Zatrymanyja. Źvierchu źleva naprava: Maksim Saŭko, Vital Samal. Nižni šerah: Daniła Vitunoŭ i Vital Achremčyk.
Zajaŭleny «Bajpołam» płan «Pieramoha» zastajecca hałoŭnym abjektam tryvohi łukašenkaŭcaŭ. Siońnia ŭranku na fejkavym kanale «Bajpoła» zapościli ŭkid pra toje, što «Płan Pieramoha» zapuščany. I siońnia ž na kanale HUBAZiKa źjavilisia čatyry videa z zatrymanymi — siłaviki śćviardžajuć, nibyta ŭsie jany źviazanyja z «udziełam u płanie «Pieramoha», ale my nie možam pravieryć praŭdzivaść hetaha śćviardžeńnia.
Siarod zatrymanych adzin haradzieniec — 27-hadovy Maksim Saŭko, a taksama troje minčukoŭ — 39-hadovy Vital Samal, 20-hadovy student Daniła Vitunoŭ i 36-hadovy Vital Achremčyk.
Usie jany apisvajuć adnu i tuju ž historyju: nibyta zarehistravalisia ŭ «płanie Pieramoha», paśla ź imi źviazalisia i niekalki razoŭ pytalisia ich asabistyja danyja. U chutkim časie da ich pryjšoŭ HUBAZiK.
Treba adznačyć, što raniej byli vypadki, kali supracoŭniki orhanaŭ prymušali ludziej ahavorvać siabie, kazać pra rehistracyju ŭ bocie, choć tyja nikudy nie ŭstupali.
Pry hetym viadoma, što danyja mierkavanych udzielnikaŭ časam źbirali praz fejkavych botaŭ (a nie praz sapraŭdny bot płana), praz uraźlivaści telehrama pa fakcie zatrymańnia abo šlacham katavańniaŭ.
Cikava, što sietka samych papularnych fejkaŭ kanałaŭ HUBAZiK administrujecca mierkavana prarasijskimi aktyvistami abo z Rasii — u joj rehularna źjaŭlajucca dopisy ad rasijskich čarnasociennych navinavych ahienctvaŭ (navat z krytykaj Łukašenki).
Kłon kanała «Bajpoła», kudy nahnali 22 tysiačy padpisantaŭ (ci zakupili botaŭ), apublikavaŭ siońnia post, što 14 kastryčnika Abjadnany pierachodny kabiniet nibyta prystupaje da «Płana Pieramoha».
«U adpaviednaści z Pastanovaj №2 ad 22 vieraśnia 2022 hoda Abjadnany Pierachodny Kabiniet Biełarusi paviedamlaje pra realizacyju mabilizacyjnaha płana «Pieramoha».
Łukašenka ciapier znachodzicca za miažoj, a našy navučanyja ŭzbrojenyja atrady ŭžo ŭ Minsku i hatovyja da adnaŭleńnia niezaležnaści siłavym šlacham.
Kožny, chto atrymaŭ mabilizacyjnaje pradpisańnie, dziejničaje ŭ adpaviednaści z zadańniem. Kamu nie pryjšło pradpisańnie — terminova źviažyciesia z botam», — pišacca ŭ paviedamleńni.
U aryhinalnym kanale takoha pasta niama. Apošni post u im — zvarot Sachaščyka za 12 kastryčnika.
Fejkavy kanał, vierahodna, stvorany śpiecsłužbami. Data stvareńnia — 4 maja. 5 kastryčnika kanał pierajmienavali ŭ BYPOL i stali zapaŭniać jaho. Tam dublujucca pasty aryhinalnaha kanała za apošnija dva hady.
Adnak nazva sapraŭdnaha kanała abjadnańnia byłych siłavikoŭ — By_Pol. Fejkavaha — By_Pol_official.
Viadoma, što fejkavyja paviedamleńni pra pierachod da «Płana Pieramoha» siońnia stali rassyłacca pa rajonnych čatach.
Alaksandr Łukašenka 14 kastryčnika zajaviŭ, što ŭ Biełarusi ŭviedzieny režym pavyšanaj terarystyčnaj niebiaśpieki.
Viarchoŭny Sud pryznaŭ BYPOL, a taksama «Situacyjna-analityčny centr» i «Mabilizacyjny płan «Pieramoha» terarystyčnymi arhanizacyjami.
Udzielniki płana «Pieramoha» dzielacca na try asnoŭnyja hrupy, raskazvaŭ Alaksandr Azaraŭ udzielnikam Kanfierencyi Novaj Biełarusi. Pieršaja — asoby, jakija prajšli padrychtoŭku BYPOL i jakija buduć vykonvać śpiecyjalnyja apieracyi. Sutnaść hetych apieracyj nie raskryvajecca, kab nie byli padrychtavanyja kontrmiery z boku łukašenkaŭskich śpiecsłužbaŭ.
Druhaja hrupa — supracoŭniki zavodaŭ i pradpryjemstvaŭ. Čakajecca, što jany vykanajuć zadańnie na svaim pracoŭnym miescy. Što za zadańnie, Azaraŭ nie ŭdakładniŭ.
Treciaja hrupa składajecca ź ludziej, jakija vyjduć na vulicy.
«Kožny hramadzianin musić razumieć svaju adkaznaść. Kali jon nie vyjdzie na vulicu, nie apuścić rubilnik, nie vykanaje pradpisańnie, jakoje atrymaje, to padstavić ludziej, jakija vykonvajuć siłavuju častku płana, što moža pryvieści da ich hibieli i źniščeńnia aktyŭnaj častki biełaruskaha hramadstva», — padkreśliŭ Azaraŭ.
Pradstaŭniki «Bajpoła» śćviardžajuć, što ŭłady zatrymlivajuć randomnych ludziej i prymušajuć ich ahavorvać siabie.
«Jany kožny dzień zatrymlivajuć ludziej, jakija nie majuć nijakaha dačynieńnia da BYPOL i płana «Pieramoha». Prymušajuć ich pad katavańniami zapisvać pakajalnyja videa ab tym, čaho jany nie rabili, — kazaŭ padpałkoŭnik Azaraŭ. — Režym baicca płana «Pieramoha», tamu kidaje vialikuju kolkaść sił na baraćbu z nami. Adnak my budziem praciahvać pracu nad płanam», — śćviardžaje «Bajpoł».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
