Na pytańni adkazvaje miedyk-infiekcyjanist (jon pažadaŭ zastacca ananimnym).
«Paracetamoł u vysokich dozach vielmi niebiaśpiečny dla piečani»
Umoŭna ličycca, što nieabchodna źbivać tempieraturu (vymieranuju ŭ padpachavaj zapadzinie) vyšejšuju za 38,5C jak u darosłych, tak i ŭ dziaciej.
«Lichamanka vyšejšaja za takoje značeńnie ŭžo drenna pieranosicca arhanizmam, pavialičvaje enierhietyčnyja vydatki i moža spryjać paharšeńniu chraničnych zachvorvańniaŭ pry ich najaŭnaści.
Panižeńnie tempieratury nižej za 38,5S nie pryviadzie da jakich-niebudź niehatyŭnych nastupstvaŭ. Prosta ŭ bolšaści vypadkaŭ jana dobra pieranosicca darosłymi i dziećmi i źjaŭlajecca prajavaj naturalnaha imunnaha adkazu, spryjajučy baraćbie suprać uzbudžalnikaŭ infiekcyjnych zachvorvańniaŭ.
Niama daśledavańniaŭ, jakija b pakazali niehatyŭny ŭpłyŭ źnižeńnia nievysokaj tempieratury na arhanizm čałavieka», — kaža doktar-infiekcyjanist.
Dla źnižeńnia tempieratury zvyčajna možna vykarystoŭvać paracetamoł i niesteroidnyja supraćzapalenčyja lekavyja srodki, najbolš viadomy ź jakich — ibuprafien.
«Darečy, i paracetamoł, i ibuprafien isnujuć u zručnych formach dazavańnia dla dziaciej — u vyhladzie suśpienzii abo rektalnych śviečak, — kaža jon. — Taksama ŭ prodažy majucca kambinavanyja lekavyja srodki ŭ vyhladzie raznastajnych paraškoŭ, jakija źmiaščajuć, jak praviła, paracetamoł, z supraćhistaminnymi srodkami, vitaminami. Dadatkovyja da paracetamołu kampanienty dazvalajuć palepšyć pieranosnaść simptomaŭ prastudy, akazvajuć lohkaje abiazbolvalnaje i siedatyŭnaje dziejańnie.
Vielmi važna ŭvažliva čytać instrukcyju da preparata, jak pravilna jaho ŭžyvać samastojna, bo paracetamoł u vysokich dozach vielmi niebiaśpiečny dla piečani.
Na praktycy časam sustrakajecca vypadkovaja pieradaziroŭka paracetamołam u dziaciej, što zaŭsiody maje žyćciepahražalny stan. Tamu ŭ dziaciej bolšaść daktaroŭ vykarystoŭvaje dla źnižeńnia lichamanki ibuprafien».
Ci možna źbivać tempieraturu aśpirynam?
«Jon moža vykarystoŭvacca z haračkapanižalnaj metaj, adnak nie ŭ dziaciej da 18 hadoŭ. U dziciačaj papulacyi apisany vypadki vostraha raźvićcia niekrozu piečani na fonie prymianieńnia aśpirynu pry hrypie i niekatorych inšych reśpiratornych virusnych infiekcyjach. Taksama aśpiryn maje bolš niepažadanych efiektaŭ, čym biaśpiečnyja ibuprafien i paracetamoł. Mienavita tamu apošnim siońnia addajecca pieravaha», — tłumačyć infiekcyjanist.
«Parada nakrycca koŭdrami i pacieć — škodnaja»
Takaja rekamiendacyja moža pryvieści da abciažaranaj ciepłaaddačy pry lichamancy i spryjać paharšeńniu stanu arhanizma.
Kali čałaviek drenna pieranosić navat nievysokuju tempieraturu, jaje treba źmianšać.
«Takoje charakterna dla asob pažyłoha ŭzrostu, z chraničnaj sardečna-sasudzistaj patałohijaj, bronchalohačnymi zachvorvańniami, cukrovym dyjabietam», — kaža jon.
Doktar-infiekcyjanist raskazvaje, što ŭ siarednim pry praciahłaj lichamancy čałaviek moža hublać da 10 mł/kh vadkaści na kožny hradus padvyšeńnia tempieratury.
«Vielmi važna vykonvać pravilny pitny režym, pavialičyć spažyvańnie vadkaści — časam navat u 1,5-2 razy — u paraŭnańni sa štodzionnaj normaj, jakaja składaje 20-30 mł/kh, na ŭvieś čas lichamanki», — raić jon.
«Časam tempieratura, jakaja nie źnižajecca haračkapanižalnymi, moža być prykmietaj ciažkaj infiekcyi»
Źviartacca da doktara varta ŭ vypadku, kali samaadčuvańnie nie palepšyłasia na praciahu 3 dzion i bolš ad pieršych prykmiet chvaroby (bolšaść reśpiratornych virusnych infiekcyj da hetaha času pačynajuć prachodzić navat bieź lačeńnia).
«Taksama kali źjavilisia vidavočnyja prykmiety paharšeńnia samaadčuvańnia: zachoŭvajecca vysokaja tempieratura, jakaja drenna adkazvaje na haračkapanižalnyja, źjaŭlajecca parušeńnie śviadomaści, dychańnia, nizki arteryjalny cisk, vyjaŭlenaja tachikardyja, źnižeńnie abjomu mačy i inšyja prykmiety parazy ŭnutranych orhanaŭ», — tłumačyć miedyk.
Što rabić, kali tempieratura nie źbiłasia paśla adnoj tabletki haračkapanižalnaha?
«Možna praź niekalki hadzin pryniać jašče adnu, — kaža doktar-infiekcyjanist. — Važna nie pieravyšać maksimalna rekamiendavanyja instrukcyjaj pa prymianieńni daziroŭki (asabliva dla paracetamołu, pažadana dla darosłych nie bolš za 2,0 hrama ŭ sutki).
Kali tempieratura nie źniziłasia i paśla hetaha, lepš źviarnucca pa dapamohu da doktara abo vyklikać chutkuju miedycynskuju dapamohu. Časam tempieratura, jakaja nie źnižajecca haračkapanižalnymi, moža być prykmietaj ciažkaj infiekcyi.
Časam u dadatak da lekaŭ vykarystoŭvajuć fizičnyja mietady astudžeńnia: raspranuć čałavieka, abcirać skuru vadoj pakajovaj tempieratury, bolš paić chvoraha, vykarystoŭvać mokruju vilhotnuju paviazku na łob».
Čytajcie taksama:
U biełaruskich aptekach źjavilisia leki dla pacyjentaŭ z karanavirusam
Novy padychod da vyjaŭleńnia puchlin: navukoŭcy šukajuć mikroby i hrybki
Ci karysna spać u škarpetkach? Doktar nie sumniajecca
