Miłanu abvinavacili ŭ tym, što jana pryniała ŭdzieł u niadzielnym Maršy «z metaj publičnaha vykazvańnia niezakonnymi sposabami svaich hramadska-palityčnych pohladaŭ i pratesta, viadzieńnia destruktyŭnaj dziejnaści».
Tym samym «pryniała aktyŭny ŭdzieł u hrupavych dziejańniach, jakija hruba parušajuć hramadski paradak». Taksama žančynie pastavili ŭ vinu niepadparadkavańnie pradstaŭnikam ułady i pieraškodu ruchu hramadskaha transparta.
Miłanu apaznali pa fotazdamkach z Marša, jakija siłaviki znajšli ŭ jaje telefonie.
3 kastryčnika sudździa Leninskaha suda Minska Maryna Klimčuk pryznała Miłanu Valfovič vinavataj pavodle č. 1 art. 342 (Arhanizacyja i padrychtoŭka dziejańniaŭ, jakija hruba parušajuć hramadski paradak albo aktyŭny ŭdzieł u ich) i pryznačyła pakarańnie terminam 2 hoda i 6 miesiacaŭ abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»). Miłanu Valfovič vyzvalili ŭ zali suda.
