Źniavolenyja z PVK Vahniera, jakija adpravilisia na vajnu va Ukrainu, kab paźbiehnuć katavańniaŭ u turmie, sutykajucca z katavańniami i na froncie: kamandavańnie adrazaje zekam palcy i chavaje ślady katavańniaŭ, spalvajučy cieły ŭ krematoryjach, a taksama pahražaje pakazać im videa, na jakim z žyvoha čałavieka źniali skuru za streł u kamandzira. Śviedčańni pierapiski i dakumienty pieradaŭ The Insider zasnavalnik prajekta Gulagu.net Uładzimir Asiečkin. The Insider udałosia vieryfikavać pierapisku i asabistyja danyja źniavolenaha, a taksama paćvierdzić, što jon źjaŭlajecca bajcom PVK Vahniera.
Źniavoleny raspavioŭ, što padpisaŭ damovu z PVK, jak i mnohija, kab paźbiehnuć katavańniaŭ u turmie. U trochbakovaj damovie, akramia inšaha, patrabavałasia paznačyć danyja rodnych: proźvišča, imia, adrasy pražyvańnia baćki i maci.
Taksama dakumient praduhledžvaŭ, što cieła źniavolenaha majuć prava nie vydavać, a kremiravać. Sam surazmoŭca ličyć, što tak «zamiatajuć ślady», kab u SK nie mahli razabracca ŭ vypadku, kali źniavolenych katavali. Za sproby ŭciokaŭ źniavolenych rasstrelvajuć, a za sprečki z kamandavańniem adrazajuć palcy. Kamandziry śćviardžajuć, što ŭ vypadku, kali ŭciekačoŭ nie złoviać, buduć akazvać cisk na svajakoŭ.
«Kali pabiažycie, złovim, budziem katavać, vielmi doŭha budziecie pamirać, kali nie złovim, na vašych svajakach adabjecca ŭsio», — tak pahražajuć źniavolenym.
Kožny druhi źniavoleny choča źbiehčy z častki, adnak usie zapałochanyja, bo kamandziry kožny dzień pakazalna adrazajuć asudžanym palcy abo viazuć ludziej u katavalniu. U jakaści zaściarohi ad uciokaŭ zekam raspaviali, jak adnaho sa źniavolenych, jaki padstreliŭ kamandzira, padvierhnuli katavańniam. Ź jaho źniali skuru i «śpiecyjalna trymali jaho na kropielnicach, kab jon niekalki dzion pamiraŭ u strašnych pakutach». Taksama źniavolenym abiacali pakazać videa ź miesca, dzie «raspyrskanyja mazhi zekaŭ», jakija akazvali niepadparadkavańnie.
Usie źniavolenyja chavajuć telefony, bo za ich vykarystańnie mohuć adrezać palcy. Suviaźziu karystajucca, tolki kali nie bačać kamandziry, naprykład, u akopach. U ciapierašni čas źniavolenych ź pienzienskich kałonij užo kinuli na pieradavuju, zekaŭ z Vałhahradskaj vobłaści rychtujuć da boju, a arenburhskija źniavolenyja prachodziać ekspres-padrychtoŭku, jakaja faktyčna zaklučajecca ŭ zapałochvańni. Pry hetym asudžanym nie płaciać za vajnu, a abiacajuć vyzvaleńnie.