Mazaiku znajšli na padłozie ruin budynka IV stahodździa, jaki vykupili livanskija biznesmieny i pieradali siryjskaj dziaržavie. Archieołahi pakul nie mohuć dakładna skazać, što heta byŭ za budynak — mahčyma, hramadskija łaźni.
Płošča mazaiki — 120 kvadratnych mietraŭ. Vierahodna, jana pašyrajecca i na pakul jašče nie rasčyščanyja ŭčastki. Vyjavy vykładzienyja kvadratnymi kalarovymi kamianiami pa 1,2 santymietra kožny.
Malunak vielmi detalizavany — na mazaicy možna razhledzieć siužety sa staražytnahreckaj i staražytnarymskaj mifałohii. Jość sceny Trajanskaj vajny, vyjavy Hierakła, amazonak, Nieptuna i 40 jaho paluboŭnic.
«Pierad nami adkryćcio, redkaje ŭ hłabalnym maštabie», — skazaŭ pradstaŭnik Hałoŭnaha ŭpraŭleńnia staražytnaściaŭ i muziejaŭ Siryi Chumam Saad. Pavodle jaho słoŭ, Rastan — histaryčna značny horad, ale da vajny ŭ im nie pravodziłasia raskopak.
Paśla vyjaŭleńnia vydatna zachavanaj mazaiki livancy płanujuć vykupić dla Siryi i inšyja budynki z pomnikami i artefaktami, jakija čakajuć svajho adkryćcia.
