Rakieta «Kinžał». Fota: Vikipiedyja
Paviedamleńni pra aktyŭnaje prybyćcio rasijskich vajskoŭcaŭ u Biełaruś źjavilisia ŭ siaredzinie kastryčnika. 10 kastryčnika Alaksandr Łukašenka paviedamiŭ, što damoviŭsia z Uładzimiram Pucinym ab razhortvańni sumiesnaj rehijanalnaj hrupoŭki vojskaŭ «u suviazi z abvastreńniem na zachodnich miežach «sajuznaj dziaržavy». Taksama jon čarhovy raz paŭtaryŭ, što Ukraina płanuje naniasieńnie ŭdaraŭ pa terytoryi Biełarusi — pra heta Minsk nibyta papiaredzili «praź nieaficyjnyja kanały».
15 kastryčnika Ministerstva abarony paviedamiła ab prybyćci pieršych ešałonaŭ z rasijskimi vajskoŭcami, jakija «ŭvachodziać u skład sumiesnaj z Rasijaj rehijanalnaj hrupoŭki vojskaŭ».
Dakładnaja kolkaść rasijskich vajskoŭcaŭ u Biełarusi da hetaj pary nieviadomaja. Alaksandr Łukašenka nazvaŭ ličbu 9 tysiač, ukrainskaja vyviedka havoryć pra mahčymyja 20 tysiač rasijskich mabilizavanych. Miarkujučy pa paviedamleńniach u siecivie, u Biełaruś zbolšaha pryjazdžaje «žyvaja siła», ludzi, a techniki mienš.
31 kastryčnika Alaksandr Łukašenka padpisaŭ prajekt pahadnieńnia z Rasijaj ab utvareńni rasijska-biełaruskich vučebna-bajavych centraŭ sumiesnaj padrychtoŭki vajskoŭcaŭ uzbrojenych siłaŭ.
«Radyjo Svaboda» pasprabavała razabracca, što adbyvajecca na biełaruskich vajskovych palihonach. Raspaznać zafiksavanuju z dapamohaj spadarožnika Planet Labs techniku jaho žurnalistam dapamoh ukrainski vajskovy analityk Michajła Žyrochaŭ.
230-ty ahulnavajskovy palihon «Obuz-Lasnoŭski» pad Baranavičami (Bresckaja vobłaść)
Na zdymkach za 31 kastryčnika 2022 hoda vidać, što na terytoryi palihona źjaviłasia vialikaja kolkaść vajskovych namiotaŭ i techniki. Prybyvać jana pačała paśla 16 kastryčnika.
Ahulny vyhlad palihona «Obuz-Lasnoŭski» pad Baranavičami 31 kastryčnika 2022 hoda
Usia hetaja vajskovaja infrastruktura źjaviłasia ŭ pieryjad ad žniŭnia da kanca kastryčnika.
«Biełaruski Hajun» nieadnojčy paviedamlaŭ pra prybyćcio ešałonaŭ z rasijskimi vajskoŭcami i technikaj na čyhunačnyja stancyi ŭ Baranavičach, a taksama na stancyju «Pałonka», što niepadalok ad palihona «Obuz-Lasnoŭski».
Terytoryja palavoha lahiera i stajanki vajskovaj techniki na palihonie «Obuz-Lasnoŭski» 31 kastryčnika 2022 hoda
Na zdymku vyšej bačym dva namiotavyja łahiery. Pamiery bolšaha — 150×220 mietraŭ, heta bolš za dva futbolnyja pali. Pobač ź im jašče adzin namiotavy łahier, 90×90 mietraŭ. Usiaho pastaŭlena nie mienš za 150 namiotaŭ. Kala ich sama mieniej 200 adzinak vajskovaj techniki, u asnoŭnym heta hruzavyja mašyny.
Pierad pačatkam vajny va Ukrainie na palihonie «Obuz-Lasnoŭski» možna było nazirać vielmi padobny da ciapierašniaha łahier. Na zdymku nižej bačym, što namiotaŭ tady było mienš, a techniki bolš.
Ahulny vyhlad palavoha lahiera i stajanki vajskovaj techniki na palihonie pierad pačatkam vajny va Ukrainie 15 lutaha 2022 hoda
Na poŭnač ad łahiera znachodzicca abjekt, padobny da palavoha špitala pamieram 100 na 80 mietraŭ, heta jak futbolnaje pole.
U samaj paŭnočnaj častcy palihona na terytoryi vučebnaha centra vidać nie mienš jak 40 namiotaŭ na ahulnaj płoščy 100 na 60 mietraŭ.
Palavy špital i namioty na terytoryi vučebnaha centra na palihonie «Obuz-Lasnoŭski» 31 kastryčnika 2022 hoda
Vajskovy palihon «Repišča» pad Asipovičami (Mahiloŭskaja vobłaść)
Na spadarožnikavym zdymku za 31 kastryčnika na palihonie «Repišča» znachodzicca łahier 50 na 160 mietraŭ i nie mienš jak 35 vajskovych namiotaŭ. Pobač stajanka techniki (150 na 150 mietraŭ). Na joj vidać hruzaviki i niekalki padobnych da haŭbic mašyn. Jany tolki zajazdžajuć na stajanku.
Na zdymku, źniatym na dzień raniej, vidać, što techniki na tracinu mienš.
Ahulny vyhlad palavoha lahiera i stajanki vajskovaj techniki na terytoryi palihona «Repišča» pad Asipovičami 31 kastryčnika 2022 hoda
Na poŭnač ad palihona — stancyja Vierajcy. Tam staić čyhunačny sastaŭ, ź jakoha zhružajuć techniku. Častka čyhunačnych płatformaŭ pustaja, častka — jašče z technikaj. Na darozie ŭ kirunku palihona staić kałona vajskovaj techniki.
Čyhunačnaja stancyja Vierajcy niepadalok ad palihona «Repišča» pad Asipovičami 31 kastryčnika 2022 hoda
Pa raniejšych spadarožnikavych zdymkach možna zaŭvažyć, što łahier pačynaje aktyŭna raści, a technika prybyvać paśla 17 kastryčnika. Na zdymku za hety dzień jaje jašče nie vidać.
Vajskovy palihon «Łaśvida» kala Viciebska
Na spadarožnikavych zdymkach palihona «Łaśvida» vidać, što namioty tam pačynajuć źjaŭlacca paśla 11 kastryčnika. Na zdymku za 14 kastryčnika jany ŭžo jość, źjaŭlajecca pieršaja technika. Dalej łahier tolki pavialičvajecca.
Ahulny vyhlad palavoha łahiera i stajanki vajskovaj techniki na palihonie «Łaśvida» pad Viciebskam 31 kastryčnika 2022 hoda
Vajskovy aeradrom Mačuliščy pad Minskam
Aeradrom «Mačuliščy» apošnim časam časta traplaje ŭ naviny i paviedamleńni ludziej u pieršuju čarhu z pryčyny raźmieščanych tam troch samalotaŭ-źniščalnikaŭ MIH-31K Vajskova-kaśmičnych siłaŭ Rasii. Jany zdolnyja nieści hipierhukavyja rakiety «Kinžał», jakija mohuć paražać celi va Ukrainie, a taksama na adlehłaści 2000 km. Zhodna z paviedamleńniami ŭ telehram-kanale «Biełaruski Hajun», hetyja samaloty niasuć pastajannaje dziažurstva ŭzdoŭž biełaruska-ŭkrainskaj miažy. Amal kožny raz pry hetym u šmatlikich abłaściach Ukrainy ŭvodziać režym pavietranaj tryvohi.
Imavierna, rasijskija źniščalniki MIH-31K i hipierhukavaja rakieta «Kinžał» kala ich. Zdymak 30 kastryčnika 2022 hoda
Na spadarožnikavym fotazdymku za 30 kastryčnika dobra vidać hetyja try źniščalniki. Pobač z adnym ź ich jakraz staić abjekt, jaki daŭžynioj (7—8 mietraŭ) i formaj padobny da rakiety «Kinžał». Ab prysutnaści hetych rasijskich źniščalnikaŭ i najaŭnaści na aeradromie abjektaŭ, padobnych da kantejnieraŭ dla zachoŭvańnia rakiet «Kinžał», havoryć i brytanskaja vyviedka.
Pra što śviedčyć pabačanaje na spadarožnikavych zdymkach?
Vajskovy analityk Michajła Žyrochaŭ padsumoŭvaje, što farmiravańnie hrupoŭki, pra jakuju kazaŭ Alaksandr Łukašenka, «faktyčna ŭžo pačałosia i idzie davoli chutkimi tempami».
«U Rasii ciapier prablema z palihonami (u 1990-ch bolšuju častku raspradali), tamu jany mohuć vykarystoŭvać palihony Biełarusi dla treniroŭki mabilizavanych. Pieranavučańnie i farmiravańnie novych čaściej budzie prachodzić u zimovy pieryjad, a ŭviesnu 2023 hoda Rasija moža atakavać Ukrainu z terytoryi Biełarusi», — ličyć Michajła Žyrochaŭ.
Pavodle vajskovaha ekśpierta, dla nastupleńnia na Ukrainu rasijanam patrebna kala 70 tysiač ludziej z tankami, technikaj, bojeprypasami i haruča-zmazačnymi materyjałami. «Tamu ciapier my nazirajem tolki pačatak pracesu, dalej rasijskaja prysutnaść u Biełarusi budzie pavialičvacca».
