianie».
Novych kankretnych kandydatur na pasadu pradstaŭnika pa finansach i ekanomicy u Kabinieta pakul niama, ale jon abaviazkova budzie pryznačany.
Ahulnaja vysnova ź situacyi:
«Budziem palapšać aśviatleńnie pracy Kabinieta. U Kabinieta nieŭzabavie źjavicca pres-sakratar. Budziem bolš aktyŭna mieć znosiny z žurnalistami i kansultavacca z ekśpiertami».
Čytajcie taksama:
Paśpiachovaja startapierka ci baranesa Miunchhaŭzien? Jak Taćciana Zareckaja trapiła ŭ Abjadnany kabiniet i čamu jana jaho pakinuła
Zareckaja: Chaciełasia b nahadać pradstaŭnikam miedyja, što ŭ Biełarusi ŭsio jašče siadziać palityčnyja źniavolenyja
«Čyrvonych ściažkoŭ bolš, čym na kamunistyčnym mitynhu». Finansavy analityk Adaskievič pra startap Zareckaj
