Pucin u Astanie. Skrynšot ź videa
«Va ŭkrainskich uładaŭ źnikła žadańnie vieści pieramovy, jak tolki rasijskija vojski adyšli ad Kijeva. Rasija zaŭsiody kazała, što adkryta da pieramovaŭ», — zajaviŭ Uładzimir Pucin u Astanie 14 kastryčnika.
Nastup na Kijeŭ u lutym-sakaviku 2022 hoda vioŭsia z terytoryi Biełarusi, bo ŭkrainskaja stalica znachodzicca ŭsiaho za 90 kiłamietraŭ ad biełaruskaj miažy.
11 kastryčnika Alaksandr Łukašenka zajaviŭ pra stvareńnie ŭ Biełarusi abjadnanaj biełaruska-rasijskaj hrupoŭki.
U apošnija dni źjavilisia vartyja davieru paviedamleńni ab praviadzieńni ŭ našaj krainie prychavanaj mabilizacyi.
14 kastryčnika Łukašenka zajaviŭ, što «abjadnanaja hrupoŭka» budzie składacca z 70 tysiač čałaviek.
Čytajcie taksama: Krynicy: Rašeńnie ab mabilizacyi ŭ Biełarusi pryniataje. Jana projdzie pad vyhladam pravierki bajazdolnaści
Pry hetym raniej jon adznačaŭ, što Ukraina trymaje na svajoj paŭnočnaj miažy kala 15 tysiač štychoŭ. Heta pieravažna bajcy terytaryjalnaj abarony, elitnyja i najbolš bajazdolnyja ŭkrainskija čaści viaduć bai na paŭdniovym froncie.
«Ciapier niama nieabchodnaści ŭ masiravanych udarach, va ŭsiakim vypadku ciapier, pakul, ciapier inšyja zadačy stajać», — skazaŭ Pucin u Astanie.
Ukrainskaja i zachodnija raźviedki adznačali, što, pa ich infarmacyi, u Rasii amal vyčarpany zapas rakiet.
Taksama Pucin pahražaŭ zryvam «charčovaj uhody»: «FSB kanstatavała, što, chutčej za ŭsio, vybuchoŭka dla nadzvyčajnaha zdareńnia [vybuchu] na Krymskim moście była adpraŭlenaja moram — ale pakul nieviadoma, ci vykarystoŭvaŭsia zbožžavoz. Kali vyśvietlicca, što humanitarnyja kalidory vykarystoŭvajucca dla teraktaŭ [Rasija nazyvaje heta teraktam], to heta pastavić pad pytańnie zbožžavuju ŭhodu».
Pucin zajaviŭ, što z zapłanavanych 300 tysiač u Rasii mabilizavanyja 222 tysiačy čałaviek. My nie možam niezaležna pravieryć ni pieršuju, ni druhuju ličby.
«Dumaju, što na praciahu prykładna dvuch tydniaŭ usie mabilizacyjnyja mierapryjemstvy buduć zavieršany», — skazaŭ Pucin. Pa jaho słovach, «hetaja praca ŭžo zakančvajecca». Miarkujučy pa maštabach adłovu mužčyn navat u Maskvie i Pieciarburhu realnaja ličba moža być vyšejšaj.
Pucin taksama zajaviŭ, što 16 tysiač mabilizavanych užo znachodziacca na froncie.
Raniej siońnia rasijski šavinistyčny kanał Zapiski mičmana Ptičkina paviedamiŭ, što na hety momant užo bolš za 100 mabilizavanych zahinuli. Pieršyja paviedamleńni pra pachavańni pačali źjaŭlacca i ŭ aficyjnych rasijskich ŚMI.
Taksama Uładzimir Pucin dadaŭ, što Rasija nie stavić pierad saboj zadaču pa źniščeńni Ukrainy. U lutym 2022 hoda, pierad uvarvańniem, u svaich prahramnych vystupach, jon admaŭlaŭ prava Ukrainy na isnavańnie i samastojnaść ukrainskaj nacyi. U svaju čarhu, jaho satelit Alaksandr Łukašenka zajaŭlaŭ, što vajna praciahniecca «try-čatyry dni». Łukašenka i paźniej zajaŭlaŭ, što «Rasija nie moža prajhrać». Tym nie mienš, u sakaviku ŭkrainskaja armija razhramiła rasijskuju pad Kijevam i Čarnihavam, a pačynajučy sa žniŭnia ŭkraincy pierajšli ŭ nastup pad Chiersonam i Iziumam. Z taho momantu inicyjatyva naležyć ukrainskaj armii. Uładzimir Pucin abviaściŭ častkovuju mabilizacyju.
Mnohija ŭ Biełarusi bajacca, što Maskva zmusić minskuju administracyju pasłać va Ukrainu biełaruskich vajskoŭcaŭ. Inšyja miarkujuć, što heta tolki manieŭry dla taho, kab zmusić Kijeŭ trymać na paŭnočnaj miažy častku vojskaŭ, jakija b u advarotnym vypadku byli b zadziejničanyja na paŭdniovym froncie.
