Dvuchuzroŭnievyja kvatery i pałacy z basiejnami. Ahlad samaha darahoha žylla pa krainie

Dva ŭzroŭni i blizkaść da vadajoma

U Bresckaj vobłaści zaraz pradajecca bolš za 7300 kvater. Samyja darahija prapanovy, kaniečnie, u abłasnym centry. Pry siarednim košcie kvadratnaha mietra 810 dalaraŭ cana niekatorych kvater «lacić» za 200 i navat 300 tysiač dalaraŭ. Za hod ceny na žyllo ŭ Breście vyraśli na 3%.

Voś prykład adnaho z najbolš darahich varyjantaŭ. Kvatera ahulnaj płoščaj 181,3 m² znachodzicca ŭ samym centry Bresta — na vulicy Kirava, što ŭsiaho za niekalki kvartałaŭ ad hałoŭnaj turystyčnaj vulicy Savieckaj. Tut piać pakojaŭ i try sanvuzły. Kvatera mieścicca na 9-m i 10-m pavierchach cahlanaha doma 1997-ha hoda pabudovy.

Za dvuchuzroŭnievyja kvatery, jak praviła, prosiać šmat — heta paćviardžajuć i prykłady ź inšych rehijonaŭ. Adbivajecca i vialikaja ahulnaja płošča, i redkaść padobnych prapanoŭ. Kvadratny mietr u hetaj prapanovie acenieny ŭ $1323 — na 39% vyšej, čym u siarednim pa Breście.

Amal stolki ž, kolki kvater, pradajecca ŭ Bresckaj vobłaści pryvatnych damoŭ i katedžaŭ — bolš za 6300. Topavyja pa košcie prapanovy znachodziacca ŭ dyjapazonie 600-800 tysiač USD.

Na druhim bierazie Muchaŭca, litaralna za dva kroki ad Hieršonskaha voziera, pradajecca asabniak, jaki całkam padychodzić pad aznačeńnie «Moj dom — maja krepaść», jak i napisana ŭ abjavie. Za jaho prosiać $690 tysiač — pa $1376 za m².

Tut dva pavierchi. Pieršy addadzieny pad haspadarčyja patreby i chobi: na im mieściacca haraž, łaźnia, basiejn, trenažornaja zała i zimovy sad. Na druhim paviersie piać spalniaŭ i kuchnia-stałovaja. Na dahledžanym učastku płoščaj 0,1334 ha pabudavanyja altanka, chleŭ i ciaplica.

Sučasny dyzajn u novabudoŭlach i ekskluzivy ŭ histaryčnaj zabudovie

Rynak nieruchomaści Hrodzienskaj vobłaści bolš łajalny da pakupnikoŭ — siaredniaja cana kvadratnaha mietra tut nie pieravyšaje $612, ale za hod jana padrasła ŭžo na 3,4%. U abłasnym centry, viadoma, žyllo pradajecca daražej — u siarednim pa $741 za m².

Samyja darahija prapanovy ŭ Hrodnie znachodziacca ŭ dyjapazonie ad 100 da 200 tysiač dalaraŭ. Siarod ich znoŭ bačym 2-uzroŭnievuju kvateru ŭ novabudoŭli na ŭskrainie abłasnoha centra za 122 tysiačy dalaraŭ ($1069 za m²).

Ahulnaja płošča 4-pakajovaj kvatery — 114.2 m ². Vyšynia stolaŭ — 2,7 mietra. Na druhim paviersie znachodzicca adzinaja prastora svabodnaj płaniroŭki. U kvatery zrobleny sučasny ramont.

U Hrodnie zachavałasia šmat žyłoj histaryčnaj zabudovy. I tamu tut całkam realna znajści ŭnikalnyja prapanovy, jakija naŭrad ci adšukajucca dzieści jašče. Voś adna ź ich — 1-pakajovaja kvatera ŭ samym centry, u domie na piešachodnaj vulicy Savieckaj. U joj bieražliva zachavany prykmiety daŭniny — ścieny vyčyščany da cahlanaha mura, što nadaje kvatery nadzvyčajny kałaryt. Jon padtrymlivajecca i dyzajnam. Naprykład, padvakońni vykanany z kamieniu, a ŭnutranyja dźviery — z dubu. Adnak tam, dzie heta nieabchodna, usio zroblena pa-sučasnamu. Skažam, poŭnaściu zamienieny truby i elektrapravodka.

Cana kvatery — 109 tysiač dalaraŭ (1473 USD za m²). Uličvajučy ekskluziŭnaść i miescaznachodžańnie, jana absalutna nie zdajecca zavyšanaj.

I hety varyjant u Hrodnie — nie adzinkavy vypadak. Jašče adzin prykład — 3-pakajovaja kvatera ahulnaj płoščaj 88,3 m². Jana znachodzicca na pieršym paviersie 2-paviarchovaha doma 1926 hoda pabudovy, jaki pryznany historyka-kulturnaj kaštoŭnaściu. Kvatera maje asobny ŭvachod z vulicy, prastorny padvał i prydamavy ŭčastak płoščaj 12 sotak.

Stan kvatery daloki ad idealnaha, ale jaje ŭnikalnaść robić canu (149 tysiač USD) apraŭdanaj.

Zrešty, dastatkova šmat na «Kufar Nieruchomaść» i bolš zvykłych varyjantaŭ sučasnych asabniakoŭ i katedžaŭ jak u samim Hrodnie, tak i ŭ vobłaści. Topavyja prapanovy znachodziacca ŭ dyjapazonie ad 300 da 500 tysiač dalaraŭ.

Kvatera ź vidam na pałac i pałac ź dźviuma kuchniami

U Homielskaj vobłaści ceny na nieruchomaść adny z samych «łajalnych» u krainie. Siaredni košt kvadratnaha mietra — $529. Za hod jon vyras na 3,4%. U rehijanalnym centry košt bolš vysoki — $665 za m².

Samaja darahaja kvatera ŭ Homieli pradajecca za 300 tysiač dalaraŭ. Heta pa $1363 za kvadratny mietr. Jak i mnohija varyjanty z hetaj padborki, 5-pakajovaja kvatera maje dva pavierchi. Ale cana abumoŭlenaja nie tolki hetym. Dom, u jakim znachodzicca kvatera, raźmieščany ŭ centry horada, na vulicy Sialanskaj. Litaralna nasuprać znachodzicca park Homielskaha pałacava-parkavaha ansambla, pałac Rumiancavych-Paskievičaŭ i nabiarežnaja Soža. Akramia taho, prapanovu adroźnivajuć najaŭnaść padziemnaha parkinhu i kruhłasutačnaja achova.

Samy darahi dom u Homieli abydziecca ŭ 400 tysiač dalaraŭ. U jaho vielizarnaja ahulnaja płošča — 427 kvadratnych mietraŭ, tamu cana adnaho «kvadrata» słušnaja — 937 dalaraŭ.

Voś jak apisvajecca maštabnaje zbudavańnie ŭ abjavie: «Dva pavierchi, piać spalniaŭ (u tym liku z harderobnaj), dźvie kuchni, kładoŭki, try asnoŭnyja ŭvachody i dva vychady ŭ zonu barbiekiu i na terasu». U domie jość basiejn. Naturalna, učastak dobraŭparadkavany, na im navat jość dziciačaja placoŭka. Taksama jość aciepleny haraž i adkrytaja parkoŭka na niekalki aŭtamabilaŭ.

Kvatery da 200 tysiač dalaraŭ i katedžy bolš za 300 tysiač dalaraŭ

U siarednim za kvadratny mietr u Mahiloŭskaj vobłaści prosiać $554. Za hod jon padaražeŭ na 4,7%. U abłasnym centry ceny vyšejšyja — 688 USD za m².

Kvater, daražejšych za 200 tysiač dalaraŭ, u bazie «Kufar Nieruchomaść» u hetym rehijonie nie pradajecca. Voś adzin z najbolš darahich prykładaŭ — 2-pakajovaja kvatera za 150 tysiač dalaraŭ, raźmieščanaja ŭ novabudoŭli. Jana nie vyłučajecca ni raźmiaščeńniem, ni płaniroŭkaj, ni vialikaj ahulnaj płoščaj. Cana farmirujecca za košt stylnaha ramontu i jakasnych materyjałaŭ: italjanskaja santechnika, hranit, kieramahranit, masiŭ dreva, darahaja ŭbudavanaja bytavaja technika.

Zaharadnaja nieruchomaść u Mahiloŭskaj vobłaści prykmietna daražejšaja — jość prapanovy ŭ dyjapazonie ad 300 da 400 tysiač dalaraŭ.

Samaja darahaja nieruchomaść samaha tannaha rehijona

U Viciebskaj vobłaści nie tolki samaja tannaja nieruchomaść z usich rehijonaŭ (u siarednim $544 za m²) — jaje košt praciahvaje źnižacca. Za hod kvadratny mietr tut patańnieŭ na dva dalary. Situacyja na miascovym rynku žylla idzie za stalicaj.

Adnak heta nie značyć, što ŭ Viciebsku nie prapanujucca darahija abjekty. Samaja darahaja kvatera ŭ rehijanalnym centry pradajecca za 310 tysiač dalaraŭ ($1267 USD za m²). Jana znachodzicca ŭ cahlanym domie 2004 hoda pabudovy na vulicy Haharyna. Tut dva ŭzroŭni, dva sanvuzły, try prastornyja zašklonyja łodžyi.

Samy darahi dom u Viciebsku abydziecca ŭ 850 tysiač dalaraŭ. Zrešty, heta navat nie dom, a cełaja siadziba. Aproč dvuchpaviarchovaha katedža ahulnaj płoščaj kala 1500 m², tut pradajecca taksama 2-uzroŭnievy łaźnievy kompleks z basiejnam i terasaj. Jość i miesca dla barbiekiu na bierazie ŭłasnaj sažałki. A taksama haraž na dva aŭtamabili.

Padkuplaje i miescaznachodžańnie — bierahavaja pałasa Zachodniaj Dźviny i chvajovy les vakoł. Usio heta — nie prosta ŭ miežach Viciebska, a jašče i zusim niedaloka ad centra horada.

Taksama źvierniem uvahu na dom za 687 tysiač dalaraŭ. Heta absalutna ŭnikalny abjekt. 2-paviarchovy staražytny dom znachodzicca na vulicy Janki Kupały ŭ histaryčnym centry horada, usiaho za 300 mietraŭ ad Ratušy. U domie raźmieščany dźvie 4-pakajovyja kvatery — płoščaj 91,06 m² i 98,3 m². Płošča ziamielnaha ŭčastka prydamavoj terytoryi, jaki prapanoŭvajuć u arendu, — 1,8 sotki.