NATA ŭzmocnić abaronu krytyčnaj infrastruktury krain aljansu ŭ adkaz na mierkavanyja dyviersii na rasijskich hazapravodach «Paŭnočny patok» i «Paŭnočny patok — 2» u Bałtyjskim mory.
«My pavialičyli prysutnaść u Paŭnočnym i Bałtyjskim morach da 30 karabloŭ», — zajaviŭ hienieralny sakratar NATA Jens Stołtenbierh 11 kastryčnika ŭ Brusieli.
Pavodle jaho słoŭ, hetyja karabli atrymlivajuć padtrymku z pavietra i z dapamohaj padvodnych pryład. Akramia taho, krainy aljansu robiać bolš strohimi miery biaśpieki vakoł infrastrukturnych abjektaŭ i pašyrajuć abmien infarmacyjaj pamiž śpiecsłužbami, skazaŭ Stołtenbierh.
«Lubaja ataka na abjekty krytyčnaj infrastruktury krain NATA paciahnie za saboj zhurtavany i rašučy adkaz», — zajaviŭ hienieralny sakratar Paŭnočnaatłantyčnaha aljansu. Jakim budzie hety adkaz, zaležyć ad ataki.
Stołtenbierh nie vyklučyŭ, što ŭ vypadku bujnoj dyviersii NATA moža prymianić artykuł 5 svajho statutu ab kalektyŭnaj abaronie. Kalektyŭnaja abarona aznačaje, što napad na adnaho z členaŭ NATA budzie razhladacca jak napad na ŭsich členaŭ NATA.
Da krytyčnaj infrastruktury, ź jahonych słoŭ, adnosiacca nie tolki hazapravody, ale i padvodnyja kabieli elektrasietak i internetu.
U kancy vieraśnia na ŭčastkach hazapravodaŭ «Paŭnočny patok» i «Paŭnočny patok — 2», jakija viaduć z Rasii ŭ Hiermaniju, niepadalok ad dackaha vostrava Barncholm u vyklučnych ekanamičnych zonach Danii i Šviecyi adbyłosia niekalki mahutnych vybuchaŭ, u vyniku jakich u hazapravodach utvaryłasia nie mienš za čatyry paškodžańni. Ułady Šviecyi praviali rasśledavańnie, zajaviŭšy pa jaho vynikach, što «Paŭnočnyja patoki» byli razburanyja naŭmysnymi vybuchami.
9 kastryčnika pačała rasśledavańnie Fiederalnaja prakuratura Hiermanii. Da vostrava Barncholm adpravilisia dva karabli VMS FRH z vadałazami, jakija pavinny zadakumientavać paškodžańni trub. U Fiederalnaj prakuratury padkreślili, što havorka idzie pra surjoznuju ataku na enierhietyčnuju infrastrukturu, što stavić pad pahrozu biaśpieku Hiermanii.
Čytajcie taksama:
Bundeśvier čakaje hibrydnych pahroz i ataki na infrastrukturu Hiermanii. Mahčyma, siońnia takaja adbyłasia
Brytancy miarkujuć, što «Paŭnočny patok» mahli padarvać dystancyjna zahadzia pastaŭlenymi minami
Šviedskija siejsmołahi: Na maršrutach «Paŭnočnych patokaŭ» fiksavalisia vybuchi
